КъумпIыл Мурат цIыфхэр ригъэблэгъагъэх
УФ-м и Президентэу Владимир Путиным пшъэрылъ къызэрэфишIыгъэм тетэу Адыгеим и ЛIышъхьэ цIыфхэр щыригъэблэгъагъэх Урысыем и Президент иприемнэу республикэм щыIэм.
ЗэIукIэгъум хэлэжьагъэх федеральнэ инспектор шъхьаIэу Сергей Дрокиныр, АР-м ипрокурор игуадзэу Бэрэтэрэ Аслъан, министерствэхэм ыкIи муниципалитетхэм япащэхэр.
Республикэм и ЛIышъхьэ зыкъыфагъэзагъ Мыекъуапэрэ Мыекъопэ районымрэ ащыпсэухэрэм ащыщхэм. ПсэупIэу Абадзехскэм дэсхэм ацIэкIэ къагъэхьыгъэ лъэIу тхылъыр зыфэгъэхьыгъэр Мыекъопэ районымкIэ гъэсэныгъэ зыщарагъэгъотырэ гупчэу N 3-м икотельнэ иIоф. Районым ипащэу Михаил Марьиным къызэриIуагъэмкIэ, къэралыгъо программэу «Къуаджэхэм зэдиштэу хэхъоныгъэ ягъэшIыгъэныр» зыфиIорэм икъэкIуапIэхэмкIэ 2023-рэ илъэсым ар ашIыщт.
Адыгэ Республикэм и ЛIышъхьэ пшъэрылъ къыгъэуцугъ муниципалитетым ипсэупIэхэм яхэхъоныгъэ дэлажьэхэ зыхъукIэ къэралыгъо программэхэмрэ лъэпкъ проектхэмрэ къатырэ амалхэр нахь дэгъоу къызфагъэфедэнхэу.
Мыекъуапэ щыщ унагъоу сабыибэ зэрысыр къыкIэлъэIугъ газыр унэм ращэнымкIэ IэпыIэгъу къыратынэу. АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч къызэриIуагъэмкIэ, социальнэ IэпыIэгъум къыдилъытэрэ Iофтхьабзэхэм адиштэу унагъом яшIуагъэ рагъэкIыщт — зэтыгъо ахъщэ IэпыIэгъоу сомэ мини 100 а Iофым пэIухьанэу ратыщт. Джащ фэдэу гъот макIэ зиIэ унагъохэу сабыибэ зэрысхэм, мобилизацием къыхиубытагъэхэм, гуфакIохэм газыр афищэгъэнымкIэ IэпыIэгъу зэрафэхъущтхэм япхыгъэ Iофыгъохэми мыщ щатегущыIагъэх.
Мыекъуапэ щыпсэурэ бзылъфыгъэр Iэзэгъу уцхэм япхыгъэ Iофыгъор ары зыгъэгумэкIыщтыгъэр. АР-м псауныгъэм икъэухъумэнкIэ иминистрэу Мэрэтыкъо Рустем къызэриIуагъэмкIэ, республикэм ищыкIагъэм телъытэгъэ уцхэр иIэх, 2023-рэ илъэсым къызфагъэфедэщтхэр къащэфхэу рагъэжьагъ.
ФэгъэкIотэныгъэ зиIэхэм Iэзэгъу уцхэр нахьышIоу аIэкIэгъэхьэгъэнхэмкIэ, джащ фэдэу мэзэ заулэкIэ нахь пасэу ящыкIэгъэ уцыр къаIэкIэхьаным иамал щыIэ хъунымкIэ зэшIохыгъэн фэе Iофыгъохэм къащыуцугъэх.
ЗэкIэ къаIэтыгъэ IофыгъохэмкIэ пIэлъэ гъэнэфагъэхэр республикэм и ЛIышъхьэ афишIыгъэх. Джащ фэдэу цIыфхэр зыгъэгумэкIырэ Iофыгъохэм ахэплъэгъэным, зэшIохыгъэнхэм апае ащ фэдэ зэIукIэгъухэр зэрищыкIагъэхэр ЛIышъхьэм къыхигъэщыгъ.
«ЦIыфхэм ялъэIу тхылъхэр официальнэ каналхэмкIэ, социальнэ сетьхэмкIэ, чIыпIэ зэфэшъхьафхэм ащызэхэтщэрэ зэIукIэгъухэмкIэ къытIэкIэхьэх. Ахэм къаIэтырэ Iофыгъохэм тынаIэ икъоу атедгъэтын, яеплъыкIэхэри тиIофшIэнкIэ къыдэтлъытэнхэ фае. Ащ амал къытыщт зизэшIохын кIыхьэ-лыхьэ хъугъэ Iофыгъохэр гъэцэкIагъэ хъунхэмкIэ», — къыIуагъ КъумпIыл Мурат.