ХэушъхьафыкIыгъэ дзэ операцием хэлажьэхэрэм афэгъэхьыгъ
Мобилизацием къыхиубытагъэхэм яунагъомэ занкIэу IэпыIэгъу ягъэгъотыгъэзэ шIыгъэным пае республикэм щызэхащагъэу IофшIэкIо купыр щэлажьэ.
Унагъо пэпчъ телъытагъэу социальнэ паспортхэр зэхагъэуцуагъэх, ащ елъытыгъэу ахэм ящыкIэгъэ IэпыIэгъур зыфэдэр нафэ афэхъу. ХэушъхьафыкIыгъэ дзэ операцием хэлажьэрэмэ якIалэхэр ыпкIэ хэмылъэу еджапIэхэм ыкIи колледжхэм ащагъашхэх, кIэлэцIыкIу IыгъыпIэм агъэкIорэ сабыймэ апае атыщтыгъэ ахъщэр аIахыжьрэп.
Джащ фэдэу АР-м и ЛIышъхьэу КъумпIыл Мурат иунашъокIэ мобилизацием къыхиубытагъэмэ яунагъохэр фэгъэкIотэныгъэ зиIэхэм ахагъэхьагъэх социальнэ газификацием ипрограммэкIэ яшIуагъэ арагъэкIыным фэшI. ХэушъхьафыкIыгъэ дзэ операцием хэлажьэрэмэ IэпыIэгъу афэхъунхэм фэгъэхьыгъэ Iофыгъоу зэшIуахырэмэ къадыхэлъытагъэу блэкIыгъэ тхьамафэм шъолъыр хэбзэгъэуцугъэу щыIэм зэхъокIыныгъэхэр фашIыгъэх. Ащ елъытыгъэу ахэм транспорт хэбзэIахьыр атыщтэп.
ГумэкIыгъоу къыкъокIыхэрэр ащ лъыпытэу дагъэзыжьынхэм фэшI Адыгэ Республикэм и ЛIышъхьэ унашъо ышIыгъ хэушъхьафыкIыгъэ дзэ операцием хэлажьэхэрэм яунагъо пэпчъ хабзэм илIыкIохэр ыкIи депутатхэр япхыгъэнхэу.