Урысые Федерацием и Президентэу Владимир Путиным пшъэрылъ къызэрэфишIыгъэм тетэу УФ-м и Президент Къыблэ федеральнэ шъолъырымкIэ и Полномочнэ лIыкIоу Владимир Устиновым тыгъуасэ цIыфхэр ригъэблэгъагъэх. Видеоконференцие шIыкIэм тетэу кIогъэ Iофтхьабзэм шъолъырхэм япащэхэр хэлэжьагъэх.

Адыгеим и ЛIышъхьэу КъумпIыл Мурат, АР-м и Премьер- министрэ ипшъэрылъхэр зыгъэ­цэкIэрэ КIэрэщэ Анзаур, АР-м физическэ культурэмкIэ ыкIи спортымкIэ и Комитет итхьаматэу Дэгужъые Мурат, муниципальнэ образованиеу «Мые­къопэ районым» ипащэу Михаил Марьиныр Iофтхьабзэм хэлэжьагъэх.

Къыблэ федеральнэ шъо­лъырым исубъект зэфэшъхьаф­хэм ащыщхэм ялъэIу тхылъхэм ащ щахэплъагъэх, Адыгеим зы тхылъ къикIыгъэр. Мыекъопэ районымкIэ псэупIэу Первомайскэм щыщэу, культурэм и Унэу ащ дэтым ипащэу Эльвира Раскоповар къыкIэлъэIугъ псэупIэу Первомайскэм физкультурэмрэ псауныгъэм игъэпы­тэнрэ атегъэпсыхьэгъэ комплексэу щаублагъэм ишIын ыкIэм нэгъэсыгъэнымкIэ яшIуа­гъэ къарагъэкIынэу.

КъумпIыл Мурат къыIуагъ а IофыгъомкIэ унашъо зэраштэгъахэр ыкIи 2023-рэ илъэсым жъоныгъуакIэм нэс ар гъэцэкIагъэ зэрэхъущтыр. Гъогу картэм­рэ лъэпкъ проектэу «Демографиер» зыфиIорэмрэ атегъэ­псыхьагъэу IофшIэнхэр макIох, мылъкур федеральнэ, респуб­ликэ ыкIи муниципальнэ бюджетхэм якъэкIуапIэхэм къахэ­кIыщт.

Унашъор гъэцэкIагъэ зыхъу­кIэ, квадрат метрэ 687,1-рэ хъурэ спорт комплексыр псэупIэм къыдэтэджэщт, ащ хэтыщтых залитIу, тренировкэхэр зыщашIыщтхэ, зызщатIэкIыщт ыкIи нэмыкI IэпыIэгъу унэхэр. ЗипсауныгъэкIэ пыч зиIэхэм апае Iэмэ-псымэхэри къыда­лъытагъэх.

«Владимир Путиным спорт инфраструктурэм, къуаджэхэри къызэлъиубытхэу, зегъэу­шъомбгъугъэным тегъэпсыхьэгъэ пшъэрылъ къыгъэуцугъ. Ар гъэцэкIагъэ хъуным пае республикэм бэ щашIэрэр. Мыекъопэ районым изакъоу мы илъэсым спортым фытегъэпсыхьэгъэ комплекситIу щашIыгъ, псэупIэу Первомайскэм щагъэпсыщтыр ящэнэрэ хъущт. Илъэсэу къихьащтым Мыекъопэ районымкIэ къутыр­хэу Северо-Восточные Сады зыфиIорэмрэ Краснэ Улькэмрэ псауныгъэм игъэпытэн фытегъэпсыхьэгъэ ащ фэдэ спорт комплекситIу джыри ащытшIыщт», — къыхигъэщыгъ Адыгеим и ЛIышъхьэ.

Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым республикэм и ЛIышъхьэ пшъэ­рылъ къыфишIыгъ спорт коплексым ишIынкIэ унашъоу ашта­гъэр игъом гъэцэкIагъэ хъуным пае Iофтхьэбзэ гъэнэфагъэхэр ихъу­хьэгъэнхэм ынаIэ тыригъэтынэу.

АР-м и ЛIышъхьэ ипресс-къулыкъу