Адыгеим и ЛIышъхьэу, партиеу «Единэ Россием» и Адыгэ шъолъыр къутамэ и Секретарэу КъумпIыл Муратрэ Адыгэ Республикэм и Къэралыгъо Совет — Хасэм и Тхьаматэу Владимир Нарожнэмрэ пшъэрылъ зэрэфашIыгъэм тетэу АР-м и Парламент идепутатэу Александр Купиныр Сергиевскэ къоджэ псэупIэм щыIагъ мобилизацием къыхиубытагъэхэм яунагъохэм IэпыIэгъу зэрафэхъущтхэм фэгъэхьыгъэ Iофыгъохэм япхыгъэу.

ТапэкIэ дзэ къулыкъушIэхэу Ярославскэ полигоным щагъэ­хьазырхэрэм адэжь депутатыр зыщэIэм Шульц Юрий Александр ыкъор къелъэIугъагъ янэ зыщыпсэурэ къутырэу Тамбовскэм иурамэу Партизанскэм яунэу тетым газыр ращэлIэнымкIэ ишIуагъэ къыгъэкIонэу.

«Сергиевскэ къоджэ псэупIэм сызыщэIэм ащ ипащэу Каленников Владимир Михаил ыкъор сигъусэу мобилизованнэм янэу Шульц Людмила Анатолий ыпхъум зыIудгъэкIэгъагъ. Газыр унэм ещэлIэгъэнымкIэ ащ IэпыIэгъу ищыкIэгъагъ. Джэджэ районымкIэ Iахь­зэхэлъ обществэу «Газ­пром распределение» зыфи­Iорэм ипащэу Бахъукъо Хьазрэт Ахьмэд ыкъом Iофым зэшIохыкIэу фэхъущтымкIэ тезэгъыгъ. Джыдэдэм проект документацием игъэхьазырын макIо, Iофым тынаIэ тет, мы охътэ благъэм ар зэшIохыгъэ хъущт. Газыр ращэфэкIэ пхъэу ыгъэстыщтыр бзылъфыгъэм IэкIагъэхьагъ», — къыIуагъ Александр Купиным.

Шъугу къэтэгъэкIыжьы: пшъэ­рылъыбэ зэшIозыхырэ унэгъо гупчэхэм атегъэпсыхьагъэу мобилизацием къыхиубытагъэ­хэмрэ ахэм яунагъохэмрэ IэпыIэгъу зэрафэхъущтхэм илъэныкъохэр икъоу къыдэлъытэгъэн­хэу «Единэ Россием» игъоу елъэгъу. Партием ипрограмми ар къыщеIо.