Пшызэ къэзэкъыдзэм и Мыекъопэ отдел изэ­хахьэ джырэблагъэ щыIагъ.

Iофтхьабзэм хэлэжьагъэх Краснодар краим ивице-губернаторэу, Пшызэ къэзэкъыдзэм ипащэу Александр Власовыр, Адыгэ Республикэм и ЛIышъхьэрэ иминистрэхэм я Каби­нетрэ я Администрацие ипащэу Владимир Свеженец, Адыгеимрэ Краснодар краимрэ яхэбзэ­ухъумэкIо къулыкъухэм ялIыкIохэр, Адыгеим идинлэжьхэр, илъэпкъ общественнэ организациехэм япащэхэр, Мыекъопэ къэзэкъ отделым къепхыгъэ район обществэхэм, къэзэкъ ныбжьыкIэхэм я Союз, къэбар жъугъэм иамалхэм ялIыкIохэр.

Адыгэ Республикэм и ЛIы­шъхьэу КъумпIыл Мурат ыцIэкIэ Владимир Свеженец зэхахьэм къекIолIагъэхэм шIуфэс къари­хыгъ. Мыекъопэ къэзэкъ отделым непэ Iофышхо зэрэзэшIуи­хырэр, дзэ-патриотическэ пIуныгъэмкIэ зызэригъэчанырэр, хэушъхьафыкIыгъэ дзэ операциеу Украинэм щыкIорэм къэзэкъхэр зэрэхэлажьэхэрэр, рес­публикэр тапэкIи къэзэкъхэм IэпыIэгъу зэрафэхъущтыр ащ къыхигъэщыгъ.

Александр Даниловым мы илъэсым гухэлъэу яIагъэхэр зэ­­рагъэцэкIагъэр зэхахьэм къы­щиIуагъ. Къэзэкъхэр чанэу куль­турнэ Iофтхьабзэхэм зэрахэ­лэжьагъэхэр, дзэ комиссариат­хэм, урыс чыристан чылысым, лъэпкъ общественнэ организациехэм зэдэлэжьэныгъэ зэрады­ряIагъэр, ныбжьыкIэхэм дзэ­-патриотическэ пIуныгъэ тэрэз ягъэгъотыгъэнымкIэ Iофышхо зэрашIагъэр, лъыхъон Iофтхьабзэхэм зэрахэлэжьагъэхэр, рэ­хьатныгъэм, тыкъэзыуцухьэрэ дунаим, псэушъхьэхэм якъэу­хъу­мэн фэгъэзэгъэ къэзэкъ дру­жинэхэм зэрахэтхэр атаманым къыхигъэщыгъ.

УФ-м и Президент 2022-рэ илъэсым Iоныгъом и 21-м ышIыгъэ унашъоу N 647-р зытетэу «Частичнэ мо­билизацие Урысые Федерацием зэрэщыкIощтымкIэ цIыф­хэм макъэ ягъэIугъэным ехьы­лIагъ» зыфиIорэм тетэу хэу­шъхьафыкIыгъэ дзэ операциер зыщыкIорэ чIыпIэм къэзэкъ 41-рэ ащагъ, контракт адэзышIыгъэ къэзэкъ 63-мэ Урысые Фе­дерацием и УIэшыгъэ КIуа­чIэхэм къулыкъу аща­хьы, хэу­шъхьафыкIыгъэ дзэ опе­рацием хэлажьэх.

Мыекъопэ къэзэкъ отделым иунашъокIэ Мостовской районым икъэзэкъ обществэрэ (ата­маныр Сергей Родионов) Мые­къуапэ икъэзэкъ обществэрэ (атаманыр Виктор Остапенко) анахь пэрытхэу зэхахьэм ща­лъытагъэх. Мыекъопэ къэзэкъ отделым хэтыщтхэр, 2023-рэ илъэсым Iофтхьэбзэу зэхащэщт­хэр, Пшызэ къэзэкъы­дзэм изэ­хахьэ агъэкIощт къэзэкъхэм яспискэ мы мафэм аухэсыгъэх.