Тыгъэгъазэм и 1-м къыщегъэжьагъэу и 3-м нэс Адыгэ къэралыгъо университетым Дунэе форумэу «Лъэпкъ цIыкIухэм якультурэрэ яныдэлъфыбзэрэ дунаим зэрэхэгъэщагъэхэр» зыфиIорэр щыкIуагъ.

Бзэм икъызэтегъэнэжьын фэгъэхьыгъэ Iоф­тхьэбзэ гъэнэфагъэхэр мыщ епхыгъэу зэхащагъэх. Ахэм зэу ащыщ этнокультурнэ гъэсэныгъэ гупчэу «АдыгLand» зыфиIорэр къызэрэзэIуахыгъэр. Мыщ епхыгъэу Дунэе онлайн-проектэу «Лэущыр» («Черкесский олененок») зыфиIорэри зэхащагъ.

Iофтхьабзэм республикэм ирайон зэфэшъхьаф­хэм къарыкIыгъэ кIэлэеджэкIо 43-рэ хэлэжьагъ, сыхьатым къыкIоцI кIэлэцIыкIухэм упчIэ 50-мэ яджэуапхэр аратыжьыгъэх. Адыгэ культурэм, тарихъым афэгъэхьыгъэ упчIэхэр ахэм ахэтыгъэх.

ТекIоныгъэ къыдэзыхыгъэр Улэпэ урыт еджапIэу N 9-м щеджэрэ Губжьэкъо Тамил. Балл 50-м щыщэу 49-рэ къырихыгъ. Ащ шIухьафтынэу планшет ратыгъ.

«АдыгLand» зыфиIорэ гупчэр я 8 — 10-рэ классхэм ащеджэхэрэм атегъэпсыхьагъ. Мазэм зэ, шэмбэтым, Iофтхьэбзэ гъэшIэгъонхэр зэхащэщтых. Адыгэ филологиемрэ культурэмрэкIэ факультетым сыхьатыр 10-м къыщегъэжьагъэу 3-м нэс Iоф ышIэщт. Мазэ къэс адыгабзэм фэгъэхьыгъэ темэ зэфэшъхьафхэр джэгукIэ шIыкIэм тетэу зэхафыщтых. Дунэе форумым фэгъэхьыгъэ тхыгъэ нахь игъэкIотыгъэ тапэкIэ къыхэтыутыщт.

ДЕЛЭКЪО Анет.