Кавказ биосфернэ заповедникым иIофышIэхэм кIымафэм зы­тырагъэпсыхьанэу зыфежьэхэрэр гъэмафэр ары. Шыхэм арагъэ­шхыщт Iусыр аугъои, техникэр агъэцэкIэжьы, гъэстыныпхъэхэр пэшIорыгъэшъэу агъэхьазыры.

Мыгъэрэ бжыхьэр гъушъэ ыкIи фабэ, ар агъэфедэзэ гъэцэкIэжьын IофшIэнхэр заповедникым иотделхэм зэкIэми ыкIэм щанагъэсыгъэх. Кордонэу Кишам шыхэр кIымафэм зычIэтыщтхэ бгъагъэр къыщаухы. Кордонэу Бабук-Аулымрэ Солох-Аулым дэт конторэмрэ къызэлъаубытырэ чIыгухэр агъэ­къэбзагъэх. Къыблэ отделым псыхъохэм якIолIэрэ лъагъохэм къатефэгъэ чъыг къутамэхэмрэ къушъхьэхэм къяфэхыгъэ мы­жъошхохэмрэ атырахыжьых.

ЧъыIэу къэблагъэрэм зызэрэфагъэхьазырырэм фэшъхьафэу заповедникым икъэралыгъо инспекторхэм мэзхэр, псыхъохэр, заповедникым ичIыналъэ зэрэщытэу къагъэ­гъунэ. Сыда пIомэ шэкIон уахътэр цIыфхэм джыри аухыгъэп, шакIохэр заповедникым къыхэхьанхэ алъэкIыщт.

Лэгъонэкъэ ыкIи Къыблэ отделхэм уплъэ­кIунэу ащашIыхэрэм хэбзэнчъэу заповедникым шакIохэр къыхэхьагъэхэу къызэрэхэмыкIыгъэр инспекторхэм къаIо. Къушъхьэу Мезмай, гъэхъунэу Житнаяр, псыхъоу Цыцэ пэгъунэгъу чIыгухэр къаплъыхьагъэх, тыдэкIи щырэхьат.

Джащ фэдэу бжыхьэ ощхыхэр къемыжьэ­хэзэ псыхъоу Тихая зыфиIорэм уезыщэлIэрэ лъагъор агъэпытэ. УплъэкIунхэри лъагъэ­кIуатэх.