Медицинэм иIофышIэхэу Херсон хэкум и Геническэ район ипсэупIэхэм ащыIа­гъэ­хэу апэрэ медико-сани­тарнэ IэпыIэгъу цIыфхэм язы­тыгъэхэм шIухьафтынхэр афэгъэшъошэгъэнхэм фэгъэ­хьыгъэ Iофтхьабзэ АР-м и Правительствэ зычIэт унэм тыгъуасэ щыкIуагъ.

Адыгеим и ЛIышъхьэу КъумпIыл Мурат ахэм закъыфигъазэзэ къыIуагъ IофшIэнэу агъэцэкIагъэм, а районым щыпсэухэрэм IэпыIэгъу зэрафэхъугъэ­хэм, IэпэIэсэныгъэ ахэлъэу япшъэрылъ зэрагъэцэкIа­гъэм апае зэрафэразэр.

«Хэгъэгум и Президентэу Владимир Путиным пчъагъэрэ къыхигъэщыгъ УФ-м ишъолъырыкIэ хъугъэхэм ащы­псэухэрэм апае Урысыем фэлъэкIыщтыр зэкIэ зэришIэщтыр. Шъори шъузэрэщыгъуазэу, Адыгеим ащ фэдэ IофшIэным иIахь хешIыхьэ, Херсон хэкум и Геническэ район ишIуагъэ регъэкIы. Iофтхьабзэу зэшIотхыгъэхэр бэ мэхъух. Лъэныкъо зэфэшъхьафхэм­кIэ IэпыIэгъур ятэты, псауныгъэм икъэухъумэн ахэм зэу ащыщ. Шы­шъхьэIу мазэм партиеу «Единэ Россием» ыпкъ къикIыгъэ Iофтхьабзэу «Псауныгъэм имэшIоку» зыфиIорэм Адыгеим икIыгъэ врачхэр хэлэжьа­гъэх, Геническэ районым щыIагъэх. Мэзищым къыкIоцI нэбгырэ мини 10-мэ ахэр яплъыгъэх ыкIи яIэзагъэх, ащ щыщэу нэбгырэ 1300-р кIэлэ­цIыкIух, пстэумкIи операцие 35-рэ ашIыгъ. Геническэ район сымэджэщым иврачхэм ялъэIукIэ Адыгеим иIофы­шIэхэм яшIуагъэ къагъэкIуагъ медицинэ оборудование иным иIоф­шIэн зыпкъ игъэуцогъэнымкIэ, джащ фэдэу чIыпIэ врачхэмрэ сымаджэхэмрэ пэIудзыгъэ шIыкIэм тетэу яшIуагъэ арагъэкIынымкIэ», — къыIуагъ Адыгеим и ЛIышъхьэ.

Республикэм ипащэ къыIотагъ хэгъэ­гум ишъолъырыкIэ хъугъэхэм IэпыIэ­гъоу Адыгеим аритырэр зыфэдэм фэгъэхьыгъэу. Iэзэгъу уцхэмкIэ, нэмыкI медицинэ пкъыгъохэмкIэ Геническэ сымэджэщым яшIуагъэ рагъэкIы.

Гъэмафэм Адыгеим изыгъэпсэфыпIэхэм кIэлэцIыкIухэр ащыIагъэх, еджапIэхэм, кIэлэцIыкIу IыгъыпIэхэм, чъыIэ къызыхъу­гъэм къыщыублагъэу унэхэм ягъэфэбэн епхыгъэ Iофтхьабзэхэм ахэлажьэх, чIы­гулэжьхэм, инфраструктурэр, зэхакъутэгъэ унэхэр зыпкъ игъэуцожьыгъэнхэм, кIэлэцIыкIу джэгупIэхэр шIыгъэнхэм, санитарием ишапхъэхэм адиштэу Iофхэр зэшIохыгъэ хъунхэм анаIэ атырагъэты.

Джыри мэхьанэшхо зиIэ лъэныкъохэм ащыщ зышъхьэ къезыхьыжьэжьыгъэхэм, къэкощыжьыгъэхэм IэпыIэгъу ятыгъэныр. Волонтерхэр, предпринимательхэр, общественнэ IофышIэхэр, республикэм иорганизацие зэфэшъхьафхэр а лъэныкъомкIэ зэхащэрэ Iофтхьабзэхэм чанэу ахэлажьэх, Донбассрэ Херсон хэкумрэ ащыпсэухэрэм аIэкIагъэхьащт шIушIэ хьылъэхэр гъэхьазырыгъэнхэмкIэ адеIэх. Джащ фэдэу Адыгеим икIыгъэ дзэ къулы­къушIэхэу хэушъхьафыкIыгъэ дзэ операцием хэлажьэхэрэми адеIэх.

«ТапэкIи джащ фэдэу тишIуагъэ ядгъэкIыщт, непэкIэ Геническэ рай­оным щыIэ тимедицинэ IофышIэхэми тынаIэ атетыщт. Джыри зэ къыхэзгъэщы­нэу сыфай ахэм сызэрафэразэр. Тэ ахэм тарэгушхо, сэнэхьатэу хихыгъэм фэшъыпкъэу непэ Iоф зышIэрэ медик пэпчъ тыфэраз. Лъэныкъо зэфэшъхьаф­хэмкIэ IэпэIэсэныгъэ ин зыхэлъ Iофы­шIэхэр тисымэджэщхэм, типоликлиникэхэм нахьыбэу ащылэжьэнхэм тегъэпсыхьагъэу Адыгеим бэ щызэшIуахырэр. Ащ пае ящыкIэгъэ амалхэр зэкIэ ядгъэгъотыщтых. СышъуфэлъаIо псауныгъэ пытэ, щыIэкIэшIу шъуиIэнэу, Адыгеимрэ тихэгъэгурэ ащыпсэурэ цIыфхэм яфедэ зыхэлъ Iоф къинэу жъугъэцакIэрэм гъэхъэгъакIэхэр щы­шъушIынхэу шъуфэсэIо!», — къыIуагъ Адыгеим и ЛIышъхьэ.

Ащ нэужым Геническэ районым Iофэу щашIэрэм фэгъэхьыгъэу медикхэм къаIо­тагъ, къиныгъоу зэуталIэхэрэри, къадэхъу­хэрэри шъхьэихыгъэу къаIуагъэх. Псауныгъэм икъэухъумэнкIэ а чIыпIэм щыIэ учреждениехэми Iоф адашIэ, зэгурыIоныгъэ ахэлъэу зэсэнэхьатэгъухэр зэдэлажьэх.

Iофтхьабзэм икIэухым Адыгэ Респуб­ликэм и ЛIышъхьэ и Рэзэныгъэ тхылъхэмрэ Адыгеим къэралыгъо гъэпсыкIэ иIэ зыхъугъэм ия 100-рэ илъэс фэгъэ­хьыгъэ нэпэеплъ медальхэмрэ аратыжьыгъэх. Ахэм ащыщых: медицинэ IэпыIэгъу псынкIэмкIэ ыкIи тхьамыкIагъохэм ахэфагъэхэм медицинэ IэпыIэгъу ятыгъэнымкIэ Адыгэ республикэ гупчэм игараж иавтомобиль иводителэу Азэщык Азэмат, Мыекъопэ къэлэ поликлиникэм иврач-терапевтэу, поликлиническэ отделением ипащэу Анжелика Альпинар, Аптечнэ базэм транспорт-хъызмэт Iоф­хэмкIэ иотдел ипащэу Бгъуашэ Чыназ, IэпыIэгъу псынкIэмкIэ ыкIи тхьамыкIагъо­хэм ахэфагъэхэм медицинэ IэпыIэгъу ятыгъэнымкIэ Адыгэ республикэ гупчэм игараж иавтомобиль иводителэу Зэфэс Заурбый, Адыгэ республикэ клиническэ сымэджэщым къэбарлъыгъэIэс технологиехэмкIэ иотдел ипащэу Александр Обмачевскэр, медицинэ реабилитациемкIэ Адыгэ республикэ поликлиникэм иврач-терапевтэу ПIатIэкъо Маринэ, Мые­къопэ къэлэ клиническэ сымэджэщым хирургиемкIэ иотделение иврач-хирургэу Закир Рагимовыр, жъэгъэузхэм зыщяIазэхэрэ Адыгэ республикэ клиническэ диспансерэу Д. М. Шышъхьэм ыцIэкIэ щытым ирентгенолаборантэу Сергей Сидоренкэр, зэпахырэ узхэм зыщяIазэ­хэрэ Адыгэ республикэ клиническэ сымэджэщым иврач-эндокринологэу Сихъу Адыиф, IэпыIэгъу псынкIэмкIэ ыкIи тхьамыкIагъохэм ахэфагъэхэм медицинэ IэпыIэгъу ятыгъэнымкIэ Адыгэ республикэ гупчэм игараж иавтомобиль иводителэу СтIашъу Махьмуд, Аптечнэ базэм тран­спорт-хъызмэт IофхэмкIэ иводитель-экспедиторэу ХьакIэмызэ Пщымаф, Адыгэ республикэ кIэлэцIыкIу клиническэ сы­мэджэщым иврач-травматолог-ортопедэу КIыкI Руслъан, Мыекъопэ къэлэ поликлиникэм иврач-терапевтэу ШкIэжъ Сэ­тэнай.

АР-м и ЛIышъхьэ ипресс-къулыкъу