КIэлэцIыкIухэр ыкIи зыныбжь имыкъугъэхэр ары шэсэу бзэджашIэхэм нахьыбэрэм аубытхэрэр.

Ахэм янэ-ятэхэм щэфыжьыпкIэ къаIахыным фэшI террористхэм а шIыкIэр къыхахы.

Ащ фэдэ гузэжъогъу чIыпIэ цIыфыр зифэкIэ зэрэзекIощтыр ышIэн фае.

Шъуигупсэхэм ащыщ шэсэу аIыгъэу къызышъуфытеохэкIэ ыкIи къатIупщыжьыным пае шъу­шIэн фаер къызышъуаIокIэ, ыпэрапшIэу ар псаумэ, мыфыкъуагъэмэ зэжъугъашIэ.

Аубытыгъэм шъузэрэIуамыгъэкIэщтыр гъэнэфагъэ, ау телефонкIэ ащ шъудагъэгущыIэн фае. Арышъ, къышъодаорэм зэдэ­гущыIэгъу дышъуиIэ зыхъукIэ, аубытыгъэм ымакъэ зэхэшъу­хынэу шъузэрэфаер пытагъэ хэлъэу ешъуIонэу щыт.

ШъудагъэгущыIэнэу зежъу­гъажьэкIэ, а цIыфым ымакъэмэ зэхэшъухырэр зэжъугъэшIэн фае. Сыда пIомэ, джырэ техно­логиехэмкIэ макъэр зиер зэхэмышIыкIынэу ашIын алъэкIы. Ащ пае шъуздэгущыIэрэр шъуи­гупсэмэ къызэрэшъушIэщт упчIэ горэхэр фэжъугъэзэнхэ фае. Нэужым ар мыгумэкIынэу, сыдэу хъугъэми, шъхьафит зэря­жъугъэшIыщтыр гурыжъугъаIу.

Джащ фэдэу иIофхэм язытет шъукIэупчI, къызэрэфыщытхэр зэжъугъашI. Iофым изытет нахь дэй мыхъуным пае ежь-ежьырэу къежьэжьынэу зэрэщымытыр гурыжъугъаIу. Анахь шъхьаIэр — шэсэу зыубытыгъэм икъэбар зэжъугъэшIэнэу шъукIэмыупчI.

Нэужым шъуигупсэ къытIупщыжьыным фэшI ар зыубы­тыгъэм къыгъэуцурэ амалхэм шъуахэдаIу. Мылъкоу къызкIэлъэIурэм фэдиз шъуимыIэмэ, пIэлъэ гъэнэфагъэкIэ къышъо­жэнэу шъуелъэIу. Хъугъэ-шIа­гъэу щыIагъэхэм къызэрагъэ­лъа­гъорэмкIэ, ащ фэдэ уахътэ бзэджашIэхэм къыуаты.

Ащ фэдэ зыхъурэм мы Iофым хэшIыкI фызиIэхэм зафэбгъэзэнэу щыт. Ахэм адэжь шъукIоным нахьи шъуафытеомэ нахь тэрэз. Сыда пIомэ шъуздакIорэм къылъыплъэнхэ алъэкIыщт.

ХэбзэухъумэкIо къулыкъухэм яшIэ хэлъэу, щысхэу шъуигупсэ зыубытыгъэм зичэзыу зэдэгущыIэгъу дышъуиIэн зыхъукIэ ыпэрапшIэу шъузэрэзекIощтым ыкIи яшъуIощтым шъутегущыIэн фае. Сыда пIомэ джэуапэу яптыжьырэмкIэ гуцаф къыпфашIын алъэкIыщт.

Шэсэу аубытыгъэр къыздащэщт чIыпIэмкIэ, уахътэмкIэ шъузэзэгъ зыхъукIэ террористым ежь зыфаер къыIощт. Ау шъо ешъуIон шъулъэкIыщт за­къор аубытыгъэ шъуигупсэм ищыIэныгъэкIэ щынагъо зэрэщымыIэм шъуицыхьэ телъын зэрэфаер ары. Нэужым а зы уахътэм ахъщэр яшъотышъ, цIы­фыр къышъуатыжьы е ар щынэгъончъэ чIыпIэ зэрэщыIэм шъуицыхьэ телъмэ, ахъщэр яшъоты.

Шэсэу аубытыгъэм ищыIэныгъэ щынэгъончъэным фэшI хэбзэухъумэкIо къулыкъухэм ялIыкIохэмрэ шъорырэ шъуишIэрэ шъуиIорэ зэдиштэнхэ фае.