УФ-м псэолъэшIынымкIэ ыкIи псэупIэ-коммунальнэ хъызмэтымкIэ иминистрэ игуа­дзэу Алексей Ересько Адыгеим къызэкIом зыдэщы­Iагъэхэм ащыщ лъэныкъо зэ­фэшъхьафхэмкIэ къэралыгъо ыкIи муниципальнэ фэIо-фашIэхэр цIыфхэм афэзы­гъэцакIэрэ Гупчэу Мыекъуапэ иурамэу Краснооктябрьскэм тетыр.

Херсон хэкум къикIыгъэхэу Адыгеир псэупIэкIэ къыхэзыхыгъэхэм яфэIо-фашIэхэр зэра­фагъэцакIэхэрэр ары анахьэу федеральнэ пащэр къызкIэупчIагъэр. Къэралыгъо учреждениеу «Лъэныкъо зэфэшъхьафхэмкIэ къэралыгъо ыкIи муниципальнэ фэIо-фашIэхэр цIыфхэм афэзыгъэцакIэрэ Гупчэм» ипащэу Елена Юрченкэм къызэриIуагъэмкIэ, Херсон хэкум къи­кIыжьыгъэхэм псэупIэ сертификатыр агъэпсыным пае лъэIу тхылъ 246-рэ къатыгъ, 209-р МФЦ-м испециалистхэр кIохэзэ мы уахътэм ахэр зыщыпсэу­хэрэм къыщаIахыгъ. Непэрэ мафэм ехъулIэу сертификатхэр къаратыным фагъэхьазырыгъэр 32-рэ мэхъу.

Ащ нэмыкIэу автомашинэ псынкIэмкIэ пассажирхэр зэ­ращэнхэу фитыныгъэ къэзытырэ тхылъхэм ягъэпсынкIэ АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Ми­нистерствэ IэпыIэгъу афэхъу. Ащ епхыгъэ фэIо-фашIэхэри МФЦ-м агъэцакIэх. ЛъэIу тхылъи 164-рэ зэкIэмкIи къатыгъ, мы уахътэм лицензиеу афагъэпсыгъэр 156-рэ мэхъу.

Джащ фэдэу унагъом анахьэу ищыкIагъэхэр къыращэфынхэм пае, зэтыгъо ахъщэ тынэу сомэ мини 100 къаIэкIэхьаным игъэ­псынкIэ АР-м IофшIэнымкIэ ыкIи социальнэ хэхъоныгъэмкIэ и Министерствэ адеIэ. Ари МФЦ-м афегъэпсы. Унэгъо 27-мэ лъэIу тхылъхэр къатыгъэх, ахэм нэ­бгырэ 29-рэ арыс. Тхылъхэм ащыщэу 8-р зыщыпсэухэрэм къащаIахыгъ.

Лъэныкъо пстэумкIи игъом ыкIи икъоу IэпыIэгъур арагъэгъо­тыным ыуж зэритхэр, ведомствэ ыкIи къулыкъу пстэур ащ къызэрэхагъэлажьэрэр къы­хигъэ­щыгъ КIэрэщэ Анзаур.

ХЪУТ Нэфсэт.