АР-м имуниципальнэ образованиеу «Мыекъопэ райо­ным» иадминистрацие IэнатIэ щызыIыгъым ыкIи Адыгеим щыпсэурэм алъэныкъокIэ уголовнэ Iофэу къызэIуахыгъэм кIуачIэ иIэ хъугъэ.

ЧIыгу зэфыщытыкIэхэм афэгъэхьыгъэу гъэпцIагъэ зыхэлъ бзэджэшIагъэ зэ­рэ­зэрахьагъэм фэшI ахэр агъэмысэх.

Урысыем щынэгъончъэ­нымкIэ ифедеральнэ къулыкъу и ГъэIорышIапIэу АР-м щыIэм зэригъэу­нэ­фы­гъэмкIэ, Мыекъопэ рай­он администрацием мэкъу­мэщ хъызмэтымкIэ и Гъэ­IорышIапIэ ипащэ игуадзэу Н. С. Самойловар ыкIи М. С. Календжан зэрэшIэ­хэзэ яIэнатIэ къыз­фагъэ­феди, къалэу Но­ворос­сий­скэ къикIыгъэ хъулъ­фы­гъэу закъыфэз­гъэзагъэм къэбар мы­шъыпкъэр раIуи, гъэпцIагъэ зыхэлъ бзэджэшIагъэ дызэрахьагъ.

Новороссийскэ щыщ хъулъфыгъэм мэкъумэщ мэхьанэ зиIэ чIыгу Iахьэу тетхагъэхэм хьакIэщ комплекс, джащ фэдэу унэе псэупIэхэр щишIынхэ фи­тэу документхэр аригъэшIын гухэлъ иIагъ.

Н. С. Самойловар чIыгум игъэфедэн, псэуалъэ­хэм ягъэпсын пылъ шапхъэхэм зэхъокIыныгъэхэр афэшIыгъэнхэмкIэ Мые­къопэ район администрацием икомиссие хэтыгъ ыкIи дэгъоу щыгъозагъ хъулъфыгъэм илъэIу хэ­бзэгъэуцугъэу щыIэм зэрэдимыштэрэр, ар зыкIэ­дэурэр фагъэцэкIэн зэрамылъэкIыщтыр.

Арэу щытми, Н. С. Самойловар ыкIи М. С. Ка­ленджан хъулъфыгъэм илъэIу комиссием зэрэщигъэзыягъэр рамыIоу хэбзэнчъэу сомэ мин 600 фэдиз къыIахыгъ, нэужым ежьхэр зыфаем ахъщэр пэIуагъэхьагъ.

Урысыем щынэгъон­чъэнымкIэ ифедеральнэ къулыкъу и ГъэIорышIапIэу АР-м щыIэм къызэIуихыгъэ уголовнэ IофымкIэ УФ-м и Следственнэ комитет республикэмкIэ иследственнэ ГъэIорышIапIэ зэхэфынхэр ригъэкIо­кIыгъэх. Ахэм язэфэхьысыжьхэмкIэ Н. С. Самойловамрэ М. С. Календжанрэ лажьэ яIэу агъэунэ­фыгъ.

АР-м и Апшъэрэ ­хьыкум уголовнэ IофхэмкIэ ихьыкум коллегие унашъоу ышIыгъэмкIэ, Н. С. Самой­ловам илъэси 2-рэ мэзи 10-рэ хьапс условнэу, илъэси 2 пIалъэкIэ пэщэ IэнатIэ ыгъэцэкIэн фимытэу, М. С. Календжан илъэси 2-рэ мэзи 4-рэ хьапс атыралъхьагъ.

Унашъом кIуачIэ иIэ хъугъэ.