«Динамо-МГТУ» Мыекъуапэ — «Металлург» Магнитогорск — 78:66 (11:19), 27:17, 17:18, 23:12). ШэкIогъум и 25-м АР-м испорт Унэшхоу «Ошъутенэм» щызэдешIагъэх.

«Динамо-МГТУ»: Кочнев — 12, Милютин — 15, Гапошин — 16, Александров — 12, Чичайкин — 20, Горохов — 1, НатIэкъу, Воротников, Рябов — 2, Суслов. «Металлургым» къыхэщыгъэ­хэр: Харитонов — 16, Красильщиков — 14.

Финалым хэхьаным фэбэнэрэ командэхэм ешIэкIэ дэгъу къагъэлъэгъуагъ. ЗэIукIэгъур аухынкIэ такъикъи 10 къэнагъэу пчъагъэр 55:54-рэ хъугъэ. Такъикъи 2 къы­зэ­нэм, В. Чичайкиным хъагъэм Iэгуаор ридзагъ — 77:59-рэ. ХьакIэхэм зэкIэлъыкIоу гъогогъуи­щэ хъурджанэм радзагъэми, «Динамо-МГТУ-м» текIоныгъэр зыIэкIигъэкIыгъэп. ЕшIэкIо ныбжьыкIэхэу Д. Гороховыр, М. На­тIэкъор, З. Воротниковыр зэнэкъо­къум хэлэжьагъэх.

АР-м физкультурэмкIэ ыкIи спортымкIэ и Комитет итхьаматэу Дэгужъые Мурат, Мыекъопэ къэ­ралыгъо технологическэ университетым иректорэу Къуижъ Саидэ зэIукIэгъум еплъыгъэх, тре­нер­хэм, ешIакIохэм афэгушIуа­гъэх.

ЯтIонэрэ зэIукIэгъур

«Динамо-МГТУ» — «Металлург» — 68:62 (18:12, 11:19, 19:17, 20:14). «Динамо-МГТУ»: Чичайкин — 7, Александров — 28, Гапошин — 10, Милютин — 5, Кочнев — 14, Суслов — 1, Рябов — 3. «Металлург»: Болотских — 15, Харитонов — 14.

Пчъагъэр зэфэдэу зэп къызэ­рэхэкIыгъэр: 7:7, 31:31, 48:48. «Динамо-МГТУ-м» икапитанэу Илья Александровым щысэшIу къыгъэлъэгъуагъ, игъусэхэр текIоныгъэм фищэнхэ, ыгъэгушIонхэ ылъэкIыгъ. И. Александровым очкоуи 3 дзыгъохэр гъогогъуи 8 хъурджанэм ридзагъэх.

— Пчъагъэм тимыгъэрэхьатэу, ешIэгъур кIэухым фэкIо: 48:49, 53:53. Хъурджанэм ычIэгъ чIэтэу Ю. Кочневым Iэгуаор къаIэкIе­хышъ, хъагъэм редзэ, А. Гапошиным тазыркIэ пчъагъэм хегъа­хъо. ХьакIэхэри апэкIэ къылъэкIуа­тэх, В. Назаровым, нэмыкIхэм хъагъэм Iэгуаор радзэ: 59:56, 59:58.

Ю. Рябовым дахэу ыпэкIэ ыты­гъэ Iэгуаор И. Александровым хъагъэм редзэ — 62:58. Ю. Кочневыр ябэнызэ ухъумакIохэм аIэкIэкIышъ, хъурджанэм Iэгуаор редзэ — 65:60, уахътэу къэна­гъэр 1:39-рэ — 65:60. Пчъагъэр 65:62 хъугъэу И. Александровым оч­коуи 3 дзыгъор дахэу ыгъэцакIи, текIоныгъэр къыгъэблэгъагъ.

Пресс-зэIукIэр

— Илья Александровым иIэпэIэсэныгъэ осэ ин фэтэшIы, тикапитан, командэр зылъещэ. Артем Гапошиным, Юрий Кочневым, зэкIэ тиешIакIохэм тагъэгушIуагъ, апэрэ чIыпIэм «Динамо-МГТУ-р» щыI, — къытиIуагъ тренер шъхьаIэу, Адыгэ Респуб­ликэм изаслуженнэ тренерэу Андрей Синельниковым.

ЗэIукIэгъум нэбгырабэ еп­лъыгъ, тиешIакIохэм Iэгу афы­теуагъэх.

ЧIыпIэхэр

Апшъэрэ купым хэт баскетбол командэхэр чIыпIэу зыдэщытхэр, очко пчъагъэу яIэр зэтэгъапшэх.

1. «Динамо-МГТУ» — 19 2. «ЧелБаскет» — 17 3. «БАРС-РГЭУ» — 17 4. «Южный слон» — 15 5. «Нефтехимик» — 15 6. «Металлург» — 13 7. «Чеб. Ястребы» — 12 8. «РПФ-Университет» — 12.