Апэрэ Дунэе научнэ-­практическэ конфе­ренциеу Адыгеим щырагъэкIокIыгъэр къушъхьэ мэзхэм ягъэ­федэн фэгъэхьы­гъагъ.

Адыгэ Республикэм мэзхэмкIэ и ГъэIорышIапIэ, зекIонымрэ зыгъэпсэфыпIэхэмрэкIэ Коми­тетыр, мэз промышленностым иIофышIэхэм я Союз, нэмыкI научнэ ыкIи общественнэ организациехэр ащ изэхэщэкIуагъэх. Кавказ биосфернэ заповедникым ишIэныгъэлэжьхэр къушъхьэ мэз­хэр зэрэбгъэфедэнхэ плъэкIыщт шIыкIэхэм Iофтхьабзэм къащытегущыIагъэх.

КъэгущыIагъэхэм мэзхэм якъэ­гъэгъунэн ыкIи ахэм федэ къябгъэхьын зэрэплъэкIыщтым иамал­хэм анаIэ тырагъэтыгъ. Къушъхьэхэм ярекреационнэ шъо­лъырхэмрэ научнэ-ушэтын Iоф­хэмкIэ агъэфедэнхэ алъэкIыщт чIыпIэхэмрэ къагъэнэфагъэх.

Заповедникым шIэныгъэлэжьэу щылажьэхэрэр Iофтхьабзэм чанэу хэлэжьагъэх. Биологие шIэныгъэхэмкIэ докторэу, профессо­рэу В. В. Акатовыр, научнэ IофышIэхэу А. Р. Бибиныр, Ю. С. Акатовар, О. А. Локтионовар сек­цие зэфэшъхьафхэм яIоф­шIэнхэм къащыгущыIагъэх.

Кавказ заповедникым ипащэ шIэныгъэхэмкIэ игуадзэу Н. Б. Ескиным Iэнэ хъураеу «ЛIэужыкIэм икурорт: «Лэгъо-Накъэ» Урысыем зекIонымкIэ иландшафт зэрихъокIын зэрилъэкIыщтыр?» зыфиIорэм хэлэжьагъ. Экспертхэр зыгъэпсэфыпIэм ипроект тегущыIагъэх. Курортым Iоф щызы­шIэщтхэм ягъэхьазырын зэрэфежьэнхэ фаер къаIуагъ. Конференциер Мыекъопэ къэралыгъо университетым щыкIуагъ.