Хэгъэгум ис кIэлэцIыкIухэм хэушъхьафыкIыгъэ дзэ операцием хэла­жьэхэрэм апае илъэсыкIэ мэфэкIым фэгъэхьыгъэ сурэтхэр ашIыщтых, нэужым ахэр дзэкIолIхэм анагъэсыщтых.

«Единэ Россиер» кIэщакIо зыфэхъугъэ Iофтхьабзэр ащ иобщественнэ приемнэхэмрэ иштабхэмрэ ащыкIощт, мас­тер-класс фэдэу зэхэщэгъэщт. Ежь­ежьырэу открыткэ зыгъэхьа­зырыгъэхэми ахэм къарахьы­лIэнхэ алъэкIыщт.

— ИлъэсыкIэ мэфэкIэу къэ­благъэрэм пай кIэлэцIыкIухэр тиухъумакIохэм зыщафэгушIо­хэрэ, гущыIэ фабэхэмкIэ зыща­фэлъаIохэрэ открыткэхэр къагъэхьазырыщтых. «Единэ Россием» ахэр тилIыхъужъхэм аIэ­кIигъэхьащтых. ТидзэкIолIхэм гуапэ зэращыхъущтым сицыхьэ телъ, агу ихыгъэу сабыйхэр зэ­рафэлъэIуагъэхэри къадэхъущтых, — къыхигъэщыгъ «Единэ Россием» и Апшъэрэ Совет и Секретарь игуадзэу, общественнэ приемнэхэм япащэу Анна Кузнецовам.

— Iофтхьабзэу «Новогодняя почта» зыфиIорэр ежьагъ. «Ныб­жьыкIэ гвардием» хэтхэр ягъусэхэу кIэлэцIыкIухэм открыткэхэр агъэхьазырых. 200-м ехъу ашIыгъах. Iофтхьабзэр зытыухкIэ, тидзэкIолIхэм агу къыдэтщэенэу, ахэр афэттIупщыщтых, — къыIуагъ Адыгеим и «НыбжьыкIэ гвардие» ипащэу Бэрзэдж Асыет.

Шъугу къэдгъэкIыжьын, «Zащитники Отечества» зыфиIорэ Iофтхьабзэр «Единэ Россием» мы илъэсым игъэтхэпэ мазэ ытIупщыгъ. Ащ къыдыхэлъытагъэу шIоигъоныгъэ зиIэ пстэумэ тидзэкIолIэу хэушъхьафыкIыгъэ дзэ операцием хэлажьэхэрэм апае письмэхэмрэ сурэтхэмрэ партием иобщественнэ прием­нэхэм арахьылIэх.