Мыекъопэ районым ит Абдзэ­хэхьаблэ икIэу Новосвободнэм кIорэ гъогум псыхъоу Вонючкэ зыщызэпичырэм телъ лъэмыджыр мы уахътэм агъэ­кIэжьы. Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытагъэу ащ IофшIэнхэр щырагъэжьагъэх.

Псэуалъэр зыгъэкIэжьырэ АО-у «Ростовавтомост» зыфиIорэм испециалистхэм яIофшIэн шапхъэхэм адиштэу зэрагъэцакIэрэм Адыгеим иводительхэр щыгъуазэх. Республикэм и Гъогу фонд иахъщэкIэ Мыекъопэ районым щагъэцэкIэжьыгъэ лъэмыджитIур мы органи­зациер ары зиIофшIагъэхэр. Джыри метрэ 31,58-рэ зикIыхьэгъэ лъэмыджым игъэцэкIэжьынкIэ «Адыгеяавтодорыр» къэралыгъо зэзэгъыныгъэм адыкIэт­хагъ.

ШышъхьэIу мазэм ащ IофшIэнхэр щырагъэжьагъэх. Псэуалъэр зыIыгъ пкъэоу жъы хъугъэхэр чIахыхи, ахэм ачIыпIэкIэ нахь лъагэхэу ыкIи автомашинэ нахь онтэгъухэри ыIэтынхэм тегъэпсыхьагъэхэр чIагъэуцуагъэх, лъэмыджыпкъыри, ащ телъ асфальтыри зэблахъугъэх.

Ащ фэдэу пытэ зэрашIыгъэм ишIуа­гъэкIэ мэкъумэщым пылъхэм япродукцие бэдзэршIыпIэхэм зэраращэлIэщт гъогур зэблахъун алъэкIыгъ. Джы автомобиль 500 фэдиз зы мафэм зыщызэблэкIырэ гъогум имэхьанэ нахь ин хъущт.

— Автотранспортэу рыкIощтыми, лъэсрыкIохэми ящынэгъончъагъэ къыдэтлъытэзэ лъэмыджым игъэкIэжьын пае проектыр дгъэхьазырыгъ, — къы­Iуагъ «Адыгеяавтодорым» псэолъэшIынымкIэ иотдел ипащэу Павел Бахтиным. — Лъэмыджым ыбгъуитIу— кIи лъэсрыкIохэм апае зэпырыкIыпIэхэр иIэнхэу, ахэр транспортым игъогу пыутыгъэнхэу дгъэнэфагъэ, лъэмы­джышIхэм ар агъэцэкIагъ.

Мы уахътэм зэпыдзапIэхэр агъэпытэх, нэужым тамыгъэхэр асфальтым щагъэтхъынхэшъ, зищыкIагъэр зэкIэри рыкIонэу къызэIуахыжьыщт.