ЛIыжъ ЩтыргъукIым фэкIорэ тхыгъэхэр зырадзэнхэ алъэкIыщт къэмланхэр хэгъэгум ипочтэхэм ачIагъэуцуагъэх. Тыгъэгъазэм и 31-м нэс ятхыгъэхэр ахэм арадзэн алъэкIыщт. МыекъуапэкIэ урамэу Краснооктябрьскэм тет унэу N 20-р ары ащ фэдэ къэмлан зычIэтыр.

Къэлэшхохэм ягупчэ почтэхэм ащ фэдэ къэмлэни 100 фэдиз ачIэт. Шъуитхыгъэ ЛIыжъ ЩтыргъукIым IэкIэхьаным пае мыщ фэдэ гущыIэхэр тешъутхэн фае: 162390, Урысыер, Вологодскэ хэку, къалэу Великий Устюг, «ЛIыжъ ЩтыргъукIым фэкIо».

НэмыкI шъолъырхэм, гущыIэм пае, Урал, Карелием, Татарстан я ЛIыжъ ЩтыргъукIхэми шъуитхыгъэ афэжъу­гъэхьын шъулъэкIыщт. Почтэм иIофышIэхэр кIэлэцIыкIухэм IэпыIэгъу къафэхъущтых ищыкIэгъэ гущыIэхэр конвертым тетхэгъэнхэмкIэ, маркэр ащ тегъэпкIэгъэ­нымкIэ. Къэмлэнэ къызэрыкIоми дадзэгъэ сыд фэдэрэ тхыгъи почтэмкIэ ЛIыжъ ЩтыргъукIым IэкIагъэхьащт ар зэрэфакIорэр тетхагъэмэ. Почтэм иIофышIэхэм илъэсыкIэ тхыгъэхэр тыгъэгъэзэ мазэм къыкIоцI зэхадзыщтых, ЛIыжъ ЩтыргъукIхэр зыдэщыIэ чIыпIэхэм ахэр агъэхьыщтых.

2021-рэ илъэсым Урысыем ипочтэхэмкIэ кIэлэцIыкIухэмрэ зыныбжь икъугъэхэмрэ ятхыгъэ 170000-рэ фэдиз Великий Устюг, ятхыгъэ мин заулэ нэмыкI шъолъырхэм агъэхьыгъагъэх.