Урысыем псэолъэ­шIынымкIэ ыкIи псэу­пIэ-коммунальнэ хъызмэтымкIэ ими­нистрэ игуадзэу Алексей Ересько базэу «Турист» зыфиIорэм ичIыпIэу цIыфхэр пIэлъэ гъэнэфагъэкIэ къызэуа­лIэхэрэм щыIагъ.

Херсон хэкум щыщхэу егъэзыгъэ IофкIэ зичIыгу къэзыбгы­нэн фаеу хъугъэхэм унэ сертификатхэр ятыгъэнхэм тегъэ­псыхьэгъэ Iофтхьабзэр мыщ щыкIуагъ. Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу АР-м и Премьер-министрэ ипшъэрылъхэр зыгъэцакIэу КIэрэщэ Анзаур ар зэрищагъ.

Херсон хэкум къикIыгъэ нэ­бгырэ 500-м ехъу Адыгэ Рес­публикэм щэпсэу. Ахэм ащыщы­бэмэ Урысыем игражданствэ къаIахынэу, Адыгеим къинэ­жьынхэу рахъухьагъ. Документхэм ягъэхьазырынкIэ ахэм IэпыIэгъу афэхъух. ГущыIэм пае, къэралыгъо сертификатыр къаратыным зыщыкIэлъэIухэрэ тхылъ 242-рэ МФЦ-м къыIу­кIагъ. Тхылъи 166-мэ джыдэдэм ахэплъэ. Сомэ миллион 94,3-рэ зытефэрэ сертификат 32-рэ къаратыжьынэу агъэхьазырыгъ. «Туристым» ичIыпIэу цIыфхэр пIэлъэ гъэнэфагъэкIэ къызэуа­лIэхэрэм ачIэс нэбгырэ 15-мэ тыгъуасэ сертификатхэр къаратыгъэх.

«Урысыем и Президентэу Владимир Путиным хэгъэгум и Правительстви шъолъырхэми пшъэрылъ афишIыгъ заохэр зыщыкIорэ чIыпIэ анахь щынагъохэм къаращыгъэхэм Iэпы­Iэгъу арагъэгъотынэу. Шъыпкъэ, нэмыкI чIыпIэ уищыIэныгъэ икIэрыкIэу щызэтебгъэуцожьыныр къызэрыкIоп. Ау тэ гум шъуитынэщтэп. IэпыIэгъу ты­къы­шъуфэхъущт, — къыIуагъ КIэрэщэ Анзаур. — Серти­фикат къызэратырэм зыщыфэе чIыпIэм щыпсэунэу къыхи­хын ылъэкIыщт. Ау сэ сызфэя­гъэр шъуищыIэныгъэ Адыгеим ешъупхынэу, тиреспубликэ ятIонэрэ чIыпIэ гупсэ шъуфэхъунэу ары».

Алексей Ересько Херсон хэкум щыщ­хэу Адыгеим къэкощыжьыгъэхэм сертификатхэр зэраратыгъэмкIэ афэгу­шIуагъ, чIыпIакIэм дэгъоу зыщызэты­рагъэпсыхьанэу афэлъэIуагъ, яIофыгъо­хэм язэшIохынкIэ федеральнэ гупчэр тапэкIи IэпыIэгъу къызэрафэхъущтыр ариIуагъ.

«УшэтыпIабэ зэпышъучын фаеу зэ­рэ­хъугъэм, шъуиIофхэр джыдэдэм къызэрыкIоу зэрэщымытхэм тащыгъуаз. Щы­IэкIакIэ шъуиIэнымкIэ псэупIэ серти­фикатхэм яшIуагъэ къэкIонэу сэгугъэ.

Хер­сон хэкум къикIыжьыгъэхэм IэпыIэгъу ягъэгъотыгъэнымкIэ Адыгеим Iоф­хэр дэгъоу зэрэщызэхэщагъэхэр сигуап. Непэрэ хъугъэ-шIагъэм къегъэлъагъо Урысыем и Президенти, УФ-м и Прави­тельстви пшъэрылъэу къафашIыгъэхэр зэрагъэцакIэхэрэр. Тэ зи гум зэритымы­нэрэр шъушIошъ жъугъэхъун шъулъэ­кIыщт!» — къыIуагъ Алексей Ересько.

Херсон хэкум щыщхэу Адыгеим къэкощыжьыгъэхэм заIокIэм ахэм IэпыIэгъу зэрафэхъущтхэм япхыгъэ Iофыгъохэм ыкIи нэмыкIхэм атегущыIагъэх. НахьыбэрэмкIэ ахэр зыфэгъэхьыгъагъэхэр Урысыем ипаспортхэр афэгъэхьазырыгъэнхэр, медицинэ IэпыIэгъу цIыфхэм ягъэгъотыгъэныр, апшъэрэ классхэм кIэлэеджакIохэр ащегъэджэгъэнхэр ­ары. КIэрэщэ Анзаур АР-м псауныгъэр къэухъумэгъэнымкIэ и Министерствэ пшъэрылъ фишIыгъ пIэлъэ гъэнэфагъэкIэ цIыфхэр къызэолIэрэ чIыпIэхэм специалистхэр къыригъэблэгъэнхэу, АР-м гъэсэныгъэмрэ шIэныгъэмрэкIэ и Министерствэ пшъэрылъ фишIыгъ кIэлэ­цIыкIу пстэуми илъэсыкIэ шIухьафтынхэр афашIынэу, Херсон хэкум къи­кIыжьыгъэ кIэлэеджакIохэм еджапIэр къызэраухырэ ушэтынхэр атынхэмкIэ ыкIи ахэр апшъэрэ еджапIэхэм ачIэхьанхэмкIэ фэгъэкIотэныгъэхэр афашIынхэу. Джащ фэдэу пIэлъэ гъэнэфагъэкIэ цIыфхэр къызэолIэрэ чIыпIэхэм кIохэзэ, тхьамафэ къэс яIофыгъохэм заща­гъэгъозэнэу.