Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет илъэс къэс зэхищэрэ зэнэкъокъухэм якIэуххэр зэфихьысыжьыгъэх.

Комитетым итхьаматэу Шъхьэ­лэхъо Аскэр мыщ фэдэ зэнэкъокъухэм мэхьэнэ ин зэряIэр ипэублэ гущыIэ къыщыхигъэщыгъ.

— Сэнаущыгъэ ин зыхэлъ журналистхэр тиIэх, ахэм япчъа­гъэ джыри хэхъонэу тыфай. Мыгъэ Адыгеир зызэхащагъэр илъэси 100 зэрэхъу­гъэм фэгъэ­хьыгъэ материал гъэшIэгъонхэр къэшъутхыгъэх, къэжъугъэлъэгъуагъэх, мобилизациеми шъунаIэ тет, ау джыри IофшIэныр нахь гъэ­лъэшыгъэн фаеу сэлъытэ. Хэ­ушъхьафыкIыгъэ дзэ операцием фэгъэ­хьыгъэ къэбар нэпцIэу къе­кIокIыхэрэр ашIошъ мыхъуным фэшI цIыфхэм гущыIэгъу тафэхъун, шъып­къэр алъыд­гъэ­Iэсын фае. Джащ фэдэу мы аужырэ илъэсхэм социальнэ хъытыу­хэм Iоф адэшъошIэ, ащкIэ пшъэрылъхэр зэрифэшъуашэу шъогъэцакIэх, — къыIуагъ Шъхьэ­лэхъо Аскэр.

«Адыгеир — зэдытиун» зыфиIорэ лъэныкъом тиIофшIэгъоу ЕмтIылъ Нурбый къыгъэхьазырыгъэ тхыгъэу «Огур ренэу орэкъаргъо!» зыцIэм апэрэ чIыпIэр къыхьыгъ. Гъэзетэу «Майкопские новости» зыфиIорэм иобозревателэу Александра Балабась ятIонэрэ чIыпIэр фагъэшъошагъ. «Советскэ Адыгеим» иобозревателэу Валерия Врубель ящэнэрэ чIыпIэр къыхьыгъ.

Теле-радиокъэтынхэмкIэ Тыгъужъ Саныет, Хьакъунэ Заремэ, Нэгъэрэкъо Саниет якъэ­тынхэр анахь дэгъоу алъыта­гъэх.

«Патриот» зыфиIорэмкIэ Кощхьэблэ районым Iоф щызы­шIэрэ «ЗыкI къэбарлъыгъэIэс гупчэм» пшъэдэкIыжь зыхьырэ исекретарэу Болэкъо Риммэ итхыгъэ апэрэ чIыпIэ фагъэшъо­шагъ, ятIонэрэ хъугъэ гъэзетэу «Единство» зыфиIорэм иIофышIэу, социальнэ хъытыухэм, сайтым иредакторэу ПхъэчыяшIэ Суандэ, тиIофшIэгъоу Мамырыкъо Нуриет итхыгъэу «Псэр ащэ напэр ащэфы» зыфиIорэм ящэнэрэ чIыпIэ къыфагъэшъошагъ.

Джащ фэдэу къолъхьэ тын-Iыхыным пэшIуекIогъэным фэгъэхьыгъэ материалхэр къэ­зыгъэхьазырыгъэхэу текIоны­гъэр ыкIи хагъэунэфыкIырэ чIы­пIэхэр къыдэзыхыгъэ­хэр агъэшIуагъэх.

Шъхьэлэхъо Аскэр журналистхэм къафэгушIуагъ, шIухьафтынхэр аритыжьыгъэх. «Адыгэ макъэм» иредактор шъхьаIэ хъугъэ МэщлIэкъо Саидэрэ редактор шъхьаIэм игуадзэу Тэу Замирэрэ яIэнатIэхэм зэра­IухьагъэхэмкIэ къафэгушIуагъ.

ДЕЛЭКЪО Анет.