Лъэпкъ проектэу «ПсэупIэр ыкIи къэлэ щыIакIэр» зыфиIо­рэм игъэцэкIэн тегъэпсыхьэгъэ шъолъыр программэу жъы хъугъэу, зэхэоным нэсыгъэ унэхэм ачIэсхэм ягъэкощын фэгъэхьыгъэр 2019-рэ илъэсым къыщыублагъэу Адыгеим щыпхыращы.

АР-м псэолъэшIынымкIэ, транспортымкIэ, псэупIэ­-коммунальнэ ыкIи гъогу хъызмэтымкIэ и Министерствэ ипроизводственнэ-­техническэ отдел ипащэу Ольга Смирновам тызэрэщигъэгъозагъэмкIэ, фэтэ­ры­бэу зэхэт унэ 29-мэ ачIэсхэу нэбгырэ 441-рэ проектым къыхеубытэ, ар квадратнэ метрэ 7920-рэ мэхъу. Мыхэр 2017-рэ илъэсыр ары жъы хъугъэ­хэу, зэхэоным нэсыгъэкIэ залъытагъэхэр. ПIалъэ­хэмкIэ, 2025-рэ илъэ­сым ыкIэм нэс ахэм цIыф­хэр къачIэщыжьыгъэнхэ фэягъ.

— Арэу щытми, IофшIэн­хэр нахь агъэпсынкIэн­хэшъ, ащ фэдизрэ пымы­лъынхэу, псэукIэ амал тэ­рэзхэр зиIэ унэхэм цIыф­хэр нахьыжьэу ачIагъэтIысхьажьынхэу респуб­ликэм пшъэрылъ зыфи­гъэуцужьыгъ ыкIи ар гъэцэкIагъэ зэрэхъурэр уахътэм къыгъэлъэгъуагъ, —къыхигъэщыгъ Ольга Смир­новам.

Къалэу Мыекъуапэ, къэ­лэ гъэпсыкIэ зиIэ поселкэу Яблоновскэр, Кощхьэблэ ыкIи Мыекъопэ районхэр ары мы программэм къыхиубытэхэрэр. IофшIэнхэр зэрагъэпсынкIагъэхэм ишIуагъэкIэ 2020-рэ илъэсым ыкIэм нэс Адыгеим икъэлэ шъхьаIэрэ поселкэу Яблоновскэмрэ адэсхэу программэм къыхиубытагъэхэр зытефэщтыгъэхэр агъэкощыгъэх. Квадратнэ метрэ 560-м ехъу ахэм ашIи атIупщыгъ.

Ащ ишIуа­гъэкIэ унэгъо 16-мэ шэп­хъакIэхэм адиштэрэ уна­кIэхэр яIэ хъугъэ.

Ольга Смирновам къызэриIуагъэмкIэ, Кощхьэблэ ыкIи Мыекъопэ районхэмкIэ программэм игъэцэкIэн мы мазэм ыкIэм нэс аухыщт. IофшIэнхэм япроцент 95-р хагъэкIыгъах. Ащ тетэу 2019-рэ илъэсым рагъэжьэгъэ программэр илъэситIукIэ нахьыжьэу зэфашIыжьыщт.

ПстэумкIи сомэ мил­лион 297-м ехъу жъы хъугъэ унэхэм ачIэсхэм ягъэкощын пэIухьанэу къалъы­тэгъагъ. Ащ щыщэу сомэ миллион 255-р къэралыгъо корпорациеу, псэупIэ-коммунальнэ хъызмэтыр гъэ­кIэжьыгъэнымкIэ Фондым имылъку къыхэхыгъ, сомэ миллиони 2-рэ мин 500-р республикэ бюджетым, сомэ миллион 39-р муниципальнэ образованиехэм къыхалъхьагъ.

ХЪУТ Нэфсэт.