Адыгеим икIыгъэу мы уахътэм хэушъхьафыкIыгъэ дзэ операцием хэлажьэхэрэм Гъонэжьыкъо Руслъан ащыщ.

Руслъан 1999-рэ илъэсым Мыекъуапэ къыщыхъугъ, гурыт еджапIэу N 3-м щеджагъ. Нэужым Мыекъопэ къэралыгъо гуманитарнэ колледжэу N 79-р къыухи, дзэм къулыкъур щихьыгъ. Зэзэгъыныгъэм кIатхи, къулыкъушIэныр зыпидзэ­жьыгъэр мэзэ заулэ хъугъэу хэушъхьафыкIыгъэ дзэ операцием ар хэфагъ.

Хэгъэгум ыпашъхьэкIэ пшъэдэкIыжьэу иIэр кIэлэ ныбжьыкIэм дэгъоу ешIэ. ИцIыкIугъом къыщегъэжьагъэу щысэтехыпIэу ятэу Аскэр иI. Ар хэбзэухъумэ­кIо къулыкъухэм илъэс пчъагъэ хъугъэу ахэт ыкIи плIэгъогогъо Чэчэным щыкIогъэ зэо-зэпэуцужьым хэлэжьагъ.

ХэушъхьафыкIыгъэ дзэ операцием Руслъан зыщыIэ мафэ горэм кIэлэ купэу зыхэтыр топхэмкIэ къызэорэ чIыпIэм итхэу хъугъэ. Зэрысыгъэхэ унэм зыкъы­щызыштэгъэ мэшIошхом къыхэмыкIы­жьышъущтыгъэ нэбгырэ пчъагъэ Рус­лъан къырихыжьыгъ. Ежь уIэгъэ ыкIи шъобж хьылъэхэр тещагъэхэу мэзэ пчъагъэрэ госпиталым щеIэзагъэх. КIэлэ ныбжьыкIэм псэемыблэжь зекIуакIэу къыхэфагъэм фэшI орденэу «За Отвагу» зыфиIорэр къыфагъэшъошагъ.

Руслъан ипсауныгъэ зыпкъ зырагъэу­цожьым, игъусэхэм зыкъыщаримыгъанэу къулыкъум пидзэжьыгъ.

ДзэкIолIэу хэушъхьафыкIыгъэ дзэ операцием хэлажьэхэрэм зэкIэми псаоу, дахэу ягупсэхэм Тхьэм къафихьыжьынхэу тафэлъаIо!

ЛIыхъужъэу непэ зыцIэ къепIонэу, шъхьэкIафэ зыфэпшIын плъэкIынэу тиIэр макIэп. Зидунай зыхъожьыгъэхэм яшIэжь дгъэлъэпIэным, псаоу къытхэтхэм ящысэкIэ тыпсэуным мэхьанэшхо иI.

Мы мафэр зыфэгъэхьыгъэ пстэуми тигуапэу тафэгушIо, псауныгъэ пытэ яIэнэу, шIоу, дэгъоу щыIэр къадэхъунэу тафэлъаIо. Iэшъынэ Сусан.