Бюджет чIыпIэхэм ахагъэхъуагъ
Медицинэ IофышIэхэр икъу фэдизэу Адыгеим зэримыIэхэр къыдалъытэзэ, ар дэгъэзыжьыгъэным епхыгъэ Iофтхьэбзэ зэфэшъхьафхэр республикэм щызэшIуахых.
ГущыIэм пае, 2022 — 2023-рэ илъэсхэм Мыекъопэ медицинэ колледжым щеджэн амал зиIэщтхэм процент 30 ахагъэхъуагъ, ар нэбгырэ 200-м нэсыгъ. ИлъэсыкIэ еджэгъум нэбгырэ 240-м нагъэсын гухэлъ яI. Ащ дакIоу бюджет чIыпIэу аратырэми хагъэхъуагъ.
Медицинэ сэнэхьатым ныбжьыкIэхэр хэщэгъэнхэм, чанэу Iоф ашIэным фэшI программэ зэфэшъхьафхэр республикэм щызэхащэх. Ахэм ащыщ къоджэ псэупIэхэм Iоф ащызышIэхэрэм апае «Земский доктор» ыкIи «Земский фельдшер» зыфаIохэрэр. АР-м псауныгъэр къэухъумэгъэнымкIэ и Министерствэ къызэрэщаIуагъэмкIэ, мы программэхэм яшIуагъэкIэ врач 456-мэ ыкIи гурыт медицинэ IофышIэ 64-мэ ахъщэ IэпыIэгъухэр аратыгъэх. 2022-рэ илъэсыр пштэмэ, врач 26-рэ ыкIи медицинэ IофышIэ 12-рэ программэм хэфагъэх.