Адыгеим къэралыгъо гъэпсыкIэ зигъотыгъэр илъэси 100 зэрэхъугъэр республикэм непи щыхагъэунэфыкIы.

МэфэкI иным лъэпкъымкIэ имэхьанэ къагурыIоу Адыгэ республикэ кIэлэцIыкIу тхылъеджапIэм Iофтхьабзэхэр щызэхащэх. ТхылъеджапIэм ипащэ игуадзэу Даур Саидэ зэрэхигъэунэфыкIыгъэмкIэ, «уицIы­кIугъом плъэгъоу, зэхэпхыгъэр ары ныб­жьырэу къыпханэрэр». Ащ къыпкъырыкIыхэзэ, кIэлэеджэкIо цIыкIухэм яреспуб­ликэ нахь ягъэшIэгъэнымкIэ, шIу ягъэлъэгъугъэнымкIэ, макIэп тхылъеджапIэм Iофэу ышIагъэр. ТызэрагъэгъозагъэмкIэ, ахэм Мыекъуапэ иеджапIэхэм ямыза­къоу, Адыгеим ирайон зэфэшъхьафхэм къарыкIыхэрэри ахэлажьэхэу къыхэкIыгъ. Ащ фэдагъ Адыгэ Республикэм и Мафэ ехъулIэу адыгэ литературэмкIэ отделым «И края в мире нет дороже, где довелось родиться нам» зыфиIорэ Iофтхьабзэу ыгъэхьазырыгъагъэр.

Укъызщыхъугъэу, узыщапIоу, ныб­джэгъу цIыкIубэр зыщыуиIэу, лъэпкъыбэр хьалэлэу зыщызэдэпсэурэ Адыгеим фэдэ хъун зэрэщымыIэр мэфэкIым къыриIотыкIыгъ. Ащ хэлэжьагъэх посел­кэу Краснооктябрьскэм дэт гурыт еджа­пIэу N 2-м ия 3 — 4-рэ классхэм ащеджэхэрэр. КIэлэеджакIохэм бзэ гурыIогъошIукIэ къафаIотагъ Адыгэ автоном хэкур тиреспубликэ икъежьапIэ зэрэхъугъэр, 1922-рэ илъэсым, бэдзэогъум ия 27-м УФ-м иполитическэ картэ Адыгэ автоном хэкур къызэритэ­джагъэр.

ЕджакIохэр Адыгеим итамыгъэхэм — гербым, быракъым, гимным, лъэпкъ шэн-хабзэхэм щафагъэнэIосагъэх. Библиотекарым къыIуатэрэр слайд-къэгъэ­лъэгъоным къыгъэпытэжьыщтыгъ.

Iофтхьабзэм адыгэ орэдхэр къыщаIуа­гъэх. Тхылъ къэгъэлъэгъонэу «Славься, живи, Адыгея!» зыфиIорэм Адыгеим итарихъ, идунэе дахэ, ицIыф чанхэм афэгъэхьыгъэхэр щызэгъэзэфэгъагъэх, а зэкIэ илъэси 100 уахътэм афызэшIокIыгъэр къэзыIуатэрэх.

Ежь еджэкIо цIыкIухэм ащыщхэри адыгэ усакIохэм яусэхэм ащыщхэм IупкIэу къяджагъэх.