Сэкъатныгъэ зиIэхэм я Дунэе мафэ ехъулIэу республикэм иправительствэ и Унэ зипсауныгъэ пыч фэхъугъэхэм, джащ фэдэу я VII – VIII-рэ Лъэпкъ чемпионатэу «Абилимпикс» зыфиIорэм текIоныгъэр къыщыдэзыхыгъэхэм дипломхэмрэ шIухьафтынхэмрэ щаратыжьыгъэх.

Адыгеим и ЛIышъхьэу КъумпIыл Мурат Iофтхьабзэр зэрищагъ. Джащ фэдэу ащ хэлэжьагъэх АР-м и Премьер-министрэ ипшъэрылъхэр зыгъэцэкIэрэ КIэрэщэ Анзаур, АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэкIэрэ Евгений Лебедевыр, АР-м IофшIэнымрэ социальнэ хэхъоныгъэм­рэкIэ иминистрэ игуадзэу Ирина Ширинар, сэкъатныгъэ зиIэхэм я Урысые обществэ и Адыгэ шъолъыр къутамэ итхьаматэу Агъырджанэкъо Симэ.

Къызэрэугъоигъэхэм шIуфэс къарихызэ республикэм и ЛIышъхьэ къызэрэхигъэщыгъэмкIэ, зипсауныгъэ пыч фэ­хъугъэхэм ягъэхъагъэхэр къыхэгъэщыгъэнхэр Адыгеим хэбзэшIу щыхъугъ.

«Гъэхъагъэу шъуиIэхэм тэ тарэгу­шхо. Ныбджэгъу лъапIэхэр, инэу ты­шъуфэраз ушэтыпIэу шъуапэкIэ къи­кIыгъэхэм шъугу зэряшъумыгъэгъэ­кIодырэм пае. Шъо шъуигъэхъагъэхэм яшIуагъэкIэ зипсауныгъэ пыч фэхъу­гъэ цIыфхэм яIофыгъохэм нахьышIум ылъэныкъокIэ обществэм фыщытыкIэу ахэм афыриIэр зэблэхъугъэ мэхъу, IэпыIэгъум нэмыкIэу шъори амалэу шъуиIэхэм ялъытыгъэу гъэхъэгъэ гъэнэфагъэхэр шъушIынхэ зэрэшъу­лъэкIырэр къэшъогъэлъагъо», — къыIуагъ КъумпIыл Мурат.

Адыгеим и ЛIышъхьэ къызэрэхигъэщыгъэмкIэ, зипсауныгъэ пыч фэхъугъэ нэбгырэ мин 32,7-м ехъу республикэм щэпсэу, ахэм ащыщэу нэбгырэ мин 1,8-р кIэлэцIыкIух. Республикэм ихэбзэ къулыкъухэм афэлъэкIыщтыр зэкIэ ашIэ къэралыгъор зэрафэгумэкIырэр, яфе­дэхэр ухъумагъэ зэрэхъухэрэр ахэм зэхашIэным пае.

Ащ къызэрэхигъэщыгъэмкIэ, респуб­ликэм игъэцэкIэкIо хабзэ ипшъэрылъ шъхьаIэхэм ащыщых а цIыф куп гъэнэфагъэм мылъкукIэ IэпыIэгъу фэхъугъэныр, япенсие аIэкIэгъэхьэгъэныр, медицинэм ылъэныкъокIэ яфэIо-фашIэхэр зэшIохыгъэнхэр. Сэкъатныгъэ зиIэхэм социальнэ IэпыIэгъу ятыгъэным къыдилъытэрэ Iофтхьабзэхэр республикэм зэрищыкIагъэм тетэу щызэрахьэх: фэгъэкIотэныгъэ хэлъэу Iэзэгъу уцхэр аIэкIагъахьэх, мазэ къэс ахъщэ араты, реабилитацием къыдилъытэрэ амалхэр арагъэгъотых, санаториехэмрэ гъэпсэфыпIэхэмрэ къащяIэзэнхэм ыкIи нэмыкI­хэм яамал араты.

2019-рэ илъэсым къыщыублагъэу АдыгеимкIэ социальнэ Iофтхьабзэхэм афэгъэзэгъэ мы­коммерческэ организациехэм зипсауныгъэ пыч фэхъугъэ цIыфхэм грант IэпыIэгъу араты. Республикэм и ЛIышъхьэ сэкъатныгъэ зиIэхэм ящыIэныгъэ нахь къафэгъэпсынкIэгъэным иIофыгъохэм къатегущыIэзэ къыхигъэщыгъ ащ фытегъэ­псыхьэгъэ Iофтхьабзэхэр Адыгеим зэрэщызэрахьэхэрэр. Я 2023 — 2025-рэ илъэсхэм къэ­ралыгъо программэм къыдыхэлъытагъэу сомэ миллион 22-рэ фэдиз ахэм апэIуагъэ­хьащт. А мылъкумкIэ Iэмэ-псымэхэр, оргтехникэр, мебелыр къащэфыщтых, специалистхэр агъэсэщтых, джащ фэдэу сэкъат­ныгъэ зиIэхэм яунагъохэм арыс­хэм щыIэныгъэм ахэр нахь зэрэхэгъозэщтхэмкIэ амал гъэ­нэфагъэхэр арагъэгъотыщтых.

«ХэушъхьафыкIыгъэу кIэлэегъаджэ, социальнэ IофышIэ пэпчъ сызэрэфэразэр къэс­Iонэу сыфай, сэкъатныгъэ зиIэхэм зишIуагъэ языгъэкIырэ, ахэм ящыIакIэ къафэзыгъэпсынкIэрэ пстэуми «тхьа­шъуегъэпсэу» ясэIо. Джащ фэдэу шъуигупсэхэм, къышъу­пэблагъэхэм, шъуиныбджэгъу­хэм — зэкIэ къышъукъоуцохэрэм сызэрафэразэр къы­­хэсэгъэщы», — къыIуагъ КъумпIыл Мурат.

ЗэIукIэгъум илъэхъан мы къы­кIэлъыкIохэрэм лъэныкъо зэ­фэшъхьафхэмкIэ Адыгэ Рес­публикэм ипремиехэр араты­жьы­гъэх: Николай Ждановым, Александр Тюменцевым, Дэгу­жъые Саидэ, Къэрдэнэ Марет, Виктория Корчак, Ангелина Мартиросян, Алина Пристанскаям, Шорэ Бислъан, Кучмэз Сусанэ ыкIи Хьахъурэтэ Светланэ.

Ащ нэмыкIэу Лъэпкъ чемпионатэу «Абилимпикс–2022» зыфиIорэм текIоныгъэр къыщыдэзыхыгъэхэм Адыгэ Респуб­ликэм и ЛIышъхьэ и Рэзэныгъэ тхылърэ чемпионатым исертификатхэмрэ щаратыжьыгъэх: дышъэ медаль къыдэзыхыгъэхэу Наталья Кобылянскаям, Валерия Дерягинам, Елена Суровам, Вячеслав Бедикян, джащ фэдэу тыжьын медаль къызфагъэшъо­шэгъэ Яна Чиняковам ыкIи джэрз медаль къэзыхьыгъэу Лаура Ересько.

Джащ фэдэу Адыгэ Респуб­ликэм и ЛIышъхьэ и Рэзэныгъэ тхылъ аратыжьыгъ кIэлэегъа­джэхэу ЛIэхъусэжъ Наталье, Ольга Цыганковам, Татьяна Величко ыкIи Марина Гришко, ахэм анэмыкIэу Мыекъопэ индустриальнэ техникумым ипащэу ЛIыунэе Мурат, дэеу зэхэзы­хыхэрэр ыкIи зылъэгъухэрэр зычIэс Адыгэ республикэ еджэпIэ-интернатым ипащэу Роман Чумаковым.

Iофтхьабзэм ыуж республи­кэм и ЛIышъхьэ ащ хэлэжьагъэ­хэм гущыIэгъу афэхъугъ. Сэкъат­ныгъэ зиIэхэм IэпыIэгъу ягъэ­гъотыгъэнымкIэ, щыIэныгъэм ахэр хэгъэгъозэжьыгъэнхэмкIэ чIыпIэхэм ащагъэцэкIэрэ IофшIэным ылъэныкъокIэ гъэхъагъэу ыкIи щыкIагъэу щыIэхэм шъхьа­фэу защигъэгъозагъ. Унэшъо гъэнэфагъэхэр штэгъэнхэм пае къаIуагъэхэр зэкIэ агъэнэфэнхэшъ, тапэкIэ къыдалъытэнхэу республикэм и ЛIышъхьэ пшъэ­рылъ къафишIыгъ.

ЗэIукIэгъум икIэухым Адыгеим и ЛIышъхьэ шIухьафтынхэр зыфагъэшъошагъэхэм джыри зэ афэгушIуагъ, гъэхъэгъакIэхэр ашIынхэу, шIоу щыIэр къадэхъу­нэу афэлъэIуагъ.

АР-м и ЛIышъхьэ ипресс-къулыкъу