Тыгъуасэ агъэшIуагъэхэм ахэтыгъэ Шорэ Бислъан пэрыохъоу ипсауныгъэ изытеткIэ къэуцухэрэм къагъащтэрэп. Къызыхъугъэм къыщегъэжьагъэу ащ дэеу елъэгъу.

ЩыIэныгъэм ипэрыохъухэр зэпичыхэзэ, спортым зыкъыхигъотагъ, чанэу общественнэ щыIакIэм хэлажьэ. Ащ ишыхьат зипсауныгъэ амалхэр зэщыкъуа­гъэхэм культурэм, спортым, творчествэм, гъэсэныгъэм алъэ­ныкъокIэ гъэхъэгъэшIухэр зэра­шIыхэрэм ыкIи республикэм ищыIэныгъэ чанэу зэрэхэлажьэ­хэрэм афэшI Адыгэ Республи­кэм и ЛIышъхьэ ыцIэкIэ агъэ­нэфэгъэ шIухьафтыныр мыгъэ къызфагъэшъошагъэхэм ар зэращыщыр.

Бислъан илъэс 21-рэ ыныбжь, Мыекъуапэ къыщыхъугъ ыкIи щэпсэу. Дэеу зэхэзыхырэ ыкIи зымылъэгъухэрэ кIэлэцIыкIухэр зычIэс Адыгэ республикэ интернатым щеджагъ. Нэужым Мыекъопэ къэралыгъо технологическэ университетым ландшафт-дизайнымкIэ ифакультет чIэхьагъ.

— Илъэс заулэрэ ащ сыщеджагъэу сыгукIэ къызэрэспэмыблагъэр, Iоф зэрэрысымышIэшъущтыр къызызгурэIом, ситхылъхэр къычIэсхыжьыгъэх, — къеIуатэ Бислъан. — Джы къэкIощт илъэс еджэгъум Адыгэ къэралыгъо университетым психологиемкIэ ифакультет сычIэхьажьы сшIоигъу.

Зипсауныгъэ амалхэр зэщыкъогъэ кIэлэцIыкIухэм хэхъоныгъэ ашIынымкIэ, обществэм хэгъэгъозэгъэнхэмкIэ мэхьанэ зиIэхэм физическэ культурэр ыкIи спортыр ащыщых. Джащ фэдэу мыхэр социальнэу ухъу­мэгъэнхэм ыкIи гъэхъагъэхэр ашIынхэм спортыр ыкIи физкультурэр фэIорышIэх. Ежь Шорэ Бислъан сэкъатныгъэ зиIэхэм азыфагу Урысыем, республикэм, къалэм щызэхащэрэ спорт зэнэкъокъухэм зэкIэми ахэлажьэ ыкIи текIоныгъэхэр къыдехых. Ахэм зэу ащыщ шахматыр, къэпкIэныр, «кегли» ыкIи голболыр. Анахьэу тигущыIэгъу ыгу рихьырэр ыкIи зэмызэщэу зызфигъасэрэр голболыр ары.

— Спорт лъэпкъхэм ащыщэу голболым зымылъэгъу­хэрэр фэкъулаих, — еIо Бислъан. — Макъэ зыпыIукIырэ пIырагур зэфа­дзызэ, джэхашъом телъхэу мэджэгух. Мафэ къэс тренировкэхэм сызщеджэгъэ еджэпIэ-интернатым сэкIо. Сыда пIомэ а спорт лъэпкъым зыфэбгъэсэнымкIэ амалышIухэр щызэтырагъэпсыхьагъэх: спортзал ин нэфынэшхор, тренажерхэр зыдэщыт къогъур, спорт инвентарьхэр. Анахьэу джы сызфэбанэ­рэр голболымкIэ Урысые чемпионатым текIоны- гъэ къыщыдэсхэныр ары.

Бислъан спортым имызакъоу, компьютер, телефон Iофхэм дэгъоу ахешIыкIы. Ахэр къызфигъэфедэхэзэ, джэгукIэ зэфэшъхьафхэр зэригъэшIагъэх, ныбджэгъухэр зэригъэгъотыгъэх. БэмышIэу «Хьафизэхэм я Урысые обществэ» игупчэ ГъэIорышIапIэ щызэхэщэгъэ ныбжьыкIэхэм я Совет Адыгеим илIыкIоу Бислъан хагъэхьагъ.

Шорэ Бислъан янэу Заремэ гущыIэгъу тыфэхъугъ. Ар ыпшъэ­кIэ зигугъу къэтшIыгъэ еджэпIэ-интернатым зымылъэгъурэ кIэлэегъаджэу компьютер шIэныгъэр языгъэ­хьырэм исекретарэу Iоф щешIэ.

— ТиунагъокIэ тицIыкIугъом къыщегъэ­жьагъэу дэеу зэрэтлъэ­гъурэм­кIэ Iофыгъор тиI, — къе­Iуа­тэ Заремэ. — Сэ сянэ-сятэхэр джащ фэдэх, сишъхьэгъусэу Алим яти ежьыри ащ фэдэх, сикIэли­тIуи зэрамылъэ­гъурэмкIэ сэ­къат­ныгъэ яI. Ау ахэм зэкIэми щыIэныгъэм зыкъыхагъотагъ, афэлъэкIыщт IофшIэнхэр агъэ­цакIэх. Унагъом ышъхьэу Алим хьылъэIэтэу мэлажьэ, анахьыжъ кIалэм илъэс 24-рэ ыныбжь, компьютер Iофхэм апылъ, бэмышIэу къыщагъ. Бислъан игугъу къэтшIыгъах.

Бзылъфыгъэм къызэриIуа­гъэмкIэ, сэкъатныгъэ зиIэхэм фэгъэкIотэнэу къэралыгъом къаритырэр зэкIэ къаIокIэ. Унагъор 1998-рэ илъэсым къыщегъэжьагъэу унэе псэупIэ зэрямыIэмкIэ чэзыум хэтыгъэх. Мэзэ заулэкIэ узэкIэIэбэжьмэ, Шорэхэм яунагъо къэбар гушIуа­гъор къафэсыгъ – сертификат къаратыгъ ыкIи фэтэрищэу зэхэт унэу джы зэрысхэр къащэфыгъ.

Бислъан къыфэдгъэзэжьымэ, игухэлъышIоу зыдиIыгъхэр къы­дэхъунхэу, ыпэкIэ лъыкIотэнэу фэтэIо.

Iэшъынэ Сусан.