АмышIэрэ ЗэолIым и Мафэ илъэс къэс тыгъэгъазэм и 3-м тихэгъэгу щыхагъэунэфыкIы.

А мафэр зыкIагъэнэфагъэм ошIэ-дэмышIагъэ хэлъэу щытэп. 1966-рэ илъэсым советскэ дзэкIолIхэм якъэ АмышIэрэ ЗэолIым ихьадэ къупшъхьэхэр къычIа­хыжьхи, Московскэ Кремлым дэжь Александровскэ садым щагъэтIылъыжьыгъэх. АмышIэрэ зэолIым зэрихьэгъэ лIыхъужъныгъэр ащымыгъупшэным пае шIэжь мафэм игъэнэфэн кIэщакIо фэхъу­гъэхэр лъыхъуакIохэр зыхэт организациер ары. 2014-рэ илъэсым шэкIогъум Урысыем и Президентэу Владимир Путиныр ащ епхыгъэ унашъом кIэтхэжьыгъ.

ТекIоныгъэм пае зыпсэ зыгъэтIылъыгъэ, зыцIэ амышIэрэ лIыхъужъхэр илъэс къэс мы мафэм агу къагъэкIыжьых. А хъугъэ-шIагъэм епхыгъэу гъэсэныгъэ зыщарагъэгъотырэ учреждение пстэуми шIэжьым иурокхэр ащызэхащэх.

Хэгъэгу зэошхом ыкIи нэмыкI Iэшэ зэпэуцужьыныгъэхэм ялъэхъан зэолIхэм зэрахьэгъэ лIыхъужъныгъэр зэращымыгъупшэрэм итамыгъэу мы мафэм къэгъэгъэ блэрхэр мемориальнэ комплекс­хэм акIэлъыралъхьэх.

Специалистхэм къызэрэрадзагъэмкIэ, Адыгеим икIи заом Iухьэгъэ зэолI мин 16-м фэдизмэ непэ къызнэсыгъэм къа­рыкIуагъэр ашIэрэп.