Шъолъыр общественнэ организациеу «Врачхэм я Хасэ» иятIонэрэ зэIугъэкIэгъу Урысые Федерацием и Правительствэ дэжь щыIэ финанс университетым щыкIуагъ.

Зэхэсыгъом хэлэжьагъэхэм шIуфэс къарихыгъ Хасэм итхьамэтэ гъэшIуагъэу, Москва дэс адыгэ нахьыжъхэм я Совет итхьаматэу Агъырбэ Юрэ.

Зэхэсыгъом хэлэжьагъэх Уры­сые Федерацием и Правительствэ дэжь щыIэ финанс университетым ипрезидентэу Эскиндар Михаил, Адыгэ Рес­публикэм ыцIэкIэ Урысые Федерацием исенаторхэу Хъопсэрыкъо Муратрэ Александр Наролинымрэ, Къэрэщэе-Щэр­джэс Республикэм ыцIэкIэ Урысые Федерацием исенаторэу Къэзанэкъо Къырым, Мыекъопэ къэралыгъо технологическэ университетым ипащэу Къуижъ Саидэ, медицинэ клиникэ, научнэ организацие пэрытхэм — нэм еIэзэгъэнымкIэ научнэ-ушэтэкIо институтэу М. Крас­новым ыцIэкIэ щытым, Урысые ушэтэкIо медуниверситетэу Н. Пироговым ыцIэкIэ щытым, Московскэ къэралыгъо университетым имедицинэ научнэ гупчэу Ломоносовым ыцIэ зыхьырэм, кIэлэцIыкIу хирургиемкIэ ыкIи травматологиемкIэ научнэ-ушэтэкIо институтым, кIэлэцIыкIу къэлэ клиникэ сы­мэджэщэу Н. Филатовым ыцIэ зыхьырэм, IэпыIэгъу псынкIэмкIэ научнэ-ушэтэкIо институтэу Н. Склифосовскэм ыцIэкIэ щытым, Адыгеим, Краснодар краим, Къэбэртэе-Бэлъкъарым, Къэрэщэе-Щэрджэсым яIэзапIэхэм яшIэныгъэлэжь-медикхэр.

«Врачхэм я Хасэ тызэрипхыгъ. ПIэлъэ кIэкIым къы­кIоцI шIуагъэ къы­хьын зэри­лъэкIыщтыр ащ къыгъэлъэ­гъуагъ. Мы илъэсым хъугъэ- шIэгъэшхохэр къэхъугъэх: Хасэм юридическэ статус иIэ хъугъэ, апэрэу научнэ-практическэ конференцие Адыгэ Рес­пуб­ликэм щызэхащагъ. Куп цIыкIоу ежъугъажьи нэбгыри 110-м ехъу зыхэхьэрэ организацие шъухъугъ. Ащ хэтхэм азыныкъо нахьыбэр тилъэпкъэгъух», — къыIуагъ Агъырбэ Юрэ.

Врачхэм я Хасэ итхьаматэу, медицинэ шIэныгъэхэмкIэ докторэу, штатым хэмыт кIэлэ­цIыкIу специалист шъхьаIэу, къалэу Москва псауныгъэр къэухъумэгъэнымкIэ и Департамент иней­рохирургэу, псауныгъэр къэу­хъу­мэгъэнымкIэ къэралыгъо бюд­жет учреждениеу «КIэлэцIыкIу хирургиемкIэ ыкIи травматологиемкIэ научнэ-ушэтэкIо институтым» нейро­хирургиемкIэ ыкIи нейротравмэмкIэ иотделение ипащэу Семенова Жаннэ Хасэм пшъэры­лъэу иIэхэм, Адыгэ Рес­публикэм ахэр къызэкIохэм рахъухьагъэ­хэм къатегущыIагъ. Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем пса­уныгъэр къэухъумэгъэнымкIэ зигъо Iофыгъоу щыIэхэм, специалист пэрытхэм зэдэлэжьэныгъэу адыряIэщтхэм ягугъу къы­шIыгъ.

Врачхэм я Хасэ итхьамэтэгъоу, экономикэ шIэныгъэхэмкIэ докторэу, Мыекъопэ къэралыгъо технологическэ университетым ипащэу Къуижъ Саидэ МКъТУ-р джырэ медицинэм пае кадрэхэр къэзыгъэхьазырырэ гупчэу зэрэ­щытым фэгъэхьыгъэу зэхэсыгъом хэлажьэхэрэм къафиIо­тагъ. Хасэм хэтхэм ягъусэу МКъТУ-м имединститут технологиякIэхэр зэрэщагъэфедэщтхэ шIыкIэм нэIуасэ фишIыгъэх.

Апшъэрэ медицинэ еджапIэхэм ястудентхэм атегъэпсы­хьэгъэ программэу «Наставничество» зыфиIоу сенаторэу Хъопсэрыкъо Мурат япащэу пхыращырэм, ныбжьыкIэхэм яшIэныгъэ агъэфедэнымкIэ амалэу яIэхэм афэгъэхьыгъэу Адыгэ Республикэм иныбжьыкIэхэу врач IофшIэныр езыгъэ­жьэгъакIэхэм къаIотагъ. Предложение пстэуми къадырагъэштагъ, лъэныкъо зэфэшъхьаф­хэмкIэ IофшIэн планэу зэхагъэ­уцуагъэм ахэр хагъэхьагъэх.

Адыгэ Республикэм и ЛIышъхьэу КъумпIыл Мурат пшъэрылъ къызэрэфишIыгъэм тетэу сенаторэу Хъопсэрыкъо Мурат юбилей медалэу «Адыгэ Респуб­ликэр загъэпсыгъэр илъэси 100 хъугъэ» зыфиIорэр Агъырбэ Юрэ Юсыф ыкъомрэ Эскиндар Михаил Абдурахьман ыкъомрэ аритыжьыгъ.

Шъугу къэтэгъэкIыжьы Мыекъопэ къэралыгъо технологическэ университетым щыкIогъэ дунэе научнэ-практическэ конференциеу «Актуальные вопросы науки и практики в современной медицине: междисциплинарный подход, современные тренды» зыфиIорэм къыдыхэлъытагъэу, Адыгэ Республикэм ия 100-рэ илъэс ехъулIэу врачхэм я Хасэ иапэрэ зэIукIэ Адыгеим зэрэщызэхащэгъагъэр, тиреспубликэ и ЛIышъхьэу Къум­пIыл Мурат ащ зэрэхэлэжьэгъагъэр.