АР-м 2023-рэ илъэсымкIэ ибюджет, 2024 — 2025-мкIэ агъэнэфагъэхэм, шIокI зимыIэ медицинэ страхованиемкIэ республикэ фондым ибюджет, социальнэ лъэныкъо зэфэшъхьафхэм афэгъэхьыгъэ хэбзэгъэуцугъэхэм япроектхэм, нэмыкIыбэхэм щатегущыIагъэх тыгъуасэ АР-м и Къэралыгъо — Совет Хасэм я XVIII-рэ зэхэсыгъоу иIагъэм.

Ащ хэлэжьагъэх Адыгэ Рес­публикэм и ЛIышъхьэу КъумпIыл Мурат, Правительствэм хэтхэр, къулыкъу зэфэшъхьаф­хэм япащэхэр. Зэхэсы­гъор зэ­рищагъ Адыгеим и Парламент и Тхьаматэу Владимир Нарожнэм.

ЗэкIэмэ апэу Денис Матвиенкэр Тэхъутэмыкъое районым ихьыкум участкэу N 4-м ихьы­кумышIэу гъэнэфэгъэным де­путатхэр тегущыIэхи, дырагъэ­штагъ.

Нэужым къэкIорэ илъэсым республикэ бюджетыр зыфэдэщтым, 2024 — 2025-рэ илъэс­хэмкIэ агъэнэфагъэхэм афэгъэ­хьыгъэ хэбзэгъэуцугъэм ипроект те­гу­щыIагъэх. Парламентым и Тхьаматэ игуадзэу, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ Комитетым ипащэу Iащэ Мухьамэд ятIонэрэ еджэгъум фагъэхьазырыгъэ проектым гъэтэрэзы­жьынэу фашIыгъэхэм ащигъэгъозагъэх. Ахэр 25-рэ мэхъух. Апэрэ еджэгъумкIэ зыхэплъагъэхэм къыфагъэзэжьи, гъэтэрэзыжьынэу фашIыгъэхэм яшIуагъэкIэ сомэ миллиарди 7-рэ миллион 464-м ехъу 2023-рэ илъэс бюджетым къыхэ­хъуагъ. Ащ тетэу хахъохэмкIэ сомэ миллиард 37,3-рэ хъущт, ­хъарджхэр сомэ миллиард 38,8-м ехъущт.

ЯтIонэрэ еджэгъум зыхэп­лъэщтхэм къыдэлъытагъэхэм сомэ миллион 514-м ехъукIэ гъэтэрэзыжьынхэр афэшIыгъэнхэм депутатхэр ары кIэщакIо фэхъугъэхэр. Культурэм, медицинэм, спортым алъэныкъокIэ щыкIагъэу щыIэхэм ядэгъэзыжьын, бюджетым епхыгъэу Iоф зышIэхэрэм ялэжьапкIэ индексацие шIыгъэным ар апэIухьащт.

Законопроектым зытегущыIэхэм ыуж, гъэтэрэзыжьынхэр зэкIэ къыдэлъытагъэхэу хэбзэгъэуцугъэр ятIонэрэ еджэгъумкIэ аштагъ.

ШIокI зимыIэ медицинэ страхованиемкIэ АР-м и ЧIыпIэ фонд 2023-рэ илъэсымкIэ ибюджет ыкIи 2024 — 2025-мкIэ агъэнэфагъэхэм афэгъэхьыгъэ хэбзэгъэуцугъэм ипроектэу ятIонэрэ еджэгъум къыфагъэ­хьазырыгъэм зыпари гъэтэрэзыжьын фашIыгъэп. Ащи Парламентым изэхэсыгъо щыхап­лъэхи, хэбзэгъэуцугъэр аштагъ.

Нэужым нэжъ-Iужъэу е сэкъатныгъэ зиIэу, лъыплъэн зищыкIагъэхэр зыштэрэ уна­гъохэм, псэушъхьэхэм узэрадэзекIощтым, IофшIэным икъэу­хъумэн, ешъуагъэхэм е наркотик зыгъэфедэхэрэм IэпыIэгъу ятыгъэным, хэдзынхэмкIэ фитыныгъэхэм афэгъэхьыгъэ рес­публикэ хэбзэгъэуцугъэхэм зэхъокIыныгъэу афэхъущтхэм афэгъэхьыгъэ законхэм, законопроектхэм атегущыIагъэх, аштагъэх.

Гъэстыныпхъэ шхъуантIэр цIыфхэм аIэкIэгъэхьэгъэным фэгъэхьыгъэ унашъоу УФ-м и Президент къышIыгъэр икъоу гъэцэкIэгъэным фэшI ащ тегъэ­псыхьэгъэ программэм къыхэлажьэу, газым изэбгырыщын фэгъэзэгъэ организациехэм ямылъку пае атырэ хэбзэIахьхэмкIэ фэгъэкIотэнхэр яIэнхэу къызщиIорэ законыри мы зэ­хэсыгъом щаштагъ.

Мы уахътэм «социальнэ догазификацием» фэгъэхьыгъэ программэр Адыгеим щылъа­гъэкIуатэ. РеспубликэмкIэ унэгъо мини 6,2-м ехъу ащ къыхеубытэ, лъэIу тхылъ 5672-рэ къатыгъ, зыфыращэлIагъэу, мы гъэстыныпхъэр непэ зыгъэфе­дэрэр унэгъо 800 мэхъу.

Унагъом, ныгъом, тыгъом ыкIи кIэлэцIыкIугъом якъэухъу­мэн фэгъэхьыгъэ республикэ законым лъыплъэн имыIэу къэ­нэгъэ кIэлэцIыкIоу, зихэхъогъоу, чIыпIэ къин ифагъэхэм хэушъхьафыкIыгъэ учреждениехэм социальнэ IэпыIэгъу ащагъотынэу фитыныгъэ къареты.

УФ-м и Правительствэ и Тхьаматэ игуадзэу Виктория Абрамченкэм фэгъэзэгъэ джэ­псалъэу республикэ Парла­ментым идепутатхэм агъэхьазыри мы зэхэсыгъом щаштагъэр псым епхыгъэ псэуалъэхэм (водные объекты) ягъэфедэн фэ­гъэхьыгъ.

Депутатхэм афэрэзагъ

Агъэнэфагъэхэм затегущы­Iэхэм ыуж АР-м и ЛIышъхьэу КъумпIыл Мурат гущыIэр­ ыштагъ. Илъэсым пыкIыгъэ уахътэм зэшIохыгъэ хъугъэхэм, анахь шъхьаIэу зыдэлажьэхэрэм кIэкIэу къатегущыIэзэ, хэу­шъхьафыкIыгъэ дзэ операциер зырагъэжьагъэм къыщыублагъэу ащ республикэм иIахь зэрэхилъхьэрэм къыкIигъэт­хъыгъ. Адыгеир Херсон хэкум и Геническэ район дэIэпыIэ, кIэлэцIыкIу IыгъыпIэхэр, еджапIэхэр щегъэцэкIэжьых, псэу­пIэхэр зэтырегъэпсыхьажьых, шIушIэ IэпыIэгъур мэфипшI те­шIэ къэс етIупщы. ЛIышъхьэм къызэриIуагъэмкIэ, фэтэрыбэу зэхэт унэу бгъэцэкIэжьын умылъэкIыщтхэр икIэрыкIэу щашIыжьынхэр апэ илъ. Мы хэкум зышъхьэ къизыхыжьи Адыгеим къэкIожьыгъэ нэбгырэ 525-мэ псэукIэ амал тэрэзхэр яIэнхэми ыуж итых. Респуб­ликэм ипащэ иунашъокIэ ахэм кIымэфэ щыгъынхэр ращэфынхэу сомэ мин 20 зырыз ара­тыщт. Джащ фэдэу мобилизацием къыхиубытагъэхэм ящыкIагъэр икъоу аIэкIэгъэхьэгъэным пылъых, ащ имызакъоу, ахэм яунагъохэми IэпыIэгъу афэхъух.

Ахэм адакIоу лъэпкъ проект­хэм, къэралыгъо программэхэм къа­дэлъытагъэу республикэм щырахьыжьэгъэ IофшIэныр пIа­лъэхэм адиштэу зэшIуахы, тапэ­Iэ пшъэрылъэу яIэхэми къа­­щы­кIэрэп.

— Iофэу етхьыжьэрэ пстэуми япхырыщын депутатхэр чанэу къыхэлажьэх, яшIогъэшхо къагъакIо, арышъ, сышъуфэраз. ЗэшIотхырэр цIыфхэм къалъэгъу, осэ ин къыфашIы. Ары тэркIэ анахь мэхьэнэ ин зиIэр, — къыIуагъ республикэм ипащэ.

ХЪУТ Нэфсэт. Сурэтхэр А. Гусевым тыри­хыгъэх.