Хабзэр зыукъохэрэр агъэпщынэх
Урысыем хэгъэгу кIоцI IофхэмкIэ и Министерствэ экономикэ щынэгъончъэнымкIэ ыкIи къолъхьэ тын-Iыхыным пэшIуекIогъэнымкIэ иподразделение ыкIи полицием иучастковэ уполномоченнэ иотделэу Мыекъуапэ щыIэм икъулыкъушIэхэм Iофтхьабзэу зэрахьагъэхэм яшIуагъэкIэ сатыушIыпIэхэм шъон пытэ зыхэт продукциер зыщыфимытхэ уахътэм цIыфхэм аращагъэу хъугъэ-шIэгъитIу къычIагъэщыгъ.
Щысэ къэтхьын, илъэс 36-рэ зыныбжь бзылъфыгъэу Мыекъуапэ щыпсэурэм пчэдыжьым сыхьатыр джыри 11 мыхъугъэу шъон пытэ зыхэт продукциер арищагъ. Джащ фэдэу Мыекъуапэ ирайон цIыкIухэм ащыщ горэм дэт тучаныр зыгъэлэжьэрэ бзылъфыгъэм сыхьатыр 22-м шIокIыгъэу шъон зыхэт продукциер арищагъ.
Федеральнэ унашъоу «Этил спиртыр, шъон пытэ ыкIи спирт зыхэт продукцие къэзышIыхэрэр ыкIи IузыгъэкIыхэрэр, джащ фэдэу шъон пытэ зыхэт продукцие зыгъэфедэхэрэр нахь макIэ шIыгъэнхэмкIэ къэралыгъо екIолIакIэ къыфэгъотыгъэныр» зыфиIоу Адыгэ Республикэм щаштагъэм къызэриIорэмкIэ, зырызыщэ сатыу зышIыхэрэм шъон зыхэт продукциер сыхьатыр 22-м къыщегъэжьагъэу пчэдыжьым сыхьатыр 11-м ащэн фитхэп.
Мы уахътэм ехъулIэу мы IофхэмкIэ зэхэфынхэр макIох. Ащ къыкIэлъыкIоу унашъохэр ашIыщтых.
Адыгеим иполицие цIыфхэм къяджэ, спирт зыхэт продукциер хэбзэнчъэу ащэу рихьылIагъэхэмэ зэпхыгъэхэ участковэ уполномоченнэм ителефон номерэу 02-м (мобильнэ номерэу 102-м) теонхэу.
ПшъэдэкIыжь ахьы
ЦIыфхэм ящыIэныгъэ ыкIи япсауныгъэ, джащ фэдэу къэралыгъом иэкономикэ шIоигъоныгъэ щынэгъончъэу щытынхэм фэIорышIэу шъон пытэ зыхэт продукциер къезыгъэкIокIыхэрэм къэралыгъом ынаIэ атет.
Административнэ хэбзэгъэуцугъэм къызэригъэнафэрэмкIэ, хабзэр аукъозэ шъон пытэ, этил спиртыр ыкIи спирт зыхэт продукциер къезыгъэкIокIыхэрэм пшъэдэкIыжь арагъэхьы. УФ-м и Уголовнэ кодекс истатьяу 171.3-м къызэригъэнафэрэмкIэ, лицензие ямыIэу этил спиртыр, шъон пытэ ыкIи спирт зыхэт продукциер къезыгъэкIокIыхэрэм ыкIи IузыгъэкIыхэрэм, анахьэу товарым ыуасэ сомэ мини 100-м ехъу хъумэ уголовнэ Iоф къафызэIуахы. Лажьэ зиIэм илъэси 3-м щегъэжьагъэу 5-м нэс хьапс атыралъхьэ.
Ащ нэмыкIэу УФ-м и Уголовнэ кодекс къегъэнафэ хабзэр аукъозэ шъон пытэхэр ыкIи спирт зыхэт продукциер мызэу, мытIоу IузыгъэкIыщтыгъэхэу, ыпэкIи мы лъэныкъомкIэ административнэ пшъэдэкIыжь зэрагъэхьыгъэхэм илъэсым нэс хьапс атыралъхьанэу.
Хэбзэгъэуцугъэм къызэригъэнафэу зыныбжь имыкъугъэхэм шъон пытэ зыхэт продукциер аращэн фитхэп. Мы лъэныкъомкIэ хабзэр зыукъорэм административнэ тазырэу сомэ мин 50 фэдиз тыралъхьэ, мы Iоф дэдэмкIэ ятIуанэу къызаубытыкIэ уголовнэ пшъэдэкIыжь рагъэхьыщт.