ГазификациемкIэ программэу Адыгеим щагъэцакIэрэм диштэу газ­рыкIуапIэхэр зыщыпхырыщыгъэ псэупIэхэм адэт унэхэм яхапIэ нэс ыпкIэ лъамытэу гъэстыныпхъэ шхъуантIэр аращалIэ.

А программэм къыдыхэлъытагъэу газрыкIуапIэ зиIэ псэупIи 180-мэ адэт унэ мини 6,2-м ехъумэ газыр аращэлIэщт. Ащ епхыгъэу зэзэгъыныгъэ 4356-рэ адашIыгъ, ащ щыщэу 1756-р мы илъэсым афагъэцэкIэщт.

Зигугъу къэтшIыгъэ программэм диштэу ыпкIэ лъамытэу цIыфхэм яхапIэхэм газыр аращэлIэщт. Адрэ къэнэрэ фэIо-фашIэм ыпкIэ ежь-ежьырэу атыжьыщт. ГазификациемкIэ товархэмрэ фэIо-фашIэхэмрэ гурытымкIэ сомэ мини 140-рэ атефэ. УнагъомкIэ ар ахъ­щэшху, зэкIэми ар афэукIочIынэу щытэп.

Мы программэр социальнэу зэрэщытыр, Президентэу Владимир Путиным пшъэрылъэу къафишIыгъэхэр къыдалъытэхэзэ, 2022-рэ илъэсым мэлылъфэгъум и 8-м къыщегъэжьагъэу газым ищэнкIэ цIыф куп заулэ­мэ зэтыгъо ахъщэ IэпыIэгъу ара­тэу аублагъ. АР-м и ЛIышъхьэ унашъо зэришIыгъэм тетэу мобилизацием къыхиубытагъэ­хэри, зэзэгъыныгъэ адэзышIыгъэхэри, гуфакIохэри фэгъэкIо­тэныгъэ зиIэхэм ахалъытэхэ хъугъэ.

ШэкIогъум и 7-м нэс зэты­гъоу сомэ мин 50 аратыщты­гъэр. АР-м и ЛIышъхьэ иунашъокIэ джы ахъщэ IэпыIэгъур сомэ мини 100-м нагъэсыгъ. IофшIэнымрэ социальнэ ухъумэным­рэкIэ учреждениер ары зэтыгъо ахъщэ IэпыIэгъур къязытырэр.

АР-м IофшIэнымрэ социальнэ хэхъоныгъэмрэкIэ и Министерствэ къызэритыгъэмкIэ, мы илъэсым шэкIогъум и 7-м нэс социальнэ ахъщэ IэпыIэгъу зэратыгъагъэхэм лъэIу тхылъ зарахьылIэкIэ джыри сомэ мин 50 къаратыщт.

Социальнэ газификацием тегъэпсыхьэгъэ зэтыгъо ахъщэ IэпыIэгъур къаIукIэнымкIэ ищыкIэгъэ къэбархэр къызIэкIэ­зыгъахьэ зышIоигъохэр телефонэу 8 (8772) 52-35-46-мкIэ теонхэ алъэкIыщт. Блыпэ-мэфэку мафэхэм сыхьатыр 9-м къыщегъэжьагъэу 6-м нэс, бэ­рэскэшхом — сыхьатыр 9-м къыщегъэжьагъэу 5-м нэс афытеонхэ алъэкIыщт, сыхьатыр 1-м къыщегъэжьагъэу 1.48-м нэс язэпыугъо уахът.