Зэрарэу сомэ миллион 11,3-рэ аригъэшIыгъ
АР-м и Къэралыгъо бюджет учреждениеу «Стройзаказчик» зыфиIорэм ипащэу Iоф зышIэщтыгъэм ылъэныкъокIэ къызэIуахыгъэ уголовнэ Iофыр ыкIэм фэкIуагъ ыкIи ащ кIуачIэ иIэ хъугъэ. ИIэнатIэ къызэрэзфигъэфедагъэм къыхэкIэу учреждением ипащэ агъэмысагъ.
ЩынэгъончъэнымкIэ федеральнэ къулыкъум и ГъэIорышIапIэу АР-м щыIэм икъулыкъушIэхэм зэрагъэунэфыгъэмкIэ, гъэIорышIапIэу «Стройзаказчикым» ипащэщтыгъэ А. Абрэджым 2020-рэ илъэсым ишэкIогъу мазэ къыщыублагъэу 2021-рэ илъэсым мэлылъфэгъум нэс линейнэ объектэу «Водозабор» зыфиIорэр ыкIи Мыекъопэ районым ипсэупIэхэм якIолIэрэ псырыкIопIэ гъогушхор ашIызэ, джащ фэдэу шъолъыр проектэу «Чистая вода», лъэпкъ проектэу «Экология» зыфиIохэрэр Мыекъуапэ щыпхыращыхэзэ гидротехническэ псэуалъэхэм яшIын пае УФ-м и Мэз фонд хэхьэрэ чIыгу Iахьхэм чъыгхэр раупкIынымкIэ Iизын имыIэу IофшIэнхэр щигъэцэкIагъэх.
АР-м мэзхэмкIэ и ГъэIорышIапIэ иэкспертхэм зэрагъэунэфыгъэмкIэ, А. Абрэджыр зэрэзекIуагъэм УФ-м и Мэз фонд зэрарэу сомэ миллион 11,3-рэ ригъэшIыгъ.
ЩынэгъончъэнымкIэ федеральнэ къулыкъум и ГъэIорышIапIэу АР-м щыIэм икъулыкъушIэхэм къаугъоигъэ материалхэмкIэ А. Абрэджым ылъэныкъокIэ уголовнэ Iоф къызэIуахыгъ.
2022-рэ илъэсым шэкIогъум и 11-м Мыекъопэ район хьыкумым иунашъокIэ А. Абрэджым хьапс тыралъхьагъ, хэбзэ IофшIэныр илъэси 3 пIалъэкIэ ыгъэцэкIэн фимытэу ашIыгъ.
ПшъэдэкIыжьым кIуачIэ иIэ хъугъэ.
ЩынэгъончъэнымкIэ федеральнэ къулыкъум и ГъэIорышIапIэу АР-м щыIэм ипресс-къулыкъу