Херсонрэ Херсон хэкумрэ къэзыбгынэхи зы­шъхьэ къезыхьыжьэжьыгъэ цIыфхэм IэпыIэ­гъоу аратырэм фэгъэхьыгъэ зэIукIэ АР-м и Правительствэ зычIэт унэм щыкIуагъ.

Адыгэ Республикэм и Премьер-министрэ ипшъэрылъхэр зыгъэцэкIэрэ КIэрэщэ Анзаур Iофтхьабзэр зэрищагъ. Ащ хэлэжьагъ Урысыем псэолъэшIынымкIэ ыкIи псэупIэ-коммунальнэ хъызмэтымкIэ иминистрэ игуадзэу Алексей Ересько.

Джащ фэдэу Iофтхьабзэм щыIагъэх республикэм иминис­терствэ ыкIи иведомствэ заулэхэм япащэхэр, Урысыем псэолъэшIынымкIэ и Министерствэ иподразделениехэм яIэшъхьэтетхэр.

ЗэIукIэр къызэIуихызэ Алексей Ересько къыхигъэщыгъ зышъхьэ къизыхыжьыгъэхэм япхыгъэ Iофтхьабзэхэм язэхэщэнкIэ Адыгеим ипащэхэм зэрахьэгъэ Iофыгъохэм апае зэрафэразэр.

«Хэгъэгум и Президент къыгъэуцугъэ пшъэрылъышхоу ар щыт. Iофэу зэшIошъухыгъэм икIэуххэр непэ шъулъэгъугъэ цIыфхэм анэгу къыкIэщы. Къиныбэ зыпэкIэкIыгъэхэм анэхэм гушIуагъоу къакIэщырэр зэрэтлъэгъугъэр тигуапэ, джащ фэдэу тигуапэ шъуиреспубликэ къинэнхэу ахэр зэрэфаехэр. Ащ къи­кIырэр зэкIэ дэгъоу, дэгъуми шIокIэу зэрэжъугъэцэкIагъэр ары. А IофшIэным пае сызэ­рэ­шъуфэразэр къыхэсэгъэщы. Iофэу ублагъэ хъугъэр тэрэзэу ыкIэм нэгъэсыгъэн фае: зычIэ­сыщт унэхэр яIэ хъунымкIэ IэпыIэгъу ятыгъэныр, джащ фэдэу IофшIапIэхэм аIухьанхэмкIэ шъуишIуагъэ яжъугъэкIыныр. Сицыхьэ телъ ахэм республикэм ыкIи зэрэхэгъэгоу федэ къызэрафахьыщтым», — къыIуагъ УФ-м псэолъэшIынымкIэ ыкIи псэупIэ-коммунальнэ хъызмэтымкIэ иминистрэ игуадзэ.

КIэрэщэ Анзаур ренэу рес­публикэм ишIуагъэ къызэрэ­ригъэкIырэм ыкIи ынаIэ къызэрэтыригъэтырэм апае федеральнэ министерствэм зэрэ­фэразэр къыIуагъ. Зэдэлэжьэныгъэ дэгъу зэрэзэдыряIэм ишIуагъэкIэ Адыгеим псэолъэшIыным зыщеушъомбгъу, гъогу­хэм язытет нахьышIу мэхъу.

НепэкIэ анахь зигъо пшъэ­рылъхэм зыкIэ ащыщ егъэзыгъэ IофкIэ Херсонрэ Херсон хэкум­рэ къэзыбгынэхи Адыгеим зы­къэзыгъэзэжьыгъэхэм IэпыIэгъу ятыгъэныр. Ащ фэдэу Адыгеим непэкIэ нэбгырэ 521-рэ къэ­кощыгъ. ПIэлъэ гъэнэфагъэкIэ пункти 4-мэ ахэр атырагоща­гъэх, псэунхэмкIэ ящыкIэгъэ амалхэр къыдалъытагъэх.

«НепэкIэ Адыгеим къэкощыгъэ апэрэ нэбгырэ 32-мэ унэ сертификатхэр аратыжьыгъэх. Мы охътэ благъэхэм а IофшIэныр ыкIэм нэдгъэсыщт зигугъу къэпшIыгъэ щыкIагъэхэр къыдэтлъытэхэзэ. Тэ тицIыфхэм афэдэу ахэм тафыщыт, Iофыгъохэу зэутэлIагъэхэри зы­фэдэхэр къыдгурэIо. Арышъ, Урысыем и Президент, рес­публикэм и ЛIышъхьэ къагъэуцугъэ пшъэрылъхэр, Iо хэлъэп, дгъэцэкIэщтых», — къыIуагъ КIэрэщэ Анзаур.

ХэгъэунэфыкIыгъэн фае зы­шъхьэ къезыхьыжьэжьыгъэхэм документхэм ягъэпсынкIэ IэпыIэгъу гъэнэфагъэ зэраратырэр: ахэм урысые паспортхэр, СНИЛС-хэр, банк картэхэм апае лицевой счетхэр, сим-картэхэр аIэкIагъахьэх. Джащ фэдэу унагъом щагъэфедэщт IапIэхэм апае зэтыгъо ахъщэ IэпыIэгъурэ унэ сертификатхэмрэ аратых.

Херсонрэ Херсон хэкумрэ къарыкIыгъэхэу пIэлъэ гъэнэфагъэкIэ пунктхэм ачIэсхэм апае зэтыгъо республикэ ахъщэ IэпыIэгъу – унагъом исым пэпчъ сомэ мин 20 аратынэу щыт, нэбгырэ 477-мэ ар аратыгъах. Джащ фэдэу Урысыем и Президент унашъоу ышIыгъэм къы­зэрэдилъытэрэм тетэу Донбассрэ Украинэмрэ зышъхьэ къизыхыжьыгъэхэм республикэм ахъщэ щараты.

Адыгеим исхэр мы IофшIэным чанэу къыхэлажьэх. Зы­шъхьэ къезыхьыжьэжьыгъэхэм гъомылапхъэхэмкIэ, щыгъынхэмкIэ, цIыфым нахь ищыкIэгъэ пкъыгъо зэфэшъхьафхэмкIэ Iэ­пыIэгъу араты.

АР-м и ЛIышъхьэ ипресс-къулыкъу