УФ-м ПенсиехэмкIэ ифонд иин­тернет нэкIубгъо къихьащт 2023-рэ илъэ­сым ищылэ мазэ и 1-м зиIофшIэн езыгъэжьэщт Социальнэ фондым иедзыгъо ит хъугъэ.

ПенсиехэмкIэ ыкIи Социальнэ страхо­ваниемкIэ фондхэр зэрэзэхагъэхьажьыгъэхэм къэралыгъом къытырэ IэпыIэгъу пстэур нахь гъэпсыгъошIу къышIыщт. Ащ ишIуагъэкIэ, федеральнэ ахъщэ тынхэр зэкIэ «зы шъхьаныгъупчъэ» шIыкIэм тетэу цIыфхэм къызIэкIагъэхьанхэ алъэ­кIыщт. ФондитIум ахъщэ тынэу, фэIо-фа­шIэу агъэпсыщтыгъэхэр, нэмыкI пшъэ­рылъэу яIагъэхэр мы къулыкъум фэгъэзэжьыгъэ мэхъу.

Джащ фэдэу Социальнэ фондым бизнесым административнэ Iофэу тегъэуа­гъэр нахь макIэ къышIыщт, къэралыгъо социальнэ страхованием къыхиубытэрэ цIыф купхэм япчъагъэ хигъэхъощт. ЦIыфхэм электроннэ фэIо-фашIэу афагъэцакIэрэр нахьыбэ хъущт, кIэлэцIыкIу зэрыс унагъохэм, сабый ежэрэ бзылъфыгъэхэм зыкI ахъщэ тын мазэ къэс къафэкIощт, ащ дакIоу страхование зышIыхэрэм нэмыкI шIыкIэм тетэу отчетхэр агъэхьазырынхэу хъущт.

2023-рэ илъэсым ищылэ мазэ и 1-м щыублагъэу Адыгеим икъалэхэмрэ ирайонхэмрэ ащыпсэухэрэр Социальнэ фондым зыщыригъэблэгъэщтхэр:

1. Къалэу Мыекъуапэ, урамэу Пио­нерскэр, 414-рэ, урамэу Жуковскэр, 49-рэ. 2. Станицэу Джаджэр, урамэу Кооперативнэр, 29-рэ. 3. Къуаджэу Кощхьабл, урамэу Джа­рымэм ыцIэ зыхьырэр, 3. 4. Селоу Красногвардейскэр, урамэу Лениным ыцIэ зыхьырэр, 109 «А». 5. Поселкэу Тульскэр, урамэу Первомайскэр, 161-рэ. 6. Къуаджэу Тэхъутэмыкъуай, ура­мэу Шъэумэным ыцIэкIэ щытыр, 8. 7. Къуаджэу Пэнэжьыкъуай, урамэу Октябрьскэр, 29-рэ. 8. Къуаджэу Хьакурынэхьабл, ура­мэу Краснооктябрьскэр, 106-рэ. 9. Адыгэкъал, проспектэу Лениным ыцIэ зыхьырэр, 31-рэ «А».

Мы офисхэм ащыщхэм яIофшIэн шэпхъакIэхэм атетэу рагъэжьэгъакI ныIэп, IофшIэныр зэрэзэхэщэгъэщтыр ­ауплъэкIу пIоми хъущт. Пенсионерхэм, кIэлэцIыкIу зэрыс унагъохэм, сэкъат­ныгъэ зиIэхэм ежьхэмкIэ нахь Iэрыфэгъу хъурэ офисым е МФЦ-м зыфагъазэмэ хъущт.

УФ-м ПенсиехэмкIэ ифонд и Правление итхьаматэ иIэнатIэ зыгъэцэкIэрэ Сергей Чирковым фондитIур зэрэзэхагъэхьажьыгъэм ахъщэ тынхэм ягъэ­псы­кIи, фэIо-фашIэхэм ягъэцэкIэнкIи шIогъэшхо къызэритыщтыр къыхигъэщыгъ.

— ПенсиехэмкIэ фондыр илъэс 30-у зыщыIэм зэхъокIыныгъабэ фэхъугъ. Пенсиехэм ятын нэмыкI пшъэрылъ зимыIэгъэ организациер цIыфым къызы­хъугъэм къыщыублагъэу дунаим тетыфэкIэ IэпыIэгъу езытырэ социальнэ институтышхо хъугъэ. ПФР-мрэ ФСС-мрэ зэрэзэхагъэхьажьыгъэхэр игъо дэдэу ыкIи цIыфхэм лъэшэу ящыкIагъэу щыт, — къыIуагъ ащ.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.