Адыгеим и ЛIышъхьэу, партиеу «Единэ Россием» и Адыгэ шъолъыр къутамэ и Секретарэу КъумпIыл Муратрэ «Россети Кубань» зыфиIорэм ипащэ иапэрэ гуадзэу Эдгар Армаганянрэ зэдыряIэгъэ зэIукIэр Адыгэ Республикэм и Правительствэ зычIэт унэм тыгъуасэ щыкIуагъ.

ЗэдэгущыIэгъум хэлэжьагъэх Адыгеим и Премьер-министрэ ипшъэрылъхэр зыгъэцэкIэрэ КIэрэщэ Анзаур, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, республикэм зекIонымкIэ ыкIи гъэпсэфыпIэхэмкIэ и Комитет и Тхьаматэу Былымгъот Ибрахьим, АР-м псэолъэшIынымкIэ и Министерствэ ипащэ игуадзэу Лев Каракян, «Россети Кубань» зыфиIорэм ипащэ игуадзэхэу Виктор Коржаневскэр ыкIи Олег Нищук.

Республикэм иэлектросетевой комплекс ихэхъоныгъэ, инфраструктурнэ бюджет чIыфэхэр, бюджет къэкIуапIэхэр къызфагъэфедэхэзэ инвестиционнэ проектхэр (мыщ хэхьэ лъэпкъ проектэу «ЗекIонымрэ хьакIэхэр егъэблэгъэнхэмрэ» зыфиIорэри) пхырыщыгъэнхэмкIэ Iофыгъохэу къэуцугъэхэм атегущыIагъэх.

Адыгеим и ЛIышъхьэ къызэрэхигъэщыгъэмкIэ, республикэм иэлектросетевой комплекс гъэ­кIэжьыгъэным мэхьанэшхо иIэу щыт, сыда пIомэ цIыфхэм ящы­IакIэ зыфэдэщтымкIи, хэгъэгум и Президентэу Вдадимир Путиным лъэпкъ проектхэр, къэралыгъо программэхэр гъэцэкIагъэ хъунхэмкIэ пшъэрылъхэу къыгъэ­уцугъэхэм язэшIохын шIуагъэу къытырэм зыкъегъэIэтыгъэнымкIи бэ елъытыгъэр. ЦIыфхэр зычIэсыщт унэхэм яшIын нахь гъэпсын­кIэгъэным иIофи ащ къыдыхэлъы­тагъэу щыт. Адыгеим иминистрэхэм я Кабинетрэ компаниеу «Россети Кубань» зыфиIорэмрэ зэдэлэжьэныгъэу азыфагу илъым тегъэпсыхьэгъэ зэзэгъыныгъэу зыкIэтхэжьыгъэ­хэм къызэрэди­лъытэрэм тетэу республикэм Iофтхьабзэхэр щызэрахьэх.

«Энергетическэ комплексым хэхъоныгъэ егъэшIыгъэным ишIуагъэ къэкIощт эконо­микэм ылъэныкъокIэ проект­хэр нахь псынкIэу пхырыщыгъэнхэмкIи, цIыф псэупIэ­хэм электричествэр нахь цы­хьэ­шIэгъоу аIэкIэхьанымкIи. ТапэкIэ мы компанием тыригъу­сэу зэкIэми апэу гъэкIэжьыгъэн фэе псэуалъэхэм татегущыIэгъагъ. Гу­хэлъхэу итхъу­хьагъэхэр пхырыщыгъэнхэм пае «Россети Кубань» дытиIэ зэдэлэжьэныгъэм нахь шIогъэ ин къызэритыщтым елъыт­ы­гъэу тиIофхэр лъыдгъэ­кIотэнхэ фае», — къы­Iуагъ Адыгеим и ЛIышъхьэ.

«Россети Кубань» ипащэ иапэрэ гуадзэ къызэгущыIэм къыхигъэщыгъ инфраструктурнэ бюджет кредитхэм амалхэу яIэхэр лъэпкъ проектхэмкIэ къызфэгъэфедэгъэнхэм мэхьанэу иIэр ыкIи чэзыу-чэзыоу ар гъэ­цэкIэгъэн зэрэфаер.

ГущыIэм пае, индустриальнэ паркэу агъэпсырэм МВт 50 фэдиз кIуачIэу иIэщтыр. Мы лъэхъаным ыпшъэкIэ зигугъу къэтшIыгъэ компанием кВ 10 хъурэ распределительнэ сетым епхыгъэ Iоф­тхьабзэхэр зэрехьэх. Рекреационнэ комплексэу «Дахъо гъэхъунэр» зыфи­Iорэм телъытагъэу (кВ 10 фэдиз) рыкIопIэ километри 6 агъэпсыщт.

ЗыгъэпсэфыпIэу «Лэгъонакъэ» иинфраструктурэ телъытагъэу IофшIэнышхо зэшIуахынэу рахъу­хьагъ. Илъэсэу икIыгъэм подстанциехэу «Адыгейскэмрэ» (кВ 110-рэ) «Кужорскэмрэ» (кВ 35-рэ) алъа­гъэIэсырэр нахьыбэ хъугъэ. Джащ фэдэу мы илъэсым ыкIэм ехъулIэу подстанции 6-мэ ягъэ­кIэжьын аухыщт.

«ЗэкIэ пшъэрылъхэр гъэцэкIагъэ, зэзэгъыныгъэу зэдэтшIыгъэхэм ади­штэу Iоф­шIэнхэр зэшIохыгъэ мэхъух. 2023-рэ илъэсым щылэ мазэм и 1-м ехъу­лIэу зэтырагъэ­псыхьажьырэ подстанции 6-мэ яIоф­шIэн рагъэ­жьэщт», — къыхигъэщыгъ Эдгар Армаганян.

А пстэуми яшIуагъэ къэкIощт энергием икъэкIуапIэ цыхьэшIэгъоу щытынымкIэ, республикэм ифэныкъоныгъэхэр нахь игъэкъу­гъэнхэмкIэ. Зэзэгъыныгъэм къы­зэрэдилъытэрэм тетэу илъэсищым къыкIоцI инвестициехэр сомэ миллиарди 4,2-м нэсыщт.

АР-м и ЛIышъхьэ ипресс-къулыкъу