Херсон хэкум зышъхьэ къизыхыжьыгъэхэм Адыгеим IэпыIэгъоу щарагъэкIы­хэрэм ащыщ ахэм IофшIэн къазэрафагъотырэр.

Республикэм и ЛIышъхьэ къызэрэхигъэщыгъэмкIэ, къыздэкIогъэхэ чIыпIэм хэгъозэнхэм пае къагъэкощыгъэхэм Iоф ашIэн гухэлъ яIэн фае. ГущыIэм пае, Виктор Георгиевыр поселкэу Каменномостскэм культурэм и Унэу дэтым художественнэ пащэ фэ­хъугъ. Ащ ыпэкIэ ар Херсон хэкум культурэмкIэ и Ордэунэ ипэщагъ, джы Адыгеим иIэпэIэсэныгъэ щигъэфедэн ылъэкIыгъ. ЧIыпIэ гъэIорышIапIэм иIофышIэхэм яхьатыркIэ Виктор Георгиевыр къызыкощыгъэм мэфиплI нахь темышIагъэу IофшIапIэ рагъэ­гъотыгъ, джы поселкэм ипащэу Владимир Петровым игъусэу гъэсэныгъэ-культурнэ проектхэр егъэхьазырых, зоопарк цIыкIум ишIын дэлажьэ. Мы охътэ благъэм Марина Цветаевам фэгъэхьыгъэ Iофтхьабзэ зэхищэнэу егъэхьазыры, ИлъэсыкIэ мэфэкIэу къэблагъэрэм зыкъыщызышIыщт артист ныбжьыкIэмэ Iоф адешIэ.

Ахэтых ахэм водительхэу, музей IофышIэхэу, ублэпIэ классхэм якIэлэегъаджэхэу IофшIэпIэ чIыпIэ зыгъотыгъэхэр.

КъумпIыл Мурат Адыгеим къэкощыгъэхэм зэIукIэгъу задешIым, анахь гумэкIыгъоу яIэхэр зыфэдэхэр зэригъэшIагъэх. Сабыйхэр кIэлэцIыкIу IыгъыпIэмэ ятыгъэнхэр, гурыт еджапIэмэ атырагощэнхэр, медицинэ ыкIи психологическэ IэпыIэгъу зищыкIагъэхэм ягъэгъотыгъэныр, нэмыкI Iофыгъохэр зэшIохыгъэ зэрэхъухэрэм ежь ышъхьэкIэ АР-м и ЛIышъхьэ лъэп­лъэ.

«Фэбагъэ хэлъэу шъукъызэрэтпэгъокIыгъэм пае «тхьашъуегъэпсэу» къышъотэIо. АР-м и ЛIышъхьэу КъумпIыл Мурат, къулыкъушIапIэу къыддеIэхэрэм, унэхэр тэзыгъэгъотыгъэхэм тафэраз. Ащ фэдэ IэпыIэгъу къытэшъумытыгъэемэ, тэ тиIофхэр дэищтыгъэх», — къыIуагъ комплексэу «Горный» зыфиIорэм чIагъэтIысхьагъэхэм япащэу Антон Щетининым. Ар Мыекъуапэ къыщыхъугъ, джырэ уахътэм Херсон къикIыжьи илъэныкъо гупсэ къыгъэзэжьыгъ.