Мыекъопэ районымкIэ псэупIэу Каменномостскэм дэс къэзэкъхэм яатаманэу Моисеев Андрей Николай ыкъом гуфэкIо купмэ ахэтэу непэ тихэгъэгу ифе­дэхэр къегъэгъунэ.

Пэщэ чанэу зэрэщытыр, къэзэкъхэм лъытэныгъэшхо къызэрэфашIырэр къыда­лъытэзэ, хэушъхьафыкIыгъэ дзэ операцием хэлэжьэрэ отрядым и Мыекъопэ къэзэкъ отдел ипащэу ар агъэнэфагъ.

Андрей Моисеевым унэгъо зэгурыIожь иI, псэу­шъхьэхэм къадекIокIыныр икIас. Мы аужырэ илъэс­хэм ишъыпкъэу шыхъуным пылъ, шэщи иI. Автомас­терскоим щылэжьэрэ икIа­лэу Александр игъусэу шыоу узэрэзекIощт шIыкIэм ныбжьыкIэхэр фегъасэх. Шыу зекIохэм, къэзэкъ мэ­фэкIхэм игуапэу ар ахэ­лажьэ, пэсэрэ къэзэкъ щы­гъынхэмрэ Iашэхэмрэ тарихъэу апылъыр шIоIофэу зэрегъашIэ.

Андрей Моисеевыр ана­хьэу зыкIэхъопсырэр Каменномостскэм чIыгу къащыIихынэу, къэзэкъхэм шы спорт, культурэ Iофтхьабзэ­хэр зыщызэхащэщт чIы­пIэ зэтыригъэпсыхьанэу ары.

Атаманым унагъо зи­шIагъэр илъэс 26-рэ хъугъэ. Ащ ишъхьэгъусэу Любовь сыдрэ лъэныкъомкIи кIэгъэкъон пытэу иI. Бзылъфыгъэр унэе ветеринар клиникэм илъэс 25-рэ хъу­гъэу щэлажьэ.

— Зыгъэпсэфыгъо ма­фэхэм зэрэунагъоу зекIо тызэрэкIорэм, тиреспуб­ликэ ичIыпIэ дахэхэр зэ­рэзэдгъэлъэгъухэрэм гухахъо ахэтэгъуатэ. Джащ фэдэ мафэхэм гу лъы­тымытэу уахътэр псынкIэу макIо, гу зэщэтэфэ, — къе­Iуатэ бысымгуащэм.

Андрей Моисеевым дзэ пшъэрылъхэр зэригъэца­кIэрэм къыхэкIэу хъызмэт, унэгъо Iофхэм язехьан зыпшъэ дэкIырэр ишъхьэгъусэу Любовь ары. ИлъфыгъитIуи ащ IэпыIэгъу- шIоу иIэх.

ХэушъхьафыкIыгъэ дзэ операцием хэлэжьэрэ къэ­зэкъхэм яшъхьэгъусэхэмрэ янэхэмрэ я Совет итхьаматэу ар агъэнэфагъ. Мые­къопэ районым идзэ комиссариатрэ администрациемрэ бзылъфыгъэр адэлажьэ, зигъо Iофыгъохэм язэшIохынкIэ IэпыIэгъу афэхъу, тидзэ къулыкъу­шIэхэм шIушIэ IэпыIэгъур афэугъоигъэнымкIэ ишIуагъэ къегъакIо.

Моисеевхэм апхъоу Валерия искусствэхэмкIэ Адыгэ республикэ колледжэу Тхьабысымэ Умар ыцIэ зыхьырэм щеджэ. Къэзэкъ культурэм ишъо­лъыр фестивалэу Тульскэм щыкIуагъэм къэзэкъ къа­шъор дахэу къызэрэщишIыгъэм фэшI мыгъэ ащ апэрэ чIыпIэр къыфагъэшъошагъ.

Мыхэм яунагъо исхэр Iофтхьэбзэ пстэуми ахэла­жьэх. ГущыIэм пае, ИлъэсыкIэ мэфэкIхэм япэгъокIэу ныбжьыкIэхэр ягъусэхэу рождественскэ спектаклэу агъэхьазырхэрэр Мыекъопэ районым ичIыпIитIумэ къащагъэлъэгъощтых.

Моисеевхэм яунагъо на­сып зыкIилъыр ыкIи ар зыгъэпытэрэр ятэжъ пIа­шъэхэр зэрагъэлъапIэхэрэр, унэгъо кIоцIым илъ хабзэхэм зэрадэмыхы­хэ­рэр, зэрэзэфэгумэкIыжьхэ­рэр, псэушъхьэхэм къаде­кIокIынхэр зэрякIасэр ары.

Екатерина Загорулько.

Мыекъуапэ икъэзэкъхэм япащэ игуадз.