Социальнэ хъытыухэм ахэт пстэуми зэдагъэфедэн алъэкIырэ нэкIубгъохэр къэралыгъо къулыкъухэм яIэнхэ зэрэфаем ыкIи ахэм Iоф зэращашIэщтым афэгъэхьыгъэ зэхахьэ Адыгеим щыкIуагъ.

Ар зэхэзыщагъэхэр Адыгеим шъо­лъыр зэдэлэжьэныгъэмкIэ ыкIи хэхъоныгъэмкIэ ифонд, АР-м и ЛIышъхьэрэ АР-м иминистрэхэм я Кабинетрэ я Администрацие, шъолъыр гъэIорышIэнымкIэ республикэм и Гупч.

Хэбзэгъэуцугъэу къэралыгъо ыкIи муниципальнэ къулыкъухэм, ахэм япхыгъэхэм ыкIи хьыкумхэу Урысыем итхэм социальнэ хъытыухэм нэкIубгъохэр къащызэIуахынхэшъ, зигъо Iофыгъохэр къарагъэхьанхэу пшъэрылъ афэзышIырэм мы илъэсым итыгъэгъэзэ мазэ и 1-м къыщыублагъэу кIуачIэ иIэ хъугъэ. Ащ къыдыхэлъытагъэу Iофтхьабзэу тирес­публикэ щызэхащагъэр мэфитIурэ кIуагъэ ыкIи гъэсэныгъэ шапхъэм илъэу зэхащагъ. Ар къызэIуихыгъ АР-м и ЛIышъхьэ­рэ АР-м иминистрэхэм я Кабинетрэ я Администрацие ипащэу Владимир Свеженец.

Зэхахьэм иапэрэ мафэ хэлэжьагъэх Адыгеим цифрэ хэхъоныгъэмкIэ иминистрэ игуадзэу Михаил Семенцовыр, мысатыу организациеу «Диалог Регионы» зыфиIорэм къэралыгъо пабликхэмкIэ проектнэ IофшIэным ипащэу Илья Емельяненкэр, мы организацием адреснэ зэпхыныгъэхэмкIэ испециалист шъхьаIэу Александр Ковалевыр, Красногвардейскэ районым иадминистрацие ипащэ иIэпыIэгъоу Екатерина Диди­мовар.

Урысыем цифрэмкIэ и Министерствэ къытыгъ шъолъырхэу къэралыгъо нэкIубгъохэр анахьыбэу къызэIузыхыгъэхэмкIэ федеральнэ хэбзэгъэуцугъэр анахь дэгъоу зыгъэцэкIагъэхэм Адыгеир зэращыщыр. Джырэ уахътэм республикэм ишъолъыр хэбзэ къулыкъухэм, чIыпIэ зыгъэIорышIэжьыпIэхэм, ахэм япхыгъэ­хэм янэкIубгъо 2023-рэ къызэIуахыгъ. Къэралыгъо пабликхэм ясистемэ организацие 719-м щыщэу 676-рэ епхыгъ. НэкIубгъохэм къарыхьэрэм идэгъугъэкIэ тишъолъыр я 38-рэ чIыпIэр еубыты къэралыгъом исубъект 83-мэ ащыщэу. Мы IофшIэныр зэшIозыхыхэрэр ыкIи зэхэзыщэхэрэр шъолъыр гъэIорышIэнымкIэ Гупчэхэр арых.

АдыгеимкIэ мыщ фэдэ Гупчэм ипащэу Къоджэшъэо Казбек къызэриIуагъэмкIэ, Iофышхо зэшIуахыгъ. Непэрэ мафэм ехъулIэу Адыгеим иорганизациехэу къэ­ралыгъо пабликхэм яшапхъэ итэу Iоф зышIэхэрэм япроцент 80-м нахьыбэмэ ясоциальнэ хъытыухэм къэралыгъо тамыгъэхэр атет, джы пшъэрылъэу къэуцурэр къэбар гъэшIэгъонхэр къарагъа­хьэхэзэ республикэм щыпсэухэрэр ахэм нахьыбэу ахэгъэхьэгъэнхэр ары.

— Министерствэхэм, муниципальнэ псэупIэхэм, ахэм япхыгъэ къулыкъу­хэм апае гъэсэныгъэ Iофтхьабзэхэр зэхэтэщэх социальнэ хъытыухэм нахь дэгъоу Iоф зэрадэпшIэн фаем фэгъэ­хьыгъэу. Къихьащт илъэсым мы лъэ­ныкъор тэркIэ шъхьаIэщт, — къыIуагъ Къоджэшъэо Казбек.

Зэхахьэм иIофшIэн щагъэшIуагъэх апэрэ республикэ зэнэкъокъоу «Къэралыгъо нэкIубгъо анахь дэгъу-2022-рэ» зыфиIорэм щатекIуагъэхэр.

Лъэныкъоу «АР-м икъэралыгъо къулыкъу икъэралыгъо нэкIубгъо анахь дэгъу» зыфиIорэмкIэ апэрэ чIыпIэр къыдэзыхыгъэр Адыгеим псауныгъэр къэухъумэгъэнымкIэ и Министерствэ социальнэ хъытыухэмкIэ администраторэу Жанна Кривых.

«АР-м чIыпIэ зыгъэIорышIэжьынымкIэ инэкIубгъо анахь дэгъу» зыфиIорэр зыфагъэшъошагъэр Шэуджэн район администрацием къикIыгъэ Сихъу Бэл.

АР-м иеджапIэхэмкIэ нэкIубгъо анахь дэгъу зыгъэхьазырэу алъытагъэр Джэджэ районым ия 8-рэ еджапIэу В. Солдатенкэм ыцIэ зыхьырэм къикIыгъэ Ольга Бахматовар ары.

КIэлэцIыкIу IыгъыпIэхэмкIэ къыхагъэ­щыгъэр Джэджэ районым иIыгъыпIэу «Ромашка» зыфиIорэм иIофышIэу Анастасия Котловар ары.

Псауныгъэр къэухъумэгъэным иситемэкIэ нэкIубгъо анахь дэгъур зиIэу алъытагъэр Адыгэ республикэ клиническэ сымэджэщыр ары, администраторыр Мэхъош Элл.

АР-м социальнэ ухъумэнымкIэ инэ­кIуб­гъо анахь дэгъур зыгъэхьазырэу къыхагъэщыгъэр Беджэлд Оксан, ащ къэралыгъо ыкIи муниципальнэ фэIо-фа­шIэхэр афэзыгъэцэкIэрэ гупчэм Iоф щешIэ.

Гъэсэныгъэм исистемэкIэ анахь нэ­кIубгъо дэгъоу алъытагъэр республикэ естественнэ-хьисап еджапIэм иер ары. Ар зезыщэрэр – Марина Игнатова.

Культурэм иучреждениехэмкIэ анахь нэкIубгъо дэгъу зиIэу агъэнэфагъэр Джэджэ районым ит лъэпкъ культурэмкIэ гупчэр ары. Администраторыр Екатерина Рыбкина.

Лъэныкъоу «СпортымкIэ нэкIубгъо анахь дэгъу» зыфиIорэмкIэ къыхагъэщыгъ Бзаго Рустам, Мыекъуапэ физическэ культурэмрэ спортымрэкIэ и Комитет ащ Iоф щешIэ.

КъэбарлъыгъэIэс амалхэмкIэ нэкIубгъо анахь дэгъу зыгъэхьазырэу алъытагъэр Красногвардейскэ район гъэзетэу «Дружбэм» иер ары. Зыгъэхьазырырэр Анна Асеева.