АмышIэрэ ЗэолIым и Мафэ ехъулIэу Мыекъопэ районым ит стани-цэу Кужорскэм Дзэ Плъыжьым идзэкIолI нэбгырищмэ яхьэдэ къупшъ­хьэхэр зэрэщагъэтIылъыжьхэрэм фэгъэхьыгъэ зэхахьэ щыкIуагъ.

Урысыем илъыхъокIо комитет игъэIорышIапIэу Адыгеим щыIэм ипресс-къулыкъу къызэритыгъэм­кIэ, красноармейцэ нэбгыри­тIумэ якъупшъхьэхэр Мыекъопэ районым ит станицэу Кужорскэм иIогъо-блэгъу 2022-рэ илъэсым ишэкIогъу мазэ къы­ща­гъотыжьыгъэх. Ащ епхыгъэ Iоф­хэр зэшIозыхыгъэхэр «Урысыем илъыхъокIо движение» икъутамэу республикэм щыла­жьэрэмрэ Урысыем илъыхъокIо комитет игъэIорышIапIэу Адыге­им иIэмрэ яIофышIэхэр ары. «Фронтовая почта» зыфиIорэ проектым ишIуагъэкIэ ящэнэрэ дзэкIолIым икъупшъхьэхэр Тэ­хъу­тэмыкъое районым къыщагъотыжьыгъэх. Зэрагъэунэ­фыгъэмкIэ, дзэкIолIыр 1943-рэ илъэсым ищылэ мазэ хэкIодэгъэщт, а уахътэр ары мы чIыпIэм нэмыц-фашист техакIохэм зэошхо зыщарашIылIэгъагъэр.

— Хьэдэ къупшъхьэмэ ягъу­сэ­хэу къагъотыжьыгъэх дзэкIолI­хэм ящыгъынхэм ячыIухэр, бгырыпхышъхьэхэр, «МосинкIэ» заджэхэрэ шхончым екIурэ пат­ронхэр, артиллерием ита­мы­гъэхэр. ДзэкIолIхэм афэгъэ­хьы­гъэ тхыгъэхэр къагъоты­жьыгъэ­хэп. Ащ къыхэкIэу ахэм ацIэ­-алъэкъуацIэхэр агъэунэфышъугъэхэп, — къыщыхагъэщыгъ Урысыем илъыхъокIо комитет игъэIорышIапIэу Адыгеим щыIэм ипресс-къулыкъу.

ЛIыхъужъныгъэ зезыхьэгъэ дзэкIолIхэм атефэрэ шъхьэкIэфагъэр афашIызэ хьэдэ къуп­шъхьэхэр агъэтIылъыжьыгъэх. ШIэжь зэхахьэм хэлажьэхэрэм къэгъэгъэ блэрхэр къэм кIэралъ­хьагъэх, Хэгъэгур къаухъумэзэ фэхыгъэхэм зы такъикъэ афэшъыгъуагъэх.

ШIэжь зэхахьэм хэлэжьагъэх Урысыем илъыхъокIо комитет игъэIорышIапIэу Адыгеим щыIэм иIофышIэхэр, ащ епхыгъэ кадет­скэ классэу лицееу N 8-м икIэ­лэеджакIохэр, «Урысыем илъы­хъокIо движение» зыфиIорэм ишъолъыр къутамэ ипащэу Иван Портноир, Мыекъопэ ыкIи Тэ­хъутэмыкъое районхэм яад­министрациехэм, къалэу Мые­къуапэ епхыгъэ къэзэкъ обществэм и ВПК-у «Застава» зыфиIорэм ыкIи Народнэ фронтым ялIыкIохэр.