Республикэм ирайон зэфэшъхьафхэм къаращыгъэ кIэлэцIыкIу купыр мобилизацием къыхиубытагъэхэм яех, апэрэу Адыгеим ыцIэкIэ ащ фэдэ купэу зэхащагъэр шэкIогъум и 29-м Урысые кIэлэцIыкIу гупчэу «Орленкэм» ащагъ. Мэфэ 21-рэ зыныбжь имыкъугъэхэр ащ къэтыщтых.

— Тхьашъуегъэпсэу шъукъызэрэтфэгумэкIырэм ыкIи шъунаIэ къызэрэттежъугъэтырэм фэшI. Илъэс къэс сикIалэ «Горнэм» зыще­гъэпсэфы. Гъэмафэм Сэлым «Орленкэм» дгъэкIонэу тыфэягъ. Джы мары республикэм ылъэныкъокIэ IэпыIэгъур къикIыгъ. Адыгеим и ЛIышъхьэ, хабзэм икъулыкъухэм, зэкIэ IэпыIэгъу къытфэхъухэрэм тафэраз, — къыIуагъ Красногвардейскэ районым щыщэу зикIэлэцIыкIу «Орленкэм» ащэгъэ Фатимэ.

Адыгэ Республикэм IофшIэнымрэ социальнэ хэхъоныгъэмрэкIэ и Министерствэ къызэрэщаIуагъэмкIэ, джыри зы куп агъэхьазыры. Тыгъэгъазэм и 5-м Псыфабэм зыщагъэпсэфынэу Адыгеим щыщхэу мобилизацием къыхиубытагъэхэм яIахьыл бзылъфыгъи 10 агъэкIощт.