МашIор агъэкIосагъ
Кощхьэблэ районым ит къуаджэу Еджэркъуае дэт дэгъэшI заводэу «Мамырыкъу» зыфиIорэм къыкIэнэгъэгъэ машIом игъэкIосэн епхыгъэ IофшIэнхэр тыгъэгъазэм и 6-м, пчэдыжьым сыхьатыр 7-м аухыгъэх.
Тыгъэгъазэм и 5-м, пчыхьэм машIом заводыр зэлъиштагъ. МэшIогъэкIосэ къулыкъум и ГъэIорышIапIэ хэхьэрэ частьхэу N N 4-р, 5-р ыкIи 6-р, чIыпIэ мэшIогъэкIосэ гарнизоным икъулыкъушIэхэр псынкIэу чIыпIэм нэсыгъагъэх.
Адыгэ Республикэм ошIэ-дэмышIэ IофхэмкIэ и ГъэIорышIапIэ къызэритыгъэмкIэ, машIор къызщиштагъэр гъэгъушъыпIэ камерэу псэуалъэм хэтыр арэу апэрэ уплъэкIунэу ашIыгъэм къыгъэлъэгъуагъ.
МашIом игъэкIосэн хэлэжьэгъэ къулыкъухэм къызэраIуагъэмкIэ, ащ нэбгырэ 33-рэ хэлэжьагъ, техникэу агъэфедагъэр 11 мэхъу. Зи хэкIодагъэп, зыми шъобжхэр хихыгъэп. МашIор къыкIэнэным ушъхьагъоу фэхъугъэр Адыгэ Республикэм ошIэ-дэмышIэ IофхэмкIэ и ГъэIорышIапIэ зэхефы.