Мыекъопэ къэралыгъо технологическэ университетым «Пчъэ зэIухыгъэхэм я Мафэ» бэмышIэу щыкIуагъ. Адыгеим ыкIи Краснодар краим арыт гурыт еджапIэхэм апшъэрэ классхэм ащеджэхэрэр ыкIи гурыт сэнэхьат зыщарагъэгъотырэ учреждениехэр къэзыухырэ ныбжьыкIэхэр мыщ рагъэблэгъагъэх.

Мыекъопэ къэралыгъо технологическэ университетым сэнэхьатэу иIэхэр, иматериальнэ базэ зыфэдэр, зэтегъэпсыхьэгъэ корпусхэр, аудиториехэр, практическэ ыкIи лабораторнэ гъэцэкIэнхэр зыщашIыхэрэр, компьютернэ классхэр арагъэлъэгъугъэх. Джащ фэдэу спортивнэ ыкIи тренажернэ залхэр, общежитиер зэрэзэтегъэпсыхьагъэхэр нэрылъэгъу къафашIыгъ.

ТхылъеджапIэм ищыкIэгъэ литературэр зэкIэ чIэлъ, электроннэ базэ агъэпсыгъ, а пстэури студентхэм къашъхьапэ. Iоф­тхьабзэм къыдыхэлъытагъэу апшъэрэ еджапIэм иректор ныбжьыкIэхэм гущы­Iэгъу афэхъугъ. ЕгъэджэнымкIэ проректорэу Людмила Задорожнаяр лъэны­къоу зэрэрагъаджэхэрэр, джырэкIэ анахь къыхахырэ сэнэхьатхэр, студентхэм сэнаущыгъэу ахэлъым зэрэхагъахъорэр къекIолIагъэхэм къафиIотагъ.

Апшъэрэ еджапIэм чIэхьанхэмкIэ тхылъхэр зэратырэ комиссием пшъэ­дэкIыжь зыхьырэ исекретарэу Бэрзэдж Розэ 2023-рэ илъэсым яIофшIэн зэхъо­кIыныгъэу фэхъугъэхэм, тхылъэу къепхьылIэн фаехэм къэзэрэугъо­игъэхэр ащигъэгъозагъэх. Апшъэрэ еджапIэм аштэнхэмкIэ анахьэу анаIэ зытетыщтхэр нэужым къыIотагъ.

НыбжьыкIэ политикэмкIэ проректорэу БрантI Мурат шъолъыр, урысые ыкIи дунэе зэнэкъокъухэм студентхэр зэрахэлажьэхэрэр ыкIи ахэм гъэхъагъэу яIэхэр къафиIотагъ. Апшъэрэ еджапIэм истуденческэ объединениехэм ягугъу къышIызэ, мыхэм яшIуагъэкIэ ныбжьыкIэхэм сэнаущыгъэу ахэлъым хагъэхъон амал зэряIэр къыIуагъ. Студенческэ шIэныгъэ обществэм ипащэу Надежда Продиблох IофшIэнэу агъэцакIэрэм, олимпиадэхэр зэрэзэхащэ­хэрэм, ахэм ныбжьыкIэхэр зэрэхэла­жьэхэрэм ыкIи гъэхъэгъэшIухэр зэрашIыхэрэм къытегущыIагъ.

Iофтхьабзэм къыдыхэлъытагъэу апшъэ­рэ еджапIэм аригъэгъотырэ сэнэхьатхэм ялъытыгъэу ныбжьыкIэхэм заушэтын амал яIагъ. Практическэ IофшIэнхэр агъэцэкIагъэх, сэнэхьат пэпчъ агъэфедэрэ Iэмэ-псымэхэм нэIуасэ афэхъу­гъэх, агъэфедагъэх.

Iофтхьабзэм икIэух ныбжьыкIэхэм упчIэхэр къатыгъэх. Мыекъопэ къэралыгъо технологическэ университетым чIэхьанхэм пае баллэу ищыкIэгъэщтыр, лъэныкъо зэфэшъхьафхэмкIэ гъэхъагъэ­хэр зиIэхэм фэгъэкIотэныгъэу яIэщтхэр, ыпкIэ хэлъэу еджэнхэм уасэу иIэр, стипендиер зыфэдизыр, къалэм дэмысхэм общежитие къаратымэ ары ахэр анахьэу къызыкIэупчIагъэхэр. Iофтхьабзэм ыуж шъхьадж зыфэе факультетым идеканхэм акIэрыхьагъэх, гущыIэгъу афэхъугъэх.

ДЕЛЭКЪО Анет.