«Урысыгу зиIэ лIыхъужъхэр» зыцIэ сурэт къэгъэлъэгъонэу республикэм искусствэхэмкIэ иколледжэу Тхьабысымэ Умарэ ыцIэ зыхьырэм къыщызэIуахыгъэр мэхьанэшхо зиIэ хъугъэ-шIагъэу щыт. Iофтхьабзэм кIэщакIо фэхъугъэр, УФ-м зыкъэухъумэжьынымкIэ и Министерствэ иIэпыIэгъоу, Урысые дзэ-тарихъ обществэр ары.

Апэдэдэ мы сурэт къэгъэлъэгъоным 2022-рэ илъэсым шы­шъхьэIум Москва, Гоголым ыцIэ зыхьырэ бульварым нэIуасэ щыфашIыгъэх. Мы проектыр 1943 — 1944-рэ илъэсхэм нэмыц-фашист техакIохэм апэуцужьхи, Украинэр шъхьафит зышIыжьыгъэ Дзэ Плъыжьым хэтыгъэхэм лIыблэнагъэу зэра­хьагъэм, джащ фэдэу мы мафэ­хэм хэушъхьафыкIыгъэ дзэ операцием хэлэжьэрэ лIыхъужъ­хэм япсэемыблэжьныгъэ афэгъэхьыгъ.

Iофтхьабзэм пэублэ гущыIэ къыщишIыгъ УФ-м и ЛIыхъу­жъэу, АР-м и Къэралыгъо Совет — Хасэм идепутатэу Цэй Эдуард.

— Къэгъэлъэгъоным мэхьанэшхо иI. ЛIыхъужъныгъэм­рэ блэнагъэмрэ ящысэу зищыIэныгъэ щытыгъэ цIыф­хэр, тикъалэ зэрыгушхохэрэр, къыт­кIэхъухьэ­хэрэмкIэ щысэтехыпIэу щытхэр тщымыгъуп­шэнхэм иамал ащ къеты, — къыIуагъ Цэй Эдуард.

Тарихъ шIэжьым икъэухъумэн­кIэ, тикъэралыгъо илIыхъужъхэм шъхьэкIафэ афэшIыгъэнымкIэ мы къэгъэлъэгъоным мэхьанэшхо зэриIэр, къыткIэхъу­хьэрэ лIэужхэм яхэгъэгу шIу алъэгъоу пIугъэнхэмкIэ мыщ фэдэ Iоф­тхьабзэхэр нахьыбэу зэхэщэ­гъэн­хэ зэрэфаер къыIуагъ АР-м иветеранхэм я Совет итхьаматэу Къоджэ Аслъан.

— Мы зэхахьэм мэхьанэу иIэр шIэжьыр ары. ТапэкIэ щыIэгъэ Хэгъэгу зэошхом хэ­кIодагъэхэр зыщыдгъэгъупшэ­хэ хъущтэп. ЯцIыкIугъом къы­щы­­ублагъэу яхэгъэгу шIу алъэгъоу къыткIэхъухьэрэ ныб­­жьыкIэхэр пIугъэнхэ фае. Ар типшъэрылъ шъхьаI, — къы­Iуагъ Советскэ Союзым и ЛIыхъу­жъэу Нэхэе Даутэ икIалэу Юрэ.

Мы къэгъэлъэгъоным къырахьылIагъэх зыфэдэ щымыIэ сурэт техыгъэхэр, тын лъапIэу къаратыгъэхэм яшыхьат документхэм атехыгъэхэр ыкIи лIыхъужъхэм зэрахьэгъэ лIыблэнагъэр къизыIотыкIырэ тарихъ тхыгъэхэр. Ахэм ахэлъых разведчикхэм, десантникхэм, танкистхэм, летчикхэм, хы пехотинцэхэм, медицинэ къулыкъум ибзылъфыгъэ лIыхъужъхэм ыкIи нэмыкIыбэм афэгъэхьыгъэ тхыгъэхэр, гукъэкIыжьхэр, письмэхэр.

Хэгъэгу зэошхом илъэхъан Донбасс ыкIи Харьков шъхьафит ашIыжьызэ лIыхъужъныгъэ ыкIи лIыблэнагъэ зэрэзэрахьагъэм фэшI Дзэ Плъыжьым идзэкIолI мин пчъагъэмэ Советскэ Союзым и ЛIыхъужъыцIэр афагъэшъошэгъагъ. Ащыгъум тихэгъэгу ишъхьафитыныгъэ зэкъотхэу фэбэнагъэх тикъэралыгъошхо щыпсэурэ лъэпкъ зэфэшъхьаф­хэр. Iофтхьабзэм хэлэжьагъэх рес­публикэ парламентым идепутатхэр, гъэцэкIэкIо хабзэм икъулыкъухэм, къэлэ администрацием, ветеран организациехэм ялIыкIохэр ыкIи юнармейцэхэр.

КIарэ Фатим.