Унэхэм якIолIэрэ электрическэ токым ыкIуачIэ къыщымыкIэным, ар икъоу ыкIи игъом аIэкIэгъэхьэгъэным афэшI подстанциеу 35 кВ «Садовая» зыфиIорэм гъэцэкIэжьын Iоф­шIэнхэр рашIылIэх, трансформаторнэ кIуачIэу иIэм хагъахъо, Iэмэ-псымакIэхэр чIагъэуцох. Мы илъэсым ыкIэ нэс IофшIэнхэр аухынхэу щыт.

— Щынэгъончъагъэ хэлъэу электроэнергиер псэупIэхэм ящэлIэгъэным епхыгъэ IофшIэнхэр регъэкIокIыгъэнхэм пае станицэхэу Къурджыпс, Дагестанскэм, Табачнэм, Приречнэм, къутырэу Спокойнэм подстанциеу «БВД» зыфаIорэм къыхащырэ токыр аIэкIагъахьэ. Ащ къыхэкIэу электричествэу атырэм ыкIуачIэ тыгъэгъазэм и 17-м нэс нахь мэкIэщт, —къыщыхагъэщыгъ Мыекъопэ районым иадминистрацие.

Адыгэ Республикэм ими­нистрэхэм я Кабинет, орга­низациеу «Россетти» иIофышIэ куп ыкIи компаниеу «Россети Кубань» зэдашIыгъэ зэзэгъы­ныгъэм елъытыгъэу гъэцэкIэжьын IофшIэнхэр зэшIуахых. 2022-рэ илъэсым къыкIоцI ащ фэдэ гъэцэкIэжьынхэр ыкIи гъэкIэ­жьынхэр ащашIыщтых под­станциехэу 110 кВ «Черемушки», «Северная», 35 кВ «Инэм», «Комбизавод», «Тульская», «Садовая» зыфаIохэрэм.