Лъэпкъ ыкIи дин зэфыщытыкIэхэм, джащ фэдэу терро­ризмэм ыкIи экстремизмэм апэуцужьыгъэным ылъэныкъо­кIэ Урысыем и къыблэ ыкIи Темыр-Кавказ федеральнэ шъо­лъырхэр къэралыгъо-конфессиональнэ зэпхыныгъэ азы­фагу илъэу зэдэлэжьэнхэм фытегъэпсы­хьэ­гъэ егъэджэн семинар Мыекъуапэ щыкIуагъ.

Iофтхьабзэм кIэщакIо фэхъугъэх Адыгэ Респуб­ликэм лъэпкъ IофхэмкIэ, IэкIыб къэралхэм ащы­псэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитетрэ Адыгэ Республикэм ыкIи Пшызэ шъолъыр ащыпсэу­рэ быслъымэнхэм я ДиндэлэжьапIэрэ.

Iофтхьабзэр зэрищагъ Комитетым ипащэу Шъхьэ­лэхъо Аскэр.

Семинарым къекIолIагъэхэм шIуфэс гущыIэкIэ закъыфигъэзагъ муфтиеу Къэрдэн Аскэрбый. ЗытегущыIэнхэу агъэнэфэгъэ Iофыгъор игъо шъыпкъэу зэрэщытыр къыIуагъ, къыт­кIэхъухьэрэ ныбжьыкIэхэр гъогу пхэнджым щыухъу­мэгъэнхэр, идеологие тэ­рэзым къыфэгъэущыгъэнхэр пшъэрылъ шъхьаIэу зэрэщытыр къыхигъэщыгъ.

Темыр Кавказым щы­псэурэ быслъымэнхэм я Координационнэ гупчэрэ УФ-м икъэралыгъо хэбзэ къулыкъухэу Къыблэ ыкIи Темыр-Кавказ федеральнэ шъолъырхэм ащыIэхэмрэ къэралыгъо-конфессиональнэ зэпхыныгъэ яIэу Iоф зэрэзэдашIэрэм, опы­тэу аIэкIэлъым къатегущыIагъ Темыр Кавказым щыпсэурэ быслъымэнхэм я Координационнэ гупчэ пшъэдэкIыжь зыхьырэ исек­ретарэу, къэралыгъо­-конфессиональнэ зэфы­щытыкIэхэмкIэ Институтым идиректорэу, Пятигорскэ къэралыгъо университетым КъокIыпIэм щыпсэурэ лъэпкъхэм абзэкIэ ыкIи культурэмкIэ икафедрэ ипа­щэу Ибрагим Ибрагимовыр. Ащ къыIотагъэх Темыр Кавказым ишъо­лъырхэм Координационнэ гупчи 3 къащызэIуахыгъэу Iоф зэрашIэрэр, быслъы­мэнхэмрэ чыристан диныр зылэжьыхэрэмрэ зэ­къотхэу Iоф зэрэзэда­шIэ­рэр, унагъом имэхьанэ уасэ фэшIыгъэным, идеологие тэрэз пхырыщыгъэным иIофыгъохэр.

— Терроризмэм ыкIи экстремизмэм тиныбжьыкIэхэр ащыухъумэгъэнхэ фае. Мы Iофыгъор къины къэзышIырэр Интернетым къэбар нэпцIхэр бэу къызэрэрагъахьэхэрэр, тхьамыкIагъом фэзыщэщт роликхэр зэритхэр ары. Лъэпкъ ыкIи дин зэфы­щытыкIэхэм алъэныкъокIэ, терроризмэм ыкIи экстремизмэм апэшIуекIогъэнымкIэ Iофтхьэбзэ гъэнэфа­гъэ­хэр зэхэтэщэх. Анахьэу тынаIэ зытедгъэтырэмэ ащыщ мыщ фэдэ нэшанэ зыхэлъ бзэджашIэхэр ыкIи лъэпкъ зэгурымыIоныгъэ­хэр игъом къыхэдгъэщынхэр, — къыIуагъ И. Ибрагимовым.

Нэужым гущыIэр лъигъэ­кIотагъ Пятигорскэ къэ­ралыгъо университетым тарихъымкIэ икафедрэ идоцентэу, философие шIэныгъэмкIэ кандидатэу Станислав Осиповым. Джырэ лъэхъан къэралыгъо-конфессиональнэ зэфы­щытыкIэхэм гъэпсыкIэу яIэхэм ягугъу ащ къышIыгъ. Терроризмэм пэшIуекIогъэнымкIэ хэбзэ гъэцэкIэкIо къулыкъухэр, дин ыкIи общественнэ организациехэр зэрэзэ­дэлажьэхэрэм шIуагъэу къыхьырэм къытегущыIагъ. Джащ фэдэу ислъам ыкIи чыристан диныр гукIэгъум, шIушIэным, шъыпкъагъэм афэлажьэу зэрэщытыр, ныбжьыкIэхэр диным уасэ зыфишIэу, мэхьанэ зэритырэ лъэныкъохэм атетэу пIугъэнхэ зэрэфаер къыкIигъэтхъыгъ.

АР-м юстициемкIэ и Министерствэ иIофышIэу Алексей Шерстиновым экстремизмэм пэшIуекIогъэнымкIэ Iофэу ашIэхэ­рэм­кIэ, гумэкIыгъоу щыIэ­хэмкIэ къэзэрэугъоигъэхэм гущыIэгъу къафэхъугъ.

— Мы лъэныкъом къулыкъушIэхэм лъэшэу анаIэ тет нахь мышIэми, терроризмэм ыкIи экстремизмэм апэшIуекIогъэныр Iофыгъо псынкIэп. БзэджэшIагъэ зэрахьаным фэзыщэхэрэ къэбарыбэ Интернетым къехьэ, ащ зи епшIэн плъэ­кIыщтэп. Тэ типшъэрылъыр тиныбжьыкIэхэм мыхэр зыщыщыр агурыдгъэIоныр, пшъэдэкIыжьэу ахьыщтыр ядгъэшIэныр ары. Терроризмэм ыкIи экстремизмэм афэгъэхьыгъэ нэкIубгъохэм ащытхэхэрэр тэгъэунэфых. Джащ фэдэу мы лъэны­къом­кIэ пэшIорыгъэшъ Iоф­тхьабзэхэр зэхэтэщэх, уплъэкIунхэр ретэгъэкIо­кIых. Мы илъэсым хэукъо­ныгъэшхо зыпари къыхэдгъэщыгъэп. Арэу щытми, тапэкIи мы гумэкIыгъом тыпэшIуекIон фае, — къы­Iуагъ министерст­вэм илIыкIо.

Iофтхьабзэр зэдэгущы­Iэгъу шIыкIэм тетэу лъагъэ­кIотагъ. Шъхьадж ишIошI­хэр къыриIотыкIынхэ амал яIагъ. ЗэкIэми зэдырагъа­штэу къаIуагъ ислъам ыкIи чыристан диныр шIум изе­хьакIохэу зэрэщытхэр, обществэмкIи, цIыфхэмкIи, социумымкIи шIуагъэ къы­зэрихьырэр, тикъэралыгъо щынэгъончъэу щытыным, мамырныгъэ илъыным, зыпкъитыныгъэ иIэным ди­ныр зэрэфэIорышIэрэр.

КIАРЭ Фатим.