«Единэ Россием» и НыбжьыкIэ Гвардие» ипащэу Антон Демидовым къызэриIуагъэмкIэ, мы организацием ыкIи «Волонтерхэм я Ротэ» хэтхэу нэбгырэ 30 къалэхэу Мариупольрэ Мелитопольрэ джырэблагъэ кIуагъэх. Ар я 24-рэ купэу мэхъу.

— Джы кIуагъэхэм ахэтых спортымкIэ мастер хъунымкIэ кандидатэу, кикбоксингымкIэ Урысые зэнэкъокъухэм текIоныгъэр мызэу, мытIоу къащыдэзыхыгъэ Тимофей Широковыр, футболымкIэ Европэм ичемпион хъугъэу Иван Масаловыр, самбэмкIэ мастер хъунымкIэ кандидатэу Анатолий Лукашевыр, «Кудо» зыфаIорэ бэнакIэмкIэ мастер хъунымкIэ кандидатэу Никита Литвяк, — къыIуагъ Антон Демидовым.

Волонтерхэм спорт псэуалъэхэр зыдащагъэх, кIэлэцIыкIухэм зэнэкъокъу зэфэшъхьафхэр афызэхащэщтых. Джащ фэдэу шIушIэ IэпыIэгъум изэбгырыщын лъагъэкIотэщт, сымэджэщым Iоф ща­шIэщт, ИлъэсыкIэ мэфэкIым ипэгъокIэу Донбасс икIэлэцIыкIухэм шIухьафтынхэр афашIыщтых.

— «НыбжьыкIэ Гвардием» хэтхэм зэкIэми тызэдеIэзэ шIушIэ IэпыIэгъур къэтэугъои. ИлъэсыкIэм ипэгъокIэу «Единэ Россием» зэхищэгъэ Iофтхьабзэу «ИлъэсыкIэ почтэр» зыфиIорэм тыхэлэжьэщт. КIэлэеджакIохэр тигъусэхэу тиухъумакIохэм апае открыткэхэр дгъэхьазырыщтых, ахэр афэттIупщыщтых. Ащ къыхэлэжьэнэу фаехэм зэкIэми яIэшIагъэхэр партием и Общественнэ приемнэ къырахьылIэнхэ алъэкIыщт, — къыIуагъ Адыгеим и «НыбжьыкIэ Гвардие» ипащэу, Мыекъуапэ идепутатхэм ащыщэу Бэрзэдж Асыет.

Шъугу къэдгъэкIыжьын, гъэтхапэм и 30-м къыщыублагъэу «Единэ Россием» и НыбжьыкIэ Гвардие» ыкIи «Волонтерхэм я Ротэ» хэтхэр Донецкэ Народнэ Республикэм щыIэх. Волонтерхэр мы чIыпIэхэм Iоф зэращашIэщтым зыщыфагъэсэхэрэ Гупчэ къыщызэIуахыгъ.

Мы уахътэм купэу щыIэм хэтхэм «Единэ Россием» ишIушIэ Гупчэу Мариупольрэ Мелитопольрэ адэтхэм Iоф ащашIэ, Луганскэ Народнэ Республикэм икъалэу Краснодон щыпсэухэрэм адеIэх, Джанкойрэ Армянскэмрэ ащыIэхэр дзэкIолIхэм IэпыIэгъу афэхъух.

Джащ фэдэу «НыбжьыкIэ Гвардием» ыкIи «Волонтерхэм я Ротэ» ахэтхэм ащыщхэр хэушъхьафыкIыгъэ дзэ операцием хэтхэу Донбасс къаухъумэ. БлэкIыгъэ шэкIогъу мазэм купитIу ащ кIуагъэ.