Партиеу «Единэ Россиер» зызэхащагъэр илъэс 21-рэ зэрэхъурэм епхыгъэу тыгъэгъазэм и 1-м къыщыублагъэу и 10-м нэс зэрэхэгъэгоу цIыфхэр зыщырагъэблэгъэщтхэ декадэр партием ыублагъ.

Хабзэм икъулыкъухэм ялIыкIохэр цIыфхэм ялъэIу тхылъхэм ахэплъэщтых. Адыгэ Респуб­ликэм и ЛIышъхьэу, партиеу «Единэ Россием» и Адыгэ шъо­лъыр къутамэ и Секретарэу КъумпIыл Мурат тыгъуасэ партием и Тхьаматэу Дмитрий Медведевым иобщественнэ приемнэу республикэм щыIэм цIыфхэр щыригъэблэгъагъэх.

ЦIыфхэм яIофыгъохэм анэмыкIэу общественнэ Iофыгъо зэфэшъхьафхэми ащ щахэплъагъэх. ГущыIэм пае, псэупIэу Джаджэм инахьыжъхэм я Совет хэтэу ХьацIыкIу Аскэр къахилъхьагъ Ныхэм ясаугъэт гъэуцугъэнэу. Ежь Аскэр Яхье ыкъор, ыныбжь емылъытыгъэу, чанэу псэупIэм изэтегъэпсыхьан хэлажьэ. Ар кIэщакIо фэхъуи 2017-рэ илъэсым бюджетым къыхимыубытэрэ ахъщэкIэ псэупIэм игупчэ парк саугъэт щаугъэуцугъагъ.

Адыгеим и ЛIышъхьэ къызэрэхигъэщыгъэмкIэ, тарихъымрэ архитектурэмрэ ясаугъэтхэр къэ­ухъумэгъэнхэм республикэм лъэшэу анаIэ щытырагъэты. БэмышIэу Мыекъуапэ къыщызэIуахыгъ Хьахъурэтэ Шыхьанчэрые Умар ыкъом — Адыгэ хэку комитетым иапэрэ секретарыгъэм, Адыгэ автоном хэкум иуцун лъапсэ фэзышIыгъэхэм ащыщым исаугъэт. Джащ фэдэу гухэлъ яI республикэм икъэлэ шъхьаIэ Ным исаугъэт щагъэуцунэу. ДжырэкIэ щыIэ саугъэтхэу цIыф цIэрыIохэу республикэм ихэхъоныгъэ зиIахьышхо хэзы­шIыхьагъэхэм ацIэкIэ агъэуцугъэхэм, джащ фэдэу Хэгъэгу зэошхом изэолIхэм ямемориалхэмрэ яобелискхэмрэ алъыплъэгъэнхэм епхыгъэ IофшIэныр лъэкIуатэ. Къалэу Мыекъуапэ щыпсэурэ пенсионерэу Владимир Коротковыр кIэщакIо зыфэхъугъэ Iофыгъор микрорайонэу Черемушкэм щыпсэухэрэм ащыщыбэхэм яшIоигъоныгъэ дештэ: ТекIоныгъэм ия 55-рэ илъэс фэгъэхьыгъэ бульварыр зэтегъэпсыхьэгъэныр.

Мыекъуапэ имэрэу Геннадий Митрофановым къызэриIуагъэмкIэ, республикэм и ЛIышъхьэ тапэкIэ къыгъэуцугъэгъэ пшъэ­рылъхэр къыдалъытэхэзэ ащкIэ IофшIэныр аублэгъахэу щыт. Мы лъэхъаным специалистхэр зыуж итхэр общественнэ чIыпIэхэр игъэкIотыгъэу гъэцэкIэжьыгъэнхэм епхыгъэ проект-сметэ документацием зэхъокIыныгъэхэр фэшIыгъэнхэр ары. Плиткэхэм ягъэтIылъын, кIэлэцIыкIу джэгупIэу щыIэр икIэрыкIэу зэтегъэ­псыхьэгъэныр, къэгъагъэхэр гъэтIысхьэгъэнхэр, урамхэр нахь дэгъоу къэгъэнэфыгъэнхэмкIэ Iофтхьабзэхэр зэшIохыгъэнхэр, кушъхьэфачъэхэр зыдэщытхэ чIыпIэхэр къыдэлъытэгъэнхэр, тIысыпIэхэр ыкIи хэкIитэкъуапIэхэр гъэуцугъэнхэр.

Адыгеим и ЛIышъхьэ проектыр гъэцэкIагъэ зэрэхъущтымкIэ къыгъэгугъагъэх. Мы лъэхъаным зыуж итхэр къэкIуапIэхэр къыз­дикIыщтхэм игъэнэфэн.

Джыри социальнэ мэхьанэ зиIэ пшъэрылъэу цIыфхэр зыщы­ригъэблэгъэгъэхэ лъэхъаным зы­тегущыIагъэхэм ащыщым ты­къыщыуцун: фенилкетонуриер зиIэ кIэлэцIыкIухэм IэпыIэгъу ятыгъэныр, белок зыхэмылъ е макIэу зыхэлъ гъомылапхъэхэр ахэм аIэкIэгъэхьэгъэнхэр.

Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем къы­­зэриIуагъэмкIэ, макIэу узIу­кIэрэ хэужъыныхьэгъэ уз зиIэу мы лъэхъаным республикэм щагъэунэфыгъэ нэбгырэ 30-м щыщэу 13-мэ (ахэм ащыщэу 10-р кIэлэцIыкIух) фенилкетонуриер къяузы.

А узыр зиIэхэм нэмыкI цIыф­хэм афэдэу псэунхэм пае дэх имыIэу диетэр агъэцэкIэн фае. АщкIэ къэралыгъо IэпыIэгъу ящыкIагъ. Мы илъэсым респуб­ликэ бюджетым сомэ миллион 38-рэ къыхагъэкIыгъ медицинэ IэпыIэгъоу аратыщтым телъытагъэу. Ащ хэхьэх сымаджэхэм ягъэшхэнкIэ ящыкIэгъэ гъомылапхъэр къэщэфыгъэныр (ор­фаннэ узхэр зиIэхэм). 2021-рэ илъэсым ащ пэIуагъэхьэгъагъэм сомэ миллиони 2,9-кIэ ар нахьыб.

ЦIыфхэр ЛIышъхьэм зырегъэб­лэгъэхэ лъэхъаным уз гъэнэфагъэ зиIэхэм ягъэшхэн изэхэщэнкIэ IэпыIэгъу тедзэм иIофыгъо тегущыIагъэх. Ащ сомэ миллион 1,8-рэ пэIухьанэу щыт. А лъэIури гъэцэкIагъэ зэрэхъущтымкIэ къагъэгугъагъэх. Адыгэ Республикэм и ЛIышъхьэ пшъэ­рылъ зэрафишIыгъэм тетэу ящы­кIэгъэщт мылъкур республикэ бюджетым къыщыдалъытагъ ыкIи илъэсэу къихьащтым иублэгъум къыщегъэжьагъэу унагъохэм ар аIэкIагъахьэу рагъэжьэщт.

ПсэупIэу Келермесскэм дэт унэхэм газыр ящэлIэгъэным иIофыгъокIэ социальнэ программэм тегъэпсыхьагъэу унашъо аштагъ. Джащ фэдэу социальнэ мэхьанэ зиIэ псэуалъэхэр зэтегъэпсыхьэгъэнхэмкIэ, шIыгъэнхэмкIэ Iофыгъо гъэнэфагъэхэм язэшIохын зэрэкIорэм респуб­ликэм и ЛIышъхьэ ынаIэ тырегъэты. КIэлэцIыкIу IыгъыпIакIэ ашIыгъ, культурэм и Унэ агъэцэ­кIэжьыгъ, спортивнэ джэгупIэм ишIыни зэшIуахынэу рахъухьагъэхэм ащыщ. Унэе предприниматель IофшIэныр гъэцэкIэгъэнымкIэ социальнэ зэзэгъыны­гъэм тегъэпсыхьагъэу къэралыгъо социальнэ IэпыIэгъу зэраратыщтым епхыгъэ лъэIу тхы­лъым­кIи хэушъхьафыкIыгъэ пшъэ­рылъхэр афашIыгъэх.

«ЗэкIэ пшъэрылъхэу афэсшIыгъэхэм язэшIохын сынаIэ тет. Iофыгъо пэпчъкIэ таде­Iэщт, рес­публикэм социальнэ IэпыIэгъур нахьышIоу щызэхэщэгъэным ыкIи федэу ащ къыхьырэм зыкъегъэIэтыгъэным тапэкIи тыдэлэжьэщт. ЦIыфхэм яегъэблэгъэн унэе Iофыгъохэм яза­къоп ишIуагъэ къызэрэкIорэр, социальнэ IэпыIэгъум епхыгъэ Iоф­тхьабзэхэм шIуагъэу къатырэр цIыф­хэм зэхашIэн фае. Пшъэ­рылъхэр зэшIохыгъэ хъунхэм пае Урысые Федерацием и Президентэу Владимир Путиным, хэгъэгум и Правительствэ, партиеу «Единэ Россием» яIэпыIэгъу тыщэгугъы», — къы­хигъэщыгъ Адыгеим и ЛIышъхьэ.