АР-м хэбзэгъэуцугъэхэр амыукъонхэмкIэ и Координационнэ зэIукIэ изэхэсыгъоу Адыгеим и ЛIышъхьэу КъумпIыл Мурат тхьамэтагъор зыщызэрихьагъэр АР-м и Правительствэ зычIэт унэм щыкIуагъ.

Iофыгъо шъхьаIэхэу мыщ зыщатегущыIагъэхэм ащыщых лъэпкъ, федеральнэ проектхэр Адыгэ Республикэм щагъэцакIэхэ зыхъукIэ къолъхьэ тын-Iыхын нэшанэ зиIэ хэбзэукъоныгъэхэр амышIынхэр, ащ фэдэ хэбзэукъоныгъэхэм ягъогупэ пыбзыкIыгъэныр.

АР-м и ЛIышъхьэрэ АР-м иминистрэхэм я Кабинетрэ я Администрацие ипащэ игуадзэу Хъоткъо Саниет зэхэсыгъом къызэрэщиIуагъэмкIэ, хэбзэ къулыкъухэмрэ уплъэкIунхэм афэгъэзэгъэ къулыкъухэмрэ зэпхыныгъэ пытэ зэдыряIэу зэдэлажьэх. Хэбзэукъоныгъэхэр нахь макIэ зэрэхъурэр, подряднэ организациехэм ахэр нахьыбэу зэрашIырэр ащ къыхигъэщыгъ. Хэукъоныгъэу къыхагъэщыхэрэр зэхафых, ахэр дэгъэзыжьыгъэнхэм пае пшъэдэкIыжь зыхьыхэрэм ахэмкIэ макъэ арагъэIу.

Республикэм и ЛIышъхьэ пшъэрылъ афишIыгъ мы лъэныкъомкIэ IофшIэныр агъэлъэшынэу, лъэпкъ проектхэмрэ федеральнэ программэхэмрэ ягъэцэкIэнкIэ пшъэдэкIыжь зыхьыхэрэм яIэпэIэсэныгъэ зыкъырагъэIэтынэу.

Джащ фэдэу мы IофыгъомкIэ къэгущыIагъ Федеральнэ казначействэм АР-мкIэ и ГъэIорышIапIэ ипащэу Жэнэ Мурат. Сомэ миллиард 15,5-рэ фэдиз хъурэ федеральнэ субсидиехэр, субвенциехэр ыкIи нэмыкI бюджет трансфертхэр 2022-рэ илъэсым республикэ бюджетым къыфыхэгъэкIыгъэнхэр къызыщыдэлъытэгъэ зэзэгъыныгъэу, шэпхъэ правовой актэу 121-рэ мыгъэ ГъэIорышIапIэм къыдилъытагъ. Ахэм ащыщэу сомэ миллиарди 10 зытефэрэ зэзэгъыныгъэхэр зэрагъэцакIэхэрэм лъыплъэнхэу рахъухьагъ. Федеральнэ бюджетым къыхагъэкIыгъэ мылъкур зэрагъэфедэрэмкIэ уплъэкIун 12 мэзэ 11-м къыкIоцI ГъэIорышIапIэм зэхищагъ.

НыбжьыкIэхэр экстремизмэм хамыщэнхэмкIэ Iофэу ашIэрэм зэхэсыгъом щытегущыIагъэх. АР-м гъэсэныгъэмрэ шIэныгъэм­рэкIэ иминистрэ ипшъэрылъхэр зыгъэцакIэу Евгений Лебедевымрэ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэп­хыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэррэ ащ фэгъэхьыгъэу къэгущыIагъэх.

ГущыIэм пае, кIэлэцIыкIу­хэмрэ ныбжьыкIэхэмрэ терроризмэм хамыщэнхэм атегъэ­псыхьэгъэ форумхэр, зэнэкъо­къухэр, гъэсэныгъэ, культурэ мэхьанэ зиIэ Iофтхьабзэхэр АР-м гъэсэныгъэмрэ шIэны­гъэмрэкIэ и Министерствэ зэ­хещэх. ГуфакIохэм ягъусэхэу хабзэу щыIэхэр зыукъорэ интернет нэкIубгъохэр къыхагъэщых.

Комитетым лекциехэр, социальнэ уплъэкIунхэр зэхещэх, мысатыу общественнэ организациехэм пхыращырэ проектхэм грант IэпыIэгъу ягъэгъотыгъэным тегъэпсыхьэгъэ амалхэр зэрехьэх. Адыгэ Республикэм иобщественнэ, идин организациехэр, иныбжьыкIэ объединениехэр мэхьанэшхо зиIэ Iоф­тхьабзэу зэрахьэхэрэм ахэла­жьэх.

ЦIыфхэм ренэу Iоф адашIэ: электрон, хаутырэ СМИ-хэм илъэсыр къызихьагъэм щегъэ­жьагъэу тематическэ материал 400-м ехъу къагъэхьазырыгъ. Фэтэрыбэу зэхэт унэхэм игъэ­кIотыгъэ гъэцэкIэжьынхэр ара­шIылIэхэ, зэхэкъутэнкIэ щынагъоу щыт унэхэм цIыфхэр къа­чIащыжь зыхъукIэ хэбзэгъэу­цугъэхэр аукъохэ зэрэмыхъущтыр зэхэсыгъом къыщаIуагъ.

Джащ фэдэу зэхэсыгъом къыщыгущыIагъэх АР-м псэолъэ­шIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэ иапэ­рэ гуадзэу Лафышъ Рэмэзанрэ АР-м унэхэр, псэуалъэхэр зэрагъэпсыхэрэм, псэупIэ фондыр зэрагъэфедэрэм гъунэ алъызыфырэ икъэралыгъо инспекциехэм я ГъэIорышIапIэ ипащэ игуадзэу Илона Кравцовамрэ. Хэукъоныгъэхэр амышIэу къэралыгъо программэхэр респуб­ликэм зэрэщагъэцакIэхэрэр ахэм хагъэунэфыкIыгъ.

Зэхэсыгъом къыщыгущыIагъэ­хэм къаIуагъэхэм къатегущыIэзэ, фэтэрыбэу зэхэт унэхэм ачIэсхэр унашъохэм яштэн къы­зэрэхагъэлэжьэн, ахэм яшIошIхэр къыдалъытэн зэрэфаер республикэм ипащэ къыхигъэщыгъ.

«Тэ тшIэрэр зэкIэ цIыфхэм афэгъэхьыгъ, тиIофшIэнкIэ ана­хьэу тызыпылъын фаер ахэм ящыIэкIэ-псэукIэ зыкъегъэIэтыгъэныр ары», — къыIуагъ АР-м и ЛIышъхьэ.

Фэтэрыбэу зэхэт унэхэм ягъэ­цэкIэжьынкIэ тхылъхэу цIыфым ифитыныгъэхэмкIэ Уполномоченнэу АР-м щыIэм къыфагъэ­хьыгъэхэми зэхэсыгъом щахэплъагъэх. КъумпIыл Мурат ведомствэ гъэнэфагъэхэмрэ рес­публикэм ипрокуратурэрэ пшъэ­рылъ афишIыгъ зэгъусэхэу къа­Iэтыгъэ Iофыгъохэм адэлэжьэнхэу.

АР-м и ЛIышъхьэ ипресс-къулыкъу