Хабзэ зэрэхъугъэу, Адыгэ къэралыгъо университетым лъэпкъ культурэхэм яфестиваль щыкIуагъ.

IэкIыб къэралыгъо 42-мэ къарыкIыгъэ студент 1400-рэ мы апшъэрэ еджапIэм щеджэ.

Лъэпкъ хабзэхэр къызэтегъэ­нэжьыгъэнхэр, хэхъоныгъэ ягъэшIыгъэныр, лъэпкъхэм якультурэ ыкIи яIэшIагъэхэм нэмыкIхэр нэIуасэ афашIынхэр, студентхэм азыфагу зэгурыIоныгъэ илъыныр ары зэхэщакIохэм пшъэрылъ шъхьаIэу зыфагъэуцужьырэр. ЦIыф лъэпкъ зэфэшъхьафхэм ятарихъ, яшэн-зэхэтыкIэхэр ныбжьыкIэхэм ашIэнхэ, ахэм лъытэныгъэ афашIын фае.

Фестивалыр мэфэкI концерткIэ къызэIуахыгъ. Адыгеим итарихъ, ичIыопс ибаиныгъэ фэгъэхьыгъэ видеокIэ Iофтхьабзэр къызэIуа­хыгъ, пщынэ мэкъэмэ дахэм, адыгэ орэдым къэзэрэугъоигъэ­хэр едэIугъэх. Нэужым Армением, Абхъазым, Грузием, Грецием, Ливия, Конго, Иорданием, Сирием, Туркменистан, Тыркуем, Узбекистан, Урысыем афэгъэ­хьыгъэ видео техыгъэхэм ара­гъэплъыгъэх, якультурэ, яшэн-хабзэхэр къизыIотыкIырэ къэгъэ­лъэгъонхэр, лъэпкъ шъуашэхэр ащыгъхэу къашъохэр къашIыгъэх, усэхэр къаIуагъэх.

Лъэпкъэу къызхэкIыгъэхэм ыкIи динэу алэжьырэм ямылъытыгъэу апшъэрэ еджапIэм щеджэхэрэр Iофтхьабзэм зэфищагъэх. Мы мафэм нэбгырэ пэпчъ икультурэ зэрэбаир къыгъэлъэгъуагъ.

Iофтхьабзэм икIэухым лъэпкъ зэфэшъхьафхэм яшхыныгъохэр фестивалым хэлэжьагъэхэм къа­гъэхьазырыгъэх. Iанэм зэратефэу шхыныгъо IэшIу бэдэдэ телъыгъ. Студент пщэрыхьакIохэри нэгу­шIоу къеблэгъагъэхэм апэгъокIыщтыгъэх. БгъэшIэгъон фэдиз шхын мыщ къыщытлъэгъугъ.

ДЕЛЭКЪО Анет.