КъумпIыл Мурат зэдэгущыIэгъу занкIэ зэхищэщт
Адыгеим и ЛIышъхьэу КъумпIыл Мурат республикэм исхэм зэдэгущыIэгъу занкIэ адыриIэщт. Къэралыгъо телерадиокомпаниеу «Адыгеим» 2022-рэ илъэсым тыгъэгъазэм и 15-м ар щыкIощт.
Линие плъырэу 122-мкIэ сыхьатыр 8-м къыщегъэжьагъэу 20-м нэс, джащ фэдэу мессенджерэу «Telegram-glava01_bot» зыфиIорэм иботэу зэхащагъэмкIэ республикэм исхэм Адыгеим ипащэ яупчIэхэр ратын алъэкIыщт. Ащ нэмыкIэу электрон почтэу «kumpilov-online@yandex.ru» зыфиIорэми яупчIэхэр агъэхьын алъэкIыщт. Шъугу къэтэгъэкIыжьы сурэтхэр, видеохэр, аудиохэр, текстхэр шъуиупчIэхэм яжъугъэгъусэн зэрэшъулъэкIыщтыр.
2021-рэ илъэсым Адыгеим и ЛIышъхьэ дыряIэгъэгъэ зэдэгущыIэгъу занкIэм республикэм исхэр зыгъэгумэкIырэ упчIэ 1500-м ехъу къыщыратыгъагъ. Сыхьати 2,5-рэ кIогъэ Iофтхьабзэм медицинэ IэпыIэгъур нахьышIоу ягъэгъотыгъэным, инфраструктурэм зегъэушъомбгъугъэным, предпринимательствэм IэпыIэгъу фэхъугъэным, чIыпIэхэм язэтегъэпсыхьан, щыIэкIэ-псэукIэм зыкъегъэIэтыгъэным ыкIи нэмыкIхэм япхыгъэ упчIэ 69-мэ КъумпIыл Мурат джэуап къащыритыжьыгъагъ.
Эфирым къыхимыубытэгъэ IофыгъохэмкIэ ведомствэхэмрэ муниципалитетхэмрэ пшъэрылъхэр афашIых. ЗэдэгущыIэгъу занкIэр рамыгъажьэзэ Iофыгъуабэ зэшIохыгъэ мэхъу. Ахэм язэшIохын Адыгэ Республикэм и Къэралыгъо Совет – Хасэм идепутатхэри къыхагъэлажьэх.
«Республикэм исхэм ренэу гъусэныгъэ адышъуиIэным мэхьанэшхо иIэу сэлъытэ. ЗэдэгущыIэгъу занкIэхэр зэхэщэгъэнхэр хабзэ хъугъэ. Мафэ къэс цIыфхэм ятхьаусыхэ тхылъхэм тахаплъэ зыхъукIэ ащ фэдэ шIыкIэр къызфэтэгъэфедэ. ЦIыфхэм яIофыгъохэр игъом зэшIохыгъэнхэмкIэ, нахьышIоу ахэм IэпыIэгъу ягъэгъотыгъэнымкIэ социальнэ хъытыухэм, мессенджерхэм, шъолъыр гъэIорышIэнымкIэ Гупчэм яамалхэр зэкIэ къызфэтэгъэфедэх», — къыIуагъ КъумпIыл Мурат.
Тыгъэгъазэм и 1-м къыщегъэжьагъэу Адыгеим исхэм республикэм ипащэ яупчIэхэр ратынхэ алъэкIыщт. Каналэу «Россия-24-мкIэ», Къэралыгъо телерадиокомпаниеу «Адыгеим» и YouTube-каналкIэ, радиоу «Маяк» зыфиIорэмкIэ ар кIощт. Джащ фэдэу зэдэгущыIэгъу занкIэм Адыгеим ихэбзэ къулыкъухэм яофициальнэ нэкIубгъохэу социальнэ хъытыухэу «ВКонтакте», «Одноклассники» зыфиIохэрэм ащыряIэхэм шIоигъоныгъэ зиIэхэр щяплъынхэ алъэкIыщт.