Хэгъэгу зэошхор къызежьагъэр мэзищ хъугъэу къуаджэу Мамхыгъэ дащыгъэхэм Даур Джанхъот Джэбраилэ ыкъори ахэфэгъагъ. Я 9-рэ хэушъхьа­фыкIыгъэ сапернэ батальоным хэтэу ар зэуагъ.

Къалэу Керчь щыIэу ТекIоныгъэшхом щыпэгъокIыгъ, ау ядэжь къэкIожьынэу хъугъагъэп, 1946-рэ илъэсым ыкIэ нэс лагъымэлъыхъухэм ахэтыгъ.

Джанхъот Быракъ Плъыжьым иорден, медалэу «За оборону Кавказа», Хэгъэгу зэошхом иорденэу ятIонэрэ шъуашэ зиIэр, нэмыкI бгъэхалъхьэхэр къыратыгъэх.

Мамхыгъэ къызэкIожьым колхозым, нэужым районым иучреждениехэм Iоф ащишIагъ. Заом, IофшIэным ыкIи хэбзэгъэуцу къулыкъушIэхэм яветеранхэм ясоветхэм ятхьамэтагъ. Нахьыжъхэм я Советэу Адыгэ Респуб­ликэм и ЛIышъхьэ дэжь щыIэм хэтыгъ.

Мы тхыгъэм хэт сурэтым ишъулъагъохэрэм азыфагу дэтыр Даур Джанхъот, къыготыхэр ышыхэу Абдулахьрэ Зулкъадрэ, ахэр зэшыхэу Даур Рахьрэрэ Джэбраилэрэ къатекIыгъэх. Щыри зы мафэм заом зэдыдащыгъагъэх.

Джанхъот илъэс 90-рэ хъугъэу идунай ыухыгъ. Сабыитф ыпIугъ, къо­рэлъфипшI иI. Ахэм сабый 18 къатекIыгъ.

Джанхъот къиныбэ пэкIэкIыгъэми, насыпышIоу зилъытэжьыщтыгъ.

Джанхъот къызыхъугъэр мыгъэ тыгъэгъазэм и 5-м илъэси 100 хъугъэ.

(Тикорр.).