Хэгъэгум ыкъо кIасэхэр
Уиурам, уиунэ, уикъуадж, уикъалэ, уихэку ыкIи зэкIэ Хэгъэгушхор, уцIыф шъыпкъэ зафэмэ, уилъэпIэнхэ, уикIэсэнхэ ыкIи сыдигъуи зэрэуухъумэщтхэм упылъын фае.
Советскэ народым ишIулъэгъу-гукIэгъу анахьэу къызыщылъэгъуагъэр Хэгъэгу зэошхор ары. Непи гумэкIыгъохэр къэтэджых ыкIи хэгъэгум ыкъо кIасэхэм ар гум ранэрэп, жъалымыгъэ гукIодыгъом зэрэщаухъумэщтым ахэр яшъыпкъэу пылъых.
Мы мафэхэм Адыгэ Республикэм и Лъэпкъ тхылъеджапIэ Хэгъэгум илIыхъужъхэм я Мафэ фэгъэхьыгъэ къэгъэлъэгъон къыщызэIуахыгъ. Мы мэфэкIыр тыгъэгъазэм и 9-м, 2007-рэ илъэсым къыщыублагъэу Урысыем щыхагъэунэфыкIы. Мы мафэм, шэкIогъум и 26-м (тыгъэгъазэм и 9-м), 1769-рэ илъэсым я II-рэ Екатеринэ иунашъокIэ «Статусы военного ордена Великомученика и Победоносца Георгия» зыфиIохэрэр ыгъэнэфэгъагъэх. Мы орденыр зэуапIэм лIыхъужъныгъэрэ лIыгъэрэ щызезыхьагъэхэм афагъэшъуашэщтыгъ.
Гъэтхапэм и 20-м, 1992-рэ илъэсым УФ-м и Президент Законэу «Об установлении звания Героя Российской Федерации и утверждения знака особого отличия — медали «Золотая звезда» зыфиIорэм кIэтхэгъагъ. Ащ къыщыублагъэу мы щытхъуцIэр Урысые Федерацием щыпсэурэ нэбгырэ миным нахьыбэм арапэсыгъ.
МэфэкI къэгъэлъэгъонэу «Отечества верные сыны» зыфиIорэр Лъэпкъ тхылъеджаIэм ифонд къыхэхыгъэ тхылъхэмкIэ ыкIи журналхэмкIэ зэлъыпкIагъ, ахэм тарихъ хъугъэ-шIагъэхэри, ахэм ахэтыгъэ лIыхъужъ псэемыблэжьхэми яшIушIагъэ къащыIотагъ. Урысыдзэм ишэпхъэ-хабзэхэри, ахэр лIэужхэм зэрарагъашIэхэрэри, апшъэрэ дзэ наградэхэм УрысыемкIэ ятарихъ гъэшIэгъони, ахэр къэзылэжьыгъэхэри мыщ щыолъэгъух. Ахэр Хэгъэгу зэошхом илIыхъужъхэр ыкIи тичIыпIэгъухэу щытхъуцIэ лъагэр къызэрапэсыгъэхэр ары.
Къэгъэлъэгъоным щыгъэфедагъэх материалхэу советскэ дзэкIолIхэм Афганистан дзэ пшъэрылъ иныр зэрэщызэшIуахыгъэр къызыщыIотагъэхэр. ХэушъхьафыкIыгъэ дзэ операциеу мы уахътэм Донбасс щыкIорэм тидзэкIолIхэм лIыхъужъныгъэ зэрэщызэрахьэрэр тхыгъэхэм ащыкIэгъэтхъыгъ ыкIи хэхыгъэ чIыпIэ щыряI.
Лъэпкъэу зилIыхъужъхэм осэшIу афэзышIырэр анахь лъэпкъ инэу, лъагэу зэрэщытыр зэфэдэкIэ тхылъ къэгъэлъэгъоным щыкIэгъэтхъыгъ. ТхьамэфитIум къыкIоцI ащ шIоигъоныгъэ зиIэхэм зыфагъэнэIосэн алъэкIыщт.
Дзэукъожь Нуриет.